„არ მინდა, ჩემი ბიჭი მოვიდეს და მითხრას, გავთხოვდიო...“

ჩვენს რესპონდენტს თითქმის მთელი თბილისი მამულიჩათი იცნობს. პროდიუსერი კახა მამულაშვილი კარგი რესპონდენტია, რადგან ყველა კითხვაზე აქვს პასუხი. ინტერვიუზე შესათანხმებლად რომ დავურეკეთ და რუბრიკის სახელწოდება ვუთხარით, გვიპასუხა, მე იმიტომ დამირეკეთ, რომ არატრადიციული ვარო?.. ამ პასუხის შემდეგ, რასაკვირველია, მივხვდით, რომ წინ საინტერესო დიალოგი გველოდა.

- მოგეხსენებათ, საქართველო ტრადიციული ქვეყანაა, უყვარს ჩვენს ხალხს ღვინო, მაგრამ მე არ ვსვამ, მაგალითად, ლუდი ცხოვრებაში არ გამისინჯავს, არ მიყვარს დალევა და ამიტომაც ვერიდები დიდ სუფრაზე მოხვედრას, სადაც დიდი რაოდენობით დევს საჭმელ-სასმელი და ისმის ბევრი და გრძელი სადღეგრძელო.
- ნაირ-ნაირი სასმისების „გამოგონებაში“ მაგრები ვართ, ქალის ფეხსაცმლიდან დალევა ამის ნათელი მაგალითია...
- ზოგადად არ მსიამოვნებს მთვრალ საზოგადოებაში ყოფნა, სადაც ზედმეტად უხსნიან სიყვარულს ერთმანეთს და მეორე დღეს არავის არავინ ახსოვს, ამიტომ ვცდილობ, სუფრაზე იქამდე გავჩერდე, სანამ ღრეობაში გადაიზრდება ყველაფერი, მერე უკვე აღარ ვჩერდები და ვიპარები.
რაც შეეხება უშუალოდ შეკითხვას, შევსწრებივარ ასეთ სიტუაციას, ჩემს მეგობარს მანდილოსნისთვის გაუხდია ფეხსაცმელი და იქიდან დაულევია, ძალიან მთვრალი იყო და მეორე დღეს არაფერი ახსოვდა. ჩემი აზრით, გართობის ნებისმიერი საშუალება კარგია მანამ, სანამ აცნობიერებ და გახსოვს ყველაფერი, წინააღმდეგ შემთხვევაში მარაზმში გადადის.
- რაც შეეხება ქორწილის ტრადიციას, სადაც მაყრიონის რბოლა ცუდი შედეგებით სრულდება ხოლმე.
- ადრე, ბევრი წლის წინ, თვითონაც ვმონაწილეობდი მსგავს გასწრობანაში და ვაღიარებ, რომ ეს ქაჯობაა. პატარძლის მანქანის უკან დგომა, მანქანების დამტვრევა, ავტომობილის ფანჯრებიდან გადმომსხდარი ხალხი – ძალიან ცუდი საქციელია. საერთოდ, არ მომწონს, სუფრაზე თამადა დიდხანს რომ ლაპარაკობს და ბევრ სადღეგრძელოს ამბობს. როგორც იცით, კორპორატიული საღამოების ორგანიზებით ვარ დაკავებული, როცა მიკვეთენ ქორწილს, თავიდანვე ვეუბნები, თამადას მიკროფონს დავუთმობ 8-9 სადღეგრძელოსთვის, თუ მხოლოდ სადღეგრძელოების მოსმენა გსურთ, ვერ ვითანამშრომლებთ, ესაა ჩემი პირობა-მეთქი. როცა ხალხი გართობას იწყებს, სადღეგრძელოები აღარავის აინტერესებს. ვფიქრობ, თამადის მოსმენა მისაღებია პირველი ერთი საათი, დანარჩენი უნდა იყოს გართობა.
- რადგან ქორწილს შევეხეთ, გვითხარით, ერთსქესიანთა დაქორწინების საკითხზე რას ფიქრობთ?
- ეს ტრადიციად საქართველოში არასდროს დამკვიდრდება. მიუხედავად იმისა, რომ მყავს არატრადიციული ორიენტაციის ნაცნობები, ჩემთვის ოჯახი ნიშნავს ქალისა და კაცის თანაცხოვრებას, ოდითგანვე იყვნენ ადამი და ევა, ანუ კაცი და ქალი, ასე რომ არ ყოფილიყო, იქნებოდნენ ადამი და ადამჩიკა (იცინის)... მე ვერავის განვსჯი, მაგრამ ნამდვილად არ მინდა, ჩემი ბიჭი მოვიდეს და მითხრას, გავთხოვდიო (იცინის).
ყველას აქვს უფლება, თავისი ცხოვრებით იცხოვროს, ოღონდ საკუთარი ორიენტაცია არ უნდა მოგვახვიონ თავზე. ზოგადად, ნებისმიერი თემის რეკლამირება აგრესიით უკეთესად ხდება, ვიდრე იგნორით. 17 მაისის ამბები, საბოლოო ჯამში, უფრო კარგი პიარი გამოვიდა, ვიდრე უარყოფითი გამოხმაურება.
- რაც შეეხება სუსტ და ძლიერ სქესს...
- ჩემს ოჯახში სუსტი სქესი არ იგრძნობა, ასე მგონია, ძლიერი სქესის წარმომადგენელთან ვცხოვრობ (იცინის).
- თქვენს ოჯახში გენდერული თანასწორობა დაცულია?
- ჩემთან გენდერული ბალანსი ძალიან დარღვეულია, გენდერი არ არსებობს (იცინის). ჩვენს ოჯახში მაქსიმალური დოზით მატრიარქატია გაბატონებული, ჯერ მამაკაცი და მერე ქალი, ასეთი მიდგომა ჩვენთან არ არსებობს.
- საოჯახო საქმეში როგორ გაქვთ როლები გადანაწილებული?
- შეიძლება ითქვას, რომ ორი კაცი, მე და ჩემი ლევანი, ლელას ვგულისხმობ, ვცხოვრობთ ოჯახში, არატრადიციული ოჯახი ვართ (იცინის). მაცივრის თემას ვაგვარებ მე, ანუ მომაქვს პროდუქტი, რომელსაც არ სჭირდება მომზადება, დალაგება, სარეცხი დამლაგებელს ეხება, ბავშვი კი ბებია-ბაბუას ჰყავს ჩაბარებული, რის გამოც მათ დიდ მადლობას გადავუხდი, რადგან ახერხებენ იმასაც, რომ მარიკოს მშობლები არ დაავიწყდეს (იცინის).
- როგორია, თქვენი აზრით, ნამდვილი ქართველი ქალი?
- მე მომწონს საქმიანი და ძლიერი ქალი, ისეთი, როგორიც ლელაა. არიან ადამიანები, რომელთაც უყვართ საოჯახო საქმეები, მაგალითად, დედაჩემმა თავისი ახალგაზრდობა ოჯახს შეგვალია და შეიძლება ითქვას, რომ სულ სახლში გვყავს „გამოკეტილი“, კი ჰყავს მეგობრები, ლაღია, მაგრამ შეიძლება ითქვას, რომ ცხოვრება შემოგვწირა.
- ჭკვიანად როგორ ქალს მიიჩნევთ?
- სახლში მყავს აგერ და როგორ გითხრათ... ჭკვიანი ქალი არ ნიშნავს განათ ლებულ და ნაკითხ ქალს, ეს სხვა თემაა. ჭკვიანია ქალი, რომელმაც იცის, როდის უნდა შექმნას ოჯახი, რა უნდა ცხოვრებაში, ასევე ის ქალი, რომელიც ოჯახში ქმნის კომფორტულ ურთიერთობას იმ ადამიანთან, რომელიც ძალიან უყვარს. ასევე ჭკვიანია ქალი, რომელიც ისე მოაწყობს საქმეს, რომ შენი ქმედებით შეურაცხყოფას არ მიაყენებ.
- ახლა რომ ოჯახები უფრო ადვილად ინგრევა, ეს ქალის როლის გაძლიერებას უკავშირდება?
- ოჯახის დანგრევის ძირითადი ფაქტორი მაინც პატარა ასაკში დაქორწინებაა. გეთანხმებით, რომ დღევანდელ დღეს ერთსა და იმავე ასაკში გოგონა უფრო ჭკვიანურად აზროვნებს, ვიდრე ბიჭი. გარდა ამისა, პატარა ასაკში სიყვარული სულ სხვა რამ გგონია, თანაცხოვრება კი სულ სხვას განახვებს. უმჯობესია, წყვილმა ერთმანეთი კარგად შეისწავლოს და შემდეგ დაოჯახდნენ, რადგან ეს სახუმარო თემა არ არის. შეყვარებულობის პერიოდი სხვაა, ოჯახური თანაცხოვრება – სხვა, შვილი კი უფრო საპასუხისმგებლო საკითხია. ვფიქრობ, 15-16 წლის ასაკში სიყვარული არ არსებობს, ეს უფრო გატაცებაა, მერე ხვდები, რომ სულ სხვაგვარად ყოფილა საქმე. არადა, ოჯახი, ცოლქმრობა მეგობრობას და ნდობას უნდა ეფუძნებოდეს, ყოველ შემთხვევაში, ჩვენ ასე ვართ, მეგობრობა კი ყველაზე ძვირფასია. დროთა განმავლობაში გრძნობები სახეს იცვლის და მერე სიყვარული გადადის მეგობრობასა და ურთიერთპატივისცემაში, რომლიც ჩემთვის ყველაზე მნიშვნელოვანია.
- არსებობენ მამაკაცები, რომელთაც წარმატებული ქალის გვერდით ცხოვრება, მსუბუქად რომ ვთქვათ, არ მოსწონთ და ცდილობენ, შემდგარი ქალი „სახლში დააბან“... თქვენი აზრით, რა არის ამის მიზეზი?
- როცა წარმატებული და ცნობილი ადამიანის გვერდით ცხოვრობ, არის თემები, რომლებთანაც შეგუება მოგიწევს, მაგალითად, ბევრი თაყვანისმცემელი, სხვადასხვა პროფესიის ადამიანთან ურთიერთობები, ეჭვიანობა, ჭორები, ინტრიგები, ეს კი მეორე ნახევარს ფსიქოლოგიური წნეხის ქვეშ აქცევს, ზოგიერთი ვერ უძლებს ამას და სიტუაციის შეცვლას ცდილობს. სანამ მე და ლელა დავოჯახდებოდით, ამიხსნა, რომ მოღვაწეობს ისეთ სფეროში, სადაც მრავლადაა ჭორი და ინტრიგა, მითხრა, რომ არის თავისუფლების მოყვარული ადამიანი, ჰყავს სხვადასხვა პროფესიის ბევრი მეგობარი, არ უყვარს შეზღუდვები და მთხოვა მიმეღო ისეთი, როგორიც არის.. დღემდე ასე ვიქცევი, ამიტომაც ჩვენი ურთიერთობა მეგობრობასა და ნდობაზეა აწყობილი.
- როდესაც ლელასთან ურთიერთობა დაიწყეთ, ფართო მასებისთვის იყავით ლელა წურწუმიას ქმარი, ამ რანგში ყოფნა მამაკაცისთვის რას ნიშნავს?
- მე მთელი თბილისი მიცნობს, როგორც მამულიჩას, ამიტომ პირდაპირ გეტყვით, რომ ეს საკითხი და სტატუსი არასდროს მაწუხებდა.
- ალბათ ყველას გვითქვამს სიტყვა გოიმი, თქვენთვის რას ნიშნავს ეს?
- ჩემთვის გოიმი იგივე ქაჯია... ზოგი გოიმს ეძახის ეჭვიანს, არაგემოვნებიანს, პირადად ჩემთვის გოიმი უსაქციელო და უზრდელი ადამიანია, რომელმაც არ იცის, როგორ მოიქცეს. მაგალითად, ძალიან მაღიზიანებენ ზედმეტად ეჭვიანი ტიპები.
ერთ ამბავს მოგიყვებით, დაბადების დღეზე ერთ-ერთი მანდილოსანი გამოვიცეკვე, რომელსაც კარგად ვიცნობდი, მოვიდა მისი ქმარი და მითხრა, ბოდიში, არ მინდა ცუდად გამიგო, მესმის ყველაფერი, მაგრამ გეხვეწები, ჩემს ცოლს აღარ ეცეკვოო (იცინის). ვერაფერი ვერ ვუთხარი, მაგრამ ამ საქციელს ვერასოდეს გავიგებ. ჩემთვის მთავარია, რომ პირდაპირ მოვიდა და მითხრა და ვინმეს პირით არ შემომითვალა.
- რატომ არის დღეს სოფლელობა სირცხვილი, რას ნიშნავს სოფლელი თქვენთვის?
- ჩემთვის სოფლელია ადამიანი, რომელიც ცხოვრობს სოფელში. ჩემთვის სოფელი იყო ის ადგილი, სადაც მივდიოდი, ვისვენებდი და კარგ დროს ვატარებდი. როგორც შეიძლება, მე შევხედო სოფლელს, ისე მიყურებს ის მეც, ანუ ქალაქელს, ეს სიტყვები ჩემთვის განსაზღვრავს საცხოვრებელ ადგილს და მეტს
არაფერს.
წყარო: reitingi.ge