''ბაჩო ახალაიას ნაჩუქარი იარაღი რომ გიდევს უკანა ჯიბეში, კრიმინალებს არ უნდა ეუბნებოდე, შენი ჭირიმეო''

მცირე ხნის წინ უფლებადამცველმა ზურა ქადაგიძემ ''კომედი შოუს'' მსახიობების: ნიკა არაბიძის, ვახო ბიჭიკაშვილისა და ნიკა არაბიძის ე.წ. კანონიერი ქურდებთან ერთად გადაღებული ფოტოები და ვიდეო გაავრცელა.

ორი კვირის განმავლობაში უშედეგოდ ვცდილობდით ''კომედი შოუ''-ს მსახიობებისგან კომენტარის აღებას. მხოლოდ ვანო ჯავახიშვილმა გვიპასუხა, თუმცა ის ამ ფაქტს არ შესწრებია და გვითხრა, რომ მისგან კომენტარის გაკეთება უხერხული იქნებოდა. ბიჭებთან დაკავშირება გვირჩია, თუმცა ამ ამბის მთავარმა გმირებმა არც ზარებზე და არც მესიჯებზე არ გვიპასუხეს.

სოციალურ ქსელში ამ თემას კვლავ აქტიურად განიხილავენ და ''კომედი შოუს'' ბიჭების ორმაგ სტანდარტებზე ლაპარაკობენ. ბიჭები დუმილს ამჯობინებენ, თუმცა, როგორც ჩანს, ამ თემასაც იუმორით უდგებიან, ვინაიდან სოციალურ ქსელში ფოტო გამოაქვეყნეს სათაურით: ''მორიგი სკანდალური ფოტო: ვასკა სუმაშედში, ნიკოლოზ ბლანდინი, ციმბირი ''ბელი ლებედი''. ჩვენ კომენტარი მათი ყოფილი გუნდის ორ წევრს ვთხოვეთ.

დათო გოგიშვილი:

- ეს ვიდეო, რამდენადაც ვიცი, არის შედარებით ახალი გადაღებული. მე ''კომედი შოუ''-ში 2012 წლის 8 აპრილიდან აღარ ვმუშაობ. ''კომედი შოუს'' მსახიობების გარკვეულ წარმომადგენლებთან და არა ყველასთან ძალიან ბევრი უთანხმოება მქონდა და მათი მიდგომები მთელ რიგ საკითხებში ჩემთვის მიუღებელი იყო. მიმაჩნია, რომ ადამიანებს ისე უნდა მოექცე, როგორც გსურს, რომ შენ მოგექცნენ. მე მათ არ დავაბრალებ იმას, რაც არასოდეს ყოფილა. ''კომედი შოუს'' მსახიობების აბსოლუტური უმრავლესობისათვის ყოველთვის კატეგორიულად მიუღებელი იყო და არის ე.წ. ქუჩის მენტალიტეტი და ,,შავი გაგება''.

რაც ამ ადამიანებს ვიცნობ და შეხება მქონია, ისინი ყოველთვის დაუფარავად გამოდიოდნენ ცხოვრების ამ მანკიერი ფორმის წინააღმდეგ. ამას მუდამ დაუფარავად გამოხატავდნენ არა მარტო თავიანთ პირად ცხოვრებაში, არამედ თავიანთ შემოქმედებაში. შესაძლოა, მათ მენტალობასა და ცნობიერებაში რამე შეიცვალა ამ მიმართულებით, რაზეც ვერაფერს გეტყვით. თუ ეს ასეა და ეს ადამიანები მათი მეხოტბეები გახდნენ, ბუნებრივია, ეს ცუდია. მე ცოტა ნაკლებად წარმომიდგენია.

გასათვალისწინებელია მეორე მომენტიც. შესაძლოა, დამპატიჟონ კონკრეტულ წვეულებაზე, სადაც ასევე სხედან ამ სფეროს წარმომადგენლები, რა გავაკეთო? ავდგე და პროტესტის ნიშნად წამოვიდე?! ეს სუფრის დიდი უპატივცემულობა და ელემენტალური უზრდელობაა. ჩემ გვერდით რომ სუფრასთან კანონიერი ქურდი ზის, ეს სულაც არ ნიშნავს, რომ მე მისი იდეალების, აზროვნებისა და ცხოვრების წესის მოტრფიალე ვარ. დავუშვათ, ისინი იძებნებიან საქართველოს ტერიტორიაზე, მათ ეძებს საქართველოს კანონმდებლობა და არა საბერძნეთის. მართლმსაჯულების აღსრულება არ არის მსახიობის პრეროგატივა.
არსებობს მთელი რიგი მიმართულებები, რისთვისაც ჩვენ, საზოგადოებამ, ეს ადამიანები შეიძლება კომპეტენტურად, ლოგიკურად და დამსახურებულად ვაკრიტიკოთ, მაგალითად, ''ნაციონალური მოძრაობის'' ნებისმიერი ახალგაზრდული ორგანიზაციის პარტიულ აქტივს გაასწრეს ნაციონალების ფანობაში, რასაც ხშირად მედიასტანდარტების, მაუწყებლობის ეთიკის უხეში დარღვევით აკეთებენ.

ბაკურ სვანიძე:
- ქეიფი ყველასთან შეიძლება. მყავს ბავშვობის მეგობრები, რომლებიც გზას აცდნენ და ცუდ გზაზე დადგნენ. იყვნენ ან არიან კრიმინალთან დაკავშირებულნი, შეიძლება, ხვალ მათ რესტორანში, მაღაზიაში ან თეატრში შევხვდე, ისე არ გავაკეთებ, რომ თვალი ავარიდო და გამარჯობა არ ვუთხრა. შეიძლება, მათთან ერთად ჭიქაც ავწიო და პურიც ვჭამო, მაგრამ ამის შემდეგ ქუჩაში არ უნდა გამოვარდე და არ უნდა იძახო, რომ საქართველოში კრიმინალი მომრავლდა და ბიძინა კრიმინალს არ ებრძვისო. ორმაგ სტანდარტზეა საუბარი. საზოგადოებას არ უნდა მოაჩვენო, რომ მათ ებრძვი და ამ დროს მათ ეუბნები, თქვენ გეხუტუნეთ და გენაცვალეთო. ასე ტაკიმასხარასავით არ უნდა მოიქცე.

- ზოგის აზრით, ამ საქციელის გამო ''კომედი შოუს'' მსახიობებმა პასუხი უნდა აგონ.
- ეს იურისტების თემაა. საბერძნეთში იქეიფე კრიმინალთან და ამის გამო უნდა დაგიჭირონ? არ მგონია, კანონში მსგავსი რამ ეწეროს. შესაძლოა, მათ არც იცოდნენ, რომ კრიმინალებთან ერთად ქეიფობდნენ. შეხვდნენ ერთმანეთს რესტორანში და უბრალოდ, იქეიფეს.

- ალბათ, მაინც ეცოდინებოდათ.
- დარწმუნებული ვარ, რომ ეს იცოდნენ, მაგრამ როდესაც საქმე მიდის იურიდიულ პასუხისმგებლობაზე, მათ უნდა დაუმტკიცო, რომ ეს ინფორმაცია ჰქონდათ. Kეს ყველაფერი იურისტებმა უნდა გაარკვიონ. მე შემიძლია, გელაპარაკოთ მინიმალური ზნეობის არსებობის შესახებ. ზოგი ბოლო დროს გამოდის და ამბობს, ციციკორეები გამოხტნენ და მაღალ მორალურ საკითხთან დაკავშირებით ლექციებს გვიკითხავენო. საზოგადოებრივ ზნეობაზე შეგვიძლია, ყველამ ვისაუბროთ. ბაჩო ახალაიას ნაჩუქარი იარაღი რომ გიდევს უკანა ჯიბეში, კრიმინალებს არ უნდა ეუბნებოდე, შენი ჭირიმეო. ამ შემთხვევაში ზნეობრივი კრიტერიუმები სასტიკად დარღვეულია.