მსახიობებისა და პოლიტიკოსების გამოსამშვიდობებელი სიტყვები კოტე თოლორდავას პანაშვიდზე

ქაშუეთის ეკლესიაში მსახიობ კოტე თოლორდავას სამოქალაქო პანაშვიდი მიმდინარეობდა. პანაშვიდს მისი ოჯახის წევრები, მეგობრები, ახლობლები, კოლეგები და რიგითი მოქალაქეები.

სამოქალაქო პანაშვიდი ქაშუეთში 13:00 საათზე დაიწყო და 15:00 საათამდე გაგრძელდა. 15:00 საათზე კი მსახიობი ტაძრიდან გამოასვენეს და საბურთალოს სასაფლაოზე დაკრძალეს.

დაკრძალვამდე მედიასთან კოტე თოლორდავაზე ცნობილმა მსახიობებმა და პოლიტიკოსებმა კიდევ ერთხელ ისაუბრეს.

დავით დარჩია, მსახიობი:
საქართველომ დაკარგა უნიჭიერესი ახალგაზრდა მამაკაცი, რომელსაც ძალიან ბევრი მოეტანა თავისი ნიჭიერებით ამ ქვეყნისთვის. მე ვუსამძიმრებ მის გარდაცვალებას არამხოლოდ ოჯახის წევრებსა და მეგობრებს, არამედ მთელ საქართველოს.

გოგი ქავთარაძე, მსახიობი:
ღმერთმა გაანათლოს, ძალიან საწყენია, რომ ასეთი ადამიანები მიდიან... რამდენი რამის გაკეთება შეეძლო და რამდენი რამეს გააკეთებდა... ღმერთმა გაანათლოს მისი სული!

შალვა ნათელაშვილი, პოლიტიკოსი:
ის იყო მისაბაძი ფიგურა ახალგაზრდობისათვის და მის განვლილ გზას უკვალოდ არ ჩაუვლია. დიდი სამძიმარი მინდა გამოვუცხადო მის ოჯახს და მთლიანად ქართულ საზოგადოებას.

ალექსი პეტრიაშვილი, პოლიტიკოსი:
ის იყო თავის ქვეყანაზე, ოჯახზე
და საქმეზე შეყვარებული ადამიანი. ძალიან მტკივა გული მთელ საქართველოსთან ერთად, რომ აი, ასეთი ღირსეული, კარგი, ნამდვილი ვაჟკაცი ადამიანი წავიდა ამ ქვეყნიდან...
წყარო: ambebi.ge