რით არის სასარგებლო ჭარხლისა და სტაფილოს ღეროები

ჭარხლის ღეროები ფოთლებიანად ძალიან უხდება ბოსტნეულის დიეტურ სალათებს, რადგან მდიდარია უჯრედისებით და სწრაფად ანაყრებს, მაგრამ გამოყენების წინ ფოთლები აუცილებლად ორივე მხრიდან გარეცხეთ, წვრილად დაკეპეთ და დამდუღრეთ.

ამ პროცედურის შემდეგ ღეროები უფრო რბილი გახდება და სპეციფიკური გემოც არ ექნება.

ჭარხლის ღეროები განსაკუთრებით სასარგებლოა ადამიანებისთვის, რომლებსაც დიაბეტი და გულ-სისხლძარღვთა დაავადებები აწუხებთ. ასევე, სასარგებლოა ანემიის, ფარისებრი ჯირკვლისა და სხვა ენდოკრინული დაავადებების დროს.

თავის ტკივილის დროს ძველად ჭარხლის ფოთოლს კარგად დაჭყლეტდნენ და შუბლზე იდებდნენ. 15 წუთის შემდეგ ტკივილი ყუჩდებოდა.

კონიუნქტივიტის დროს ქუთუთოებზე დანაყილ ჭარხლის ღეროებსა და ფოთლებს იდებდნენ.

ჭარხლის ფოთლებისა და ღეროების ნახარში კარგი საშუალებაა შეკრულობის სამკურნალოდ: 1 სუფრის კოვზ დაქუცმაცებულ ფოთოლს დაასხით ერთი ჭიქა მდუღარე. გააჩერეთ, სანამ გაგრილდება, გადაწურეთ, გაყავით ოთხ ნაწილად და დღის განმავლობაში მიიღეთ.

ჭორფლის ან პიგმენტური ლაქების მოსაცილებლად: ჭარხლის ფოთლების ფაფა წინასწარ სოდიანი წყალხსნარით გაწმენდილ სახეზე დაიდეთ.

ჭარხალი ხელს უწყობს ჭრილობებისა და ნახეთქების შეხორცებას - იყენებენ ფოთლების წვენს, ფაფას და ნახარშს ჭრილობების ჩამოსაბანად და კომპრესების სახით.

თუ ქუსლები დახეთქილი გაქვთ და გტკივათ, შეგიძლიათ, ფეხები ჭარხლის ფოთლების ნახარშში დაითბილოთ. ჭარხლის ფოთლებში შემავალი P და U ვიტამინები ხელს უწყობენ სისხლძარღვების მუშაობას, აფერხებენ ათეროსკლეროზის განვითარებას, ააქტიურებენ ნივთიერებათა ცვლას და სისხლის წარმოქმნის პროცესს. სასარგებლოა, აგრეთვე, წყლულოვანი გასტრიტისა და ღვიძლის დაავადებების დროს.

გარდა ამისა, დამტკიცებულია, რომ ჭარხლის ფოთლები მნიშვნელოვნად ამცირებს სიმსივნური დაავადებების განვითარების რისკს.

სტაფილოს ფოთლები

არანაკლებ სასარგებლოა სტაფილოს ფოჩები ღეროიანად. მათ უმატებენ სალათებში, წვნიანებსა და სხვადასხვა კერძში; აქტიურად იყენებენ მარინადების მომზადებისას; მათგან ჩაისაც კი ამზადებენ.

ძველად თმის გასამაგრებლად და მისი ზრდის გასაუმჯობესებლად თავზე სტაფილოს ფოთლების ნახარშს ივლებდნენ.

სტაფილოს ნედლ ფოთლებს სპეციფიკური სიმწარე დაჰკრავს. ამიტომ აუცილებელია, 15 წუთით მდუღარეში დატოვოთ ან უბრალოდ, მხოლოდ დამდუღროთ.

სტაფილოს ღეროებს დიდი ხანია, სამკურნალოდ იყენებენ:

ჰემოროის სამკურნალოდ - ბნელ ადგილას გამომშრალ ერთ ჩაის კოვზ სტაფილოს ღეროებს დაასხით ერთი ჭიქა მდუღარე. გააჩერეთ გაგრილებამდე და მიიღეთ ნაწილ-ნაწილ მთელი დღის განმავლობაში.

მკურნალობის საშუალო კურსი დაახლოებით ორ თვეს მოიცავს.

ცისტიტის დროს სვამენ სტაფილოს ღეროების სუფთა ნაყენს ან მას თანაბარი პროპორციებით ურევენ ოხრახუშის ფოთლების ნაყენს.

საშარდე ბუშტიდან ქვებისა და ქვიშის გამოსადევნად აბაზანის შემდეგ საშარდე ბუშტის მიდამოებში სტაფილოს ღეროებისა და თესლის ნაყენის კომპრესს იდებენ.

პოლიართრიტის შემთხვევაში კი აღნიშნულ ნაყენს ხახვის წვენსა და გახეხილ სტაფილოს უმატებენ. სტაფილოს ფოთლების ნაყენის კომპრესებს იყენებენ კანის პრობლემების - დერმატიტის, ფსორიაზის, ალერგიის დროს. 

ჟურნალი "რეიტინგი"