''ჩემი ნეკნისგანაა ჩემი ცოლი გამოძერწილი...''
''საქართველოს სიყვარული და პატრიოტობა სტერეოტიპული არასდროს იქნება. თითოეულმა ქართველმა რომ აიღოს პატარა აგური და საქართველოს სასარგებლოდ დადოს, ესეც დიდი პატრიოტობაა. XXI საუკუნეა, ''აიფონები'' გვიჭირავს ყველას ხელში, წინ მიდის ცხოვრება და უნდა ავყვეთ, უნდა გავიზარდოთ და განვვითარდეთ, მაგრამ ყველაფერი ქართულ ჩარჩოებში უნდა ჯდებოდეს, ის სიწმინდეები არ უნდა დავივიწყოთ, რაც დიდმა ქართველებმა დაგვიტოვეს. ენა, მამული, სარწმუნოება ყოველთვის უნდა გვახსოვდეს. პატრიოტი იყავი და ახლებურად გააკეთებ ამას, თუ ძველებურად, მნიშვნელობა არ აქვს'', - განაცხადა რამაზ ნოზაძემ ტრადიციებზე საუბრისას.
- მომწონს ჩვენი ტრადიციები და ვარ კიდეც მათი მიმდევარი. ''ფირმიდან'' რომ ჩამოდიან, უკვირთ და აღფრთოვანებას ვერ მალავენ ჩვენი სუფრის ტრადიციების, თამადის გამო. ვფიქრობ, ამ ყველაფერმა მთელი ცხოვრება უნდა იარსებოს. სუფრას უნდა ჰყავდეს თამადა, უნდა ისმებოდეს სადღეგრძელოები. ჩემთვის ყველაზე განსაკუთრებული და საყვარელი არის სამი სადღეგრძელო: უფლის სადიდებელი, მშობლები და მიცვალებულები.
- დრომოჭმულად რომელი ტრადიცია მიგაჩნია?
- ცხოვრება იცვლება, ამიტომ ტრადიციებმაც ცვლილებები განიცადეს. დღეს შეხედულებებიც შეიცვალა, ადრე ქალი აუცილებლად სახლში უნდა ყოფილიყო, დღეს ასე აღარაა.
- ოჯახის შექმნის ტრადიციაც შეიცვალა, რას ფიქრობ წყვილის ქორწინებამდე თანაცხოვრებაზე?
- მოდი, ყველაფერს თავისი სახელი დავარქვათ, სიყვარული და ტრადიციები ერთმანეთისგან გავმიჯნოთ. ტრადიცია სიყვარული არ არის. როცა გიყვარს, რა
შუაშია ტრადიცია? ჩვენს ქვეყანაში ცდილობენ, ოჯახები ტრადიციების დაცვით შექმნან, მიუხედავად ამისა, დღევანდელ რეალობაში მაინც ქორწინებამდე თანაცხოვრებას ანიჭებენ უპირატესობას. მე ვერავის ვურჩევ, როგორ და რა გზით დაუკავშირონ ცხოვრება საყვარელ ადამიანს. შეიძლება, ტრადიციულად შექმნილი ოჯახი დაინგრეს, წინასწარი თანაცხოვრებით დაწყებულმა ურთიერთობამ კი მთელი ცხოვრება გაძლოს, ან პირიქით. ამის განსაზღვრა ძალიან ძნელია. სიყვარულში მესამე ადამიანი, დედა, მამა ან სხვა, არ უნდა ჩაერიოს. თუ წყვილი, მიუხედავად წინააღმდეგობისა, ერთად იქნება, ის ადამიანები, რომლებიც ეწინააღმდეგებოდნენ ამ გრძნობას, მტრად იქცევიან, გინდ დედა იყოს, გინდ მამა და გინდ – სხვა...
- რამაზ, ოჯახს უფროსი სჭირდება?
- დასაბამიდან მამაკაცია ოჯახის უფროსი, მაგრამ ის არ უნდა იყოს დესპოტი. რადგან კაცი ხარ, არ ნიშნავს იმას, რომ უფლება გაქვს, ოჯახის წევრები დაამცირო და რამე უბრძანო. თუ ოჯახში იდილია არ გექნება და შენი მეუღლე იმას არ გაითავისებს, რომ შენ უფროსი ხარ და შენი სიტყვა უფრო მაღლა დგას, ვიდრე მისი, გაჭირდება ურთიერთობა. ურთიერთგაგება თუ აქვს წყვილს, მაშინ ავტომატურად უფროსი ხარ და ავტომატურად შენი გეზი უჭირავს ოჯახს. დაოჯახების შემდეგ მე და ჩემი მეუღლე ერთად ვიღებთ გადაწყვეტილებებს, მაგრამ თუ მოხდა ისე, რომ მე გავაკეთე რაღაც, რომლის საქმის კურსში ცოლი არ ჩავაყენე, ამასაც გაგებით უნდა მოეკიდოს და ამის გამო უთანხმოება არ უნდა წარმოიშვას.
- როგორია შენთვის ნამდვილი ქართველი ქალი?
- დედაჩემი ჩემი კულტი და სალოცავია, ჩემი ცოლი ჩემი სიყვარული და ჩემი გულია. მგონი, ამომწურავი პასუხია ეს ჩემგან.
- გენდერული თანასწორობა ოჯახში...
- ეს ყველაფერი მარაზმამდე არ უნდა მივიდეს. ჩემი მეგობრები ჩამოვიდნენ კანადიდან და მომიყვნენ, თურმე კანადაში თუ ქალი განაცხადებს, რომ კაცი შეურაცხყოფას აყენებს, მამაკაცი დამნაშავე რომც არ იყოს, მიჰყავთ და ასამართლებენ. ეს აღარაა გენდერული თანასწორობა, ეს უკვე მატრიარქატია. კაციც ადამიანია და ქალიც. ეს ორი სქესი ერთმანეთისთვისაა შექმნილი, ერთმანეთს უნდა გავუგოთ და დავაფასოთ. ქრისტიანულადაც რომ განვიხილოთ ეს საკითხი, ასეა. ჩვენგან არიან ქალები შექმნილნი, ჩემი ნეკნისგანაა ჩემი ცოლი გამოძერწილი, თუნდაც ამიტომ ქალი ყოველთვის მამაკაცზე დაბლა იდგება, იმიტომ, რომ ჯერ კაცი იყო და მერე ქალი.
- ღალატი რატომ განისაზღვრება სქესის მიხედვით?
- კაცის ბუნებაა სხვანაირი. ქალი ოჯახის ხერხემალია, კაცი რომ წავიდეს და ქალს უღალატოს, შეიძლება, ისეთი დამამცირებელი არ იყოს, როგორც ქალის ღალატი, რაც ხერხემალში გადამტვრევის ტოლფასია. ოღონდ არ იფიქროთ, რომ კაცის ღალატს ვამართლებ, ეს კაცის მხრიდანაც ძალიან დიდი დანაშაულია, მაგრამ კაცის ღალატი იმდენად დამანგრეველი არაა, როგორც ქალის. ჩვენს ქვეყანაში ასეა და ''ფირმაში'' რა ხდება, არ ვიცი, შეიძლება, იქ მიღებულია ქალის ღალატიც. ქართველი კაცის ბუნება ისეა მოწყობილი, ''ფირმაშიც'' რომ მიდის, შეიძლება, უღალატოს ქალს, მაგრამ ქალს ეს არ ეკადრება, თუნდაც იმიტომ, რომ ქართველი ქალია, ქალი სიწმინდე, სიყვარულია, ამიტომაცაა მისი ღალატი დაუშვებელი. კაცისგანაც არაა ეს ლამაზი, მაგრამ შეიძლება, ასეც მოხდეს. თუ საყვარელი ქალი გაიგებს, რომ მას ღალატობ, ეს შენი დამცირებაცაა, ეს კაცისთვისაც მიუღებელი უნდა იყოს, მაგრამ ამის გამო ოჯახი არ უნდა დაინგრეს. ქალებმა უნდა გაუგონ თავის მამაკაცებს. თუ კაცი ერთხელ უღალატებს და მეტჯერ არ გაიმეორებს, აღარ შეურაცხყოფს ცოლს, ვფიქრობ, ცოლმა უნდა აპატიოს.
- ქალის პატიოსნებას როგორ განსაზღვრავ?
- მარიამ მაგდალინელი გახლდათ მეძავი. მას შემდეგ, რაც იესომ შეუნდო ცოდვები, ყველაზე დიდი წმინდანი გახდა. შეიძლება მოხდეს რაღაც, მაგრამ მერე ცხოვრება შეიცვალოს, ახალგაზრდობაში ადამიანი შეცდომას რომ დაუშვებს, იმის გამო რატომ უნდა დაიტანჯოს მთელი ცხოვრება?! ყველას აქვს უფლება, იცხოვროს, როგორც უნდა. ღმერთმა გვიბოძა სიცოცხლე და თავადვე უნდა განვსაზღვროთ, კარგები ვიქნებით თუ ცუდები.
- არატრადიციული ორიენტაციის ადამიანების მიმართ შენი დამოკიდებულება როგორია?
- ისევ დავუბრუნდები სულიერებას, ახალ აღთქმას, ღმერთისეულს და ისე გაგცემ პასუხს. ჩვენ ღმერთმა მოგვავლინა ამ ქვეყანაზე და მოგვცა თავისუფალი ნება, თავად მიგვეხედა ჩვენი ცხოვრებისთვის, თავად ჩაგვედინა ის ცოდვები, რომლებიც მოგვეკითხება შემდგომ. ვინ რას გააკეთებს და ვისთან ერთად იქნება, ჩემი განსახილველი და ჩემი პრობლემა არაა. უბრალოდ, ერთადერთი ისაა, რომ არ მომწონს გეიაღლუმები და ამ ყველაფრის რეკლამირება. შეიძლება, მქონდეს ურთიერთობა, ვმეგობრობდე არატრადიციული ორიენტაციის ადამიანთან, იყოს კარგი მეგობარი, მაგრამ საერთოდ არ კეთდებოდეს აქცენტი ამ საკითხზე.
წყარო: reitingi.ge
