აბესალომ ლორიას ორი პროფესია და საყვარელი ფილმი''არ იდარდო!''

კინომცოდნეები დაახლოებით 30-მდე ფილმს დაასახელებენ, რომლებშიც აბესალომ ლორიას მიუღია მონაწილეობა, სხვები გაცილებით ნაკლებს და უპირველესად გია დანელიას''არ იდარდო!'' ახსენდებათ. სინამდვილეში კი აბესალომ ლორია ასზე მეტ ფილმშია გადაღებული.''ქართული ფილმის'' გარდა, მას იწვევდნენ საკავშირო მასშტაბით წარმოებულ ფილმებში მონაწილეობის მისაღებად...

მსახიობის დედა, ქსენია კამკამიძე, ნაძალადევისა და ახალციხის თეატრების მსახიობი იყო, მამა, მამანტი ლორია, ტოპოგრაფი, ინჟინერ-მშენებელი გახლდათ. მუშაობდა საქართველოში და საზღვარგარეთ, მათ შორის ვიეტნამში. ცოლ-ქმარი თბილისში ნაძალადევის რაიონში ცხოვრობდა, შემდეგ ახალციხეში, ვინაიდან მსახიობი დიდ დროს ატარებდა თეატრში, მისი მეუღლე კი - მივლინებებში. მოგვიანებით კვლავ თბილისში დაბრუნდნენ და ვერაზე დასახლდნენ. აბესალომ ლორიამ საცხოვრებელის ხშირი ცვლის გამო რამდენიმე სკოლა გამოიცვალა. ბოლოს თბილისში ღამის სკოლა დაამთავრა. ცელქი და მტირალა ბავშვი ყოფილა. თავიდანვე გამოავლინა მუსიკალური ნიჭი და არაერთ ინსტრუმენტზე სმენით უკრავდა.

1943 წლის ერთ ღამეს ყველა მისი კლასელი და თვითონ ფრონტზე გაიპარნენ. თვრამეტი ბიჭიდან მხოლოდ ორი დაბრუნდა ცოცხალი - აბესალომ ლორია და მისი ერთ-ერთი მეგობარი. პარაშუტისტობა სურდა თურმე, მაგრამ არ გამოუვიდა. იმდენად გამხდარი იყო, გადმოხტომის დროს ქარმა წაიღო, თავის პარაშუტიანად ხეს გამოედო და მერე იქიდან ძლივს ჩამოხსნეს.
ომში გატარებულ პერიოდზე საუბარი არ უყვარდა. ორი ჭრილობა ჰქონდა - ერთი ნატყვიარი და მეორე აფეთქების დროს მიყენებული. პირველი დაჭრის შემდეგ ჰოსპიტალიდან რომ გამოწერეს, ფრონტზე ბრძოლა არ შეეძლო და ამიტომ მძღოლად დაიწყო მუშაობა. მეორედ ნამსხვრევით დაიჭრა, თავისი უფროსი მეუღლესთან ერთად სადღაც მიჰყავდა, გზად ყუმბარა ჩამოვარდა, მანქანა გადაბრუნდა, თუმცა, საბედნიეროდ, ყველა მგზავრი ცოცხალი გადარჩა.

აბესალომ ლორია პროფესიით ინჟინერი გახლდათ. მსახიობობა ყოველთვის სურდა, თუმცა მამამისის თხოვნით, საბუთები''გეპეიში'' შეიტანა. როგორც ჩანს, მამის დიდი რიდი ჰქონდა, სანამ ის ცოცხალი იყო, მისი თანდასწრებით სიგარეტიც კი არ მოუწევია. აბესა''გეპეის'' თეატრის სპექტაკლებში მონაწილეობდა, იყო ინსტიტუტთან არსებული ჯაზორკესტრის წამყვანი, კონფერანსიე, საკონცერტო პროგრამების ავტორი და აქტიური მონაწილე. მერე უკვე იყო პირველი როლები კინოში.''ორი მსახიობი'',''წარსული ზაფხული'',''განაჩენი'' - ერთი მეორის მიყოლებით გამოვიდა და აბესალომ ლორიას სამსახიობო დებიუტიც სწორედ აქედან დაიწყო.

გადაღებებზე დადიოდა ოდესაში, მოსკოვში, კიევში, ყაზახეთში, ინდურ ფილმშიც კი აქვს მონაწილეობა მიღებული, სწორედ აქედან გამომდინარე, საქართველოში აბესალომ ლორიას მონაწილეობით ძალიან ბევრი ფილმი არ უნახავთ. ყველაზე მეტად თავად გია დანელიას''არ იდარდო!'' ჰყვარებია და საზოგადოების დიდ ნაწილისთვისაც მსახიობი სწორედ ამ ფილმთან ასოცირდება.

`არ იდარდო!'' საკავშირო ეკრანზე 1969 წელს უჩვენეს. რეზო გაბრიძის სცენარის მიხედვით შექმნილი მხატვრული ფილმის დამდგმელი მხატვარი დიმიტრი თაყაიშვილია, ხოლო მუსიკის ავტორი - გია ყანჩელი. რეჟისორმა გადასაღებ მოედანზე ცნობილი მსახიობები შეკრიბა: სერგო ზაქარიაძე, ბუბა კიკაბიძე, სოფიკო ჭიაურელი, ანასტასია ვერტინსკაია, გოგი ქავთარაძე, იპოლიტე ხვიჩია, დოდო აბაშიძე, მათ შორის იყო აბესალომ ლორიაც.

ქვეყნის გარე გადაღებების გამო, საბჭოთა კავშირის მაშინდელ არაერთ მსახიობთან მეგობრული ურთიერთობა აკავშირებდა და კარგად იცნობდა ევგენი ლეონოვს, არმენ ჯიგარხანიანს, ევგენი მორგუნოვს, გიორგი ვიცინს. ერთხელ მორგუნოვი და ვიცინი თბილისში ჩამოსულან. აბესალომ ლორიასთან ერთად საბურთალოს ბაზარში პროდუქტების საყიდლად შესულან. მორგუნოვს ჯონჯოლი ჰყვარებია და სადაც კი დაინახავდა,''სინჯავდა''. აბესა მას უკან მისდევდა და თითოეულ გამყიდველს, რომლის დახლთანაც რუსი მსახიობი ჯონჯოლს შეექცეოდა, ხელში ფულს უდებდა.

მეუღლე, ნელი ახობაძე, სუფრასთან გაიცნო. მაშინ 33 წლის იყო, ქალი - 27-ის. ნელი ახობაძე პროფესიით ფარმაცევტი, ექსპერტ-ქიმიკოსი გახლდათ. წყვილს ექვსწლიანი შუალედით ორი შვილი შეეძინა. მამუკა და რუსუდან ლორია მსახიობები გახდნენ.
მამა შვილების პროფესიულ არჩევანში არ ჩარეულა, არც ვინმე შეუწუხებია მათ გამო. იცოდა თქმა:''ნე პალოჟენა'',''ნელზია'',''ნე კრასივო'' და ამით უკვე ყველაფერი იყო ნათქვამი... უკვე შემდგარი მსახიობი შვილების სპექტაკლებს თითქმის ყოველთვის ესწრებოდა და პრემიერების შემდეგ, პარტერში მჯდომი, თვალიდან ჩამოგორებულ ცრემლებს მალულად იწმენდდა.

შინ მშვიდი იყო, ხშირად ხუმრობდა და უყვარდა სტუმარი. ბევრი გურულისთვის დამახასიათებელი ფეთქებადი ხასიათი ჰქონდა, მაგრამ მალევე ავიწყდებოდა მომხდარი. ერთხელ მორიგ გადაღებებზე იმყოფებოდა, სახლში დარეკა, ცოლ-შვილს''უბრძანა'', პურმარილი, გოგონებოო და სულ მალე მისი სახლი''ვერის უბნის მელოდიებში'' მონაწილე მსახიობებით გაივსო. მაშინ ფილმის ერთ-ერთ ეპიზოდს ვერაზე იღებდნენ, ამინდის გამო გადაღებები დროებით შეწყდა და მთელი ავტობუსი მსახიობები მიაყენა თავისი სახლის კარს.

მნიშვნელოვანი ისაა, რომ იმავდროულად აბესალომ ლორია წლების განმავლობაში საქართველოს სახელმწიფო საპროექტო ინსტიტუტის მთავარი ინჟინერი გახლდათ. ბევრი ობიექტი აქვს დაპროექტებული: პურის ქარხნები, კომბინატები, ფოთის პორტიც კი.
ქვეყნის გარეთ გადაღებებზე რომ მიდიოდა, შვებულებას სწორედ იმ დღეებზე ანაწილებდა. ერთხელ დირექტორი მივლინებაში იყო წასული, მის მოვალეობას აბესალომ ლორია ასრულებდა. სწორედ იმ დროს გადაღებები დაუნიშნეს. გამოსავალი თავადვე მონახა: აბესა დაჯდა მაგიდის ერთ მხარეს, დაწერა განცხადება, როგორც მთავარმა ინჟინერმა:''საქსახპროექტის დირექტორის მოადგილეს, ბატონ აბესალომ ლორიას. გთხოვთ, ორი კვირით გამიშვათ უხელფასო შვებულებაში, - აბესალომ ლორია''. მერე ადგა, დირექტორის სკამზე გადაჯდა და რეზოლუცია დაადო:''დააკმაყოფილეთ! აბესალომ ლორია'', - მოაწერა ხელი და გადაღებებზე წავიდა.

ბოლოს მსახიობმა იმუშავა გოდერძი ჩოხელთან''სამოთხის გვრიტებზე'' და გუგული მგელაძესთან ფილმზე ''გაჭედილები''. ''გვრიტებზე'' მუშაობის დროს უკვე 77 წლის იყო და ფილმში მთის სოფლის მცხოვრები, ერთ-ერთი წერა-კითხვის უცოდინარი ხანდაზმული კაცის როლი შეასრულა. გივი ბერიკაშვილმა, კახი კავსაძემ, გოვენ ჭეიშვილმა, ნინო ჩხეიძემ და კომედიაში მონაწილე სხვა არაერთმა მსახიობმა დაუვიწყარი სახეები შექმნეს მწერლისა და რეჟისორის გოდერძი ჩოხელის 1997 წელს ეკრანებზე გამოსულ ფილმში.

აბესალომ ლორია სიცოცხლის ბოლო ათი თვე სუსტად იყო და დიდ დროს სახლში ატარებდა. მისთვის ამქვეყნად უკანასკნელი დღე 2001 წლის 27 იანვარი აღმოჩნდა...
წყარო: reitingi.ge