ცნობილები მარიხუანაზე ''ჩვენი მშობლების თაობამ საკმარისად არ გაანძრია ტრაკი...''

უკვე ოთხი წელია, რაც საქართველოში მარიხუანის დეკრიმინალიზაციის მოთხოვნით 2 ივნისს აქციები იმართება. წელს აქციამ განსაკუთრებულად ხმაურიანად ჩაიარა და ამ თემას ტელეგადაცემაც მიეძღვნა. ფაქტია, რომ მოსახლეობის დიდი ნაწილი დღესაც ვერ არკვევს, რა განსხვავებაა ლეგალიზაციასა და დეკრიმინალიზაციას შორის, ამაზე ხშირად ორგანიზატორებიც წუწუნებენ. დეკრიმინალიზაციის შემთხვევაში მარიხუანის მოწევის გამო ციხეში არავის აღარ ჩასვამენ, ლეგალიზაციის შემთხვევაში - თავისუფლად გაიყიდება.

ამ ეტაპზე აქციები მხოლოდ ერთი მოთხოვნით იმართება, რომ მოხმარების გამო ციხეში არავინ ჩასვან, კანონპროექტი პარლამენტში უკვე შევიდა და მისი ინიციატორი პარლამენტარი გოგა ხაჩიძეა. ჯერჯერობით კანონი არ განუხილავთ. საპარლამენტო უმცირესობის წარმომადგენლები ტელევიზიების წინ მხარს უჭერენ დეკრიმინალიზაციას, მათ შორისაა საპარლამენტო უმრავლესობის რამდენიმე წევრიც.  ჩვენ ცნობილი სახეების მოსაზრებებით დავინტერესდით ამ თემაზე.

მიშა ბაღათურია (წყალბურთელი):

- ლეგალიზებას არ ვეთანხმები, მაგრამ მარიხუანის მოხმარებისთვის ადამიანებს არ უნდა იჭერდნენ. მე პირადად არ ვარ მომხმარებელი, მაგრამ ევროპაში ამის გამო არ იჭერენ. ჩემ გარშემოც ხშირად დაუჭერიათ იმისთვის, რომ მარიხუანას მოიხმარდნენ და ამის გამო შვიდი წლით ციხეში ჩასმა არ შეიძლება.
ამისთვის მკვლელობასთან მიახლოებული სასჯელი დანაშაულია. იმას არ ვამბობ, რომ ყველა უნდა ეწეოდეს, მაგრამ ვისაც მოწევა უნდა, ის წავა, აფთიაქში რაღაცებს იყიდის, გაიკეთებს და უარესად მოიქცევა.

თიკო სადუნიშვილი (ტელეწამყვანი):

- ამ აქციას არავითარი დაფინანსება არ აქვს და ფართოდ ვერ მოვიცავთ ყველაფერს. ჩვენ იქ იმიტომ არ ვდგავართ, რომ ნება მოგვცენ, ქუჩაში მოვწიოთ მარიხუანა. უბრალოდ ვითხოვთ, გაათავისუფლონ უამრავი ადამიანი, რომლებიც წლებია, მოხმარებისთვის სასჯელს იხდიან. საზოგადოებამ უნდა გამიჯნოს კრიმინალი მარიხუანის მომხმარებლისგან. ჩვენ არ ვითხოვთ ლეგალიზაციას. სიგარეტს, რომელსაც ''მოწევა კლავს'' აწერია, მაინც ყიდულობს ხალხი და არ შეიძლება, 4 წელი მოგისაჯონ მარიხუანის მოწევის გამო.
ხალხი ბიონარკოტიკს იმიტომ ეწევა, რომ ჭორად დადის, ნარკოლოგიურში ანალიზებში არ ჩანსო, ამიტომ, რომ არ წაიყვანონ ნარკოლოგიურში, მარიხუანა ბიოთი ჩაანაცვლეს.



-  როგორ ფიქრობ, მოხდება მარიხუანის დეკრიმინალიზაცია?
- აუცილებლად. პარლამენტში ამ კანონპროექტის ინიციატორი იყო გოგა ხაჩიძე და არ ვიცი, ეს ალბათ უმრავლესობას ხელს შეუშლის, რომ გულიანად განიხილონ. ალბათ, მათიანი რომ ყოფილიყო ინიციატორი, უფრო სხვანაირად მიუდგებოდნენ. აქცია უკვე ოთხი წელია იმართება, უფრო მეტი ხალხი მოდის და ეს კიდევ მეტ სტიმულს გვაძლევს, რომ მიზანს მივაღწევთ.

- აქციაზე ცნობილი სახეებიდან ერთი და იგივე ადამიანები დადიან. სხვები მოსვლას ხომ არ ერიდებიან?
- ასეთი ძალიან ბევრია, რცხვენიათ აღიარება. ამბობენ, მოვალთო, მაგრამ ჩემი ბევრი მეგობარიც არ მოვიდა გუშინდელ აქციაზე. ან ეთაკილებათ, ან ეშინიათ, არ ვიცი, ალბათ რაღაცის გამო იქცევიან ასე და აქციას არ ესწრებიან. ყველა ის ადამიანი, ვინც ერთხელ მაინც ყოფილა ნასამართლევი მარიხუანის გამო, ვინც ხანდახან მაინც ეწევა მარიხუანას ან უბრალოდ მოსწონს, ან მიაჩნია, რომ ჩვენს ქვეყანაში აუცილებლად უნდა
იყოს დეკრიმინალიზებული და არ მოვიდა აქციაზე, თვითონ აღიარებს, რომ კრიმინალია.

თინა მახარაძე (მსახიობი):

- დაჭერა მარიხუანის მოწევის გამო არაადამიანურია, ერთსაც ვიტყვი, ვინც იჭერს, იმასაც ძალიან მოსწონს მოწევა. უცოდინრობაა, როცა ამბობენ, მარიხუანა იგივე ნარკოტიკიაო, რადგან რიგ შემთხვევებში სამკურნალოდაც გამოიყენება. არ არსებობს არც ერთი შემთხვევა, რომელიც მარიხუანის მოხმარების შემდეგ მსხვერპლით დასრულდა, ალკოჰოლის მიღებისგან განსხვავებით. დაჭერა გაუმართლებელია და დეკრიმინალიზაცია ერთ-ერთი გზაა, რომ ამას ეშველოს. მე საერთოდ ლეგალიზაციის მომხრე ვარ, მაგრამ ეს შორეული პერსპექტივაა.

- შენ გარშემო ხშირად დაუჭერიათ მარიხუანის გამო?
- დიახ, ჩემი რეჟისორი მეგობარი, რომელიც ძალიან კარგი ადამიანია და შეუძლია, ქვეყნისთვის ბევრი სასარგებლო რამ გააკეთოს, შვიდ წელს იხდის მარიხუანის პირადი მოხ-მარებისა და შენახვის გამო. ამ დროს საზოგადოებისთვის საშიში ტიპები გარეთ დადიან და ჩემს მეგობარს, რომლისაც რაღაც არ მოსწონთ, სცემენ.

- გოგონებსაც იჭერენ, ამის შესახებ თუ გაგიგია?
- კი, ერთი ასეთი შემთხვევა მახსენდება. ძალიან ბევრი ფული გადაახდევინეს და გამოუშვეს.

- არ გეშინოდათ აქციის მონაწილეებს, რომ შესამოწმებლად წაეყვანეთ?
- ცოტნე დადიანის ეპოქა ხომ არ არის, რომ თაფლი წავისვათ და როგორც ისინი იტანჯებიან, ჩვენც ისე დავიტანჯოთ. ყველას ერთი პრობლემა და მიზანი უნდა გვაერთიანებდეს. ყველაზე მშვიდობიანი აქცია იყო. კარგი მუსიკით, ენერგეტიკით. სახლში ბეგონიას ვზრდი და მაგის გამო როგორ შეიძლება დამიჭირონ.

- ზოგიერთი მონაწილე აქციაზე პატარა ბავშვებით მივიდა, რამაც სოციალურ ქსელში საზოგადოების ნაწილის გაღიზიანება გამოიწვია.
- სამწუხაროდ, სამსახურიდან წავედი და ვერ მოვასწარი, თორემ ჩემს დისშვილებსაც წავიყვანდი. შვილი ჯერჯერობით არ მინდა, მაგრამ რომ მეყოლება, ყველა აქციაზე წავიყვან, რომელიც კეთილ მიზანს ემსახურება, ბავშვობიდან უნდა მიეჩვიოს, რა არის კარგი და რა - ცუდი. ჩვენი მშობლების თაობამ საკმარისად არ გაანძრია ტრაკი, იმიტომ ვართ დღეს ცუდ დღეში და ჩვენ უნდა ვიბრძოლოთ, რომ ჩვენმა შვილებმა უკეთეს ქვეყანაში იცხოვრონ.