GEM fest-ზე დასასწრები მულტიპასების ფასი გაიზარდა

ქართული ელექტრონული მუსიკალური ფესტივალზე ანაკლიაში 30 ივლისიდან 7 აგვისტომდე საფესტივალო შეგრძნებებითა და დიდი შთაბეჭდილებებით დაიტვირთებით.

ორშაბათს, 29 ივნისს, როდესაც მონაწილეთა მესამე ნაწილს გამოაცხადებენ, გვპირდებიან, რომ ანაკლიის ზღვისპირეთში გამგზავრების კიდევ უფრო დაუოკებელ სურვილს ვიგრძნობთ, მანამდე კი 15 ივნისიდან 26 ივნისამდე ფესტივალის ტერიტორიაზე მრავალჯერადად შესასვლელი ბარათი, ანუ მულტი-პასი ექსკლუზიურ ფასად, 99 ლარად, 1000 ცალი გაიყიდა. 26 ივნისიდან მულტი-პასის ფასი შეიცვალა და 150 ლარამდე გაიზარდა. ეს ღირებულება მხოლოდ 20 ივლისამდე დარჩება. ფესტივალამდე 10 დღით ადრე კი მულტი-პასის ფასი კვლავ შეიცვლება. ბილეთების შეძენა შეგიძლიათ
საიტზე eventer.ge.

ახლა ორიოდ სიტყვა მონაწილეთა შესახებ - ელექტრონული მუსიკის მსმენელებს დიდხანს არ სჯეროდათ, რომ ტრანსის ერთ-ერთი ყველაზე ცნობილი წარმომადგენელი, არმინ ვან ბიურენი ანაკლიის ფესტივალის ერთ-ერთი მთავარი ჰედლაინერია და ზოგს დასარწმუნებლად არმინის მიერ გამოქვეყნებული მიმართვის დაკვირვებით ნახვაც კი დასჭირდა, სადაც ცნობილი დიჯეი თავად ამბობს, რომ 31 ივლისს GEM fest-ზე დაუკრავს. მასთან ერთად ანაკლიაში რამდენიმე სცენას ამ სფეროს არანაკლებ ცნობილი წარმომადგენლებიც დაიკავებენ - Dubfire, Booka Shade, David August, M.A.N.D.Y და სხვა. შეგახსენებთ, რომ ლაინ-აფი ჯერ სრულად არ არის წარმოდგენილი. დეტალების დასაზუსტებლად შეგიძლიათ ეწვიოთ საიტს
წყარო: gem-fest.com.