საზღვარგარეთ მოღვაწე 10 წარმატებული ქართველი ქალების რეიტინგი

საქართველოდან უცხოეთში, განსაკუთრებით ბოლო წლებში, ძალიან ბევრი ადამიანი წავიდა. მათი უმრავლესობა ქალია. ზოგი ჩაიკარგა უცხო სივრცეში, ზოგი ცუდ გზასაც დაადგა, ვიღაც დღესაც მუხლჩაუხრელად შრომობს საკუთარი ოჯახის გამოსაკვებად, სხვამ გარკვეული საშუალებები მოძებნა თვითრეალიზაციისთვის და, ასე თუ ისე, საზღვრებს გარეთაც შეძლო წარმატების მოპოვება.

მათი ჩამოთვლა შორს წაგვიყვანს - საბედნიეროდ, საზღვარგარეთ მოღვაწე წარმატებული ქართველების სია არც ისე მცირეა, არც სფეროებია შეზღუდული - მედიცინა, მეცნიერება, სპორტი, მუსიკა... ამჯერად გადავწყვიტეთ, გადაგვეხედა ამ ადამიანებისთვის და მათ შორის ყველაზე პოპულარულები გამოგვერჩია.

ისინი, ვისზეც საქართველოში ყველაზე ხშირად წერენ, ვინც სამშობლოში ყველაზე მეტად უყვართ ან აინტერესებთ. და ასევე ისინი, ვინც შეიძლება, საქართველოში არ არის პოპულარობის პიკზე, თუმცა საზღვარგარეთ მათზე ბევრი რამ იციან და მათი უცხოური პოპულარობის ხარისხი უფრო მაღალია.

მაშ ასე, იმის გამო, რომ ზოგადად შოუბიზნესის სფერო გაცილებით მეტად უწყობს ხელს ადამიანის გავარსკვლავებას, ცნობადი სახეებიც, რასაკვირველია, უფრო ამ სფეროში არიან. არავის გაუკვირდება, თუ ვიტყვით, საქართველოში ამჟამად ყველაზე პოპულარული,

უცხოეთში მოღვაწე ქართველ ქალებს შორის, ქეთა თოფურიაა. ქეთა ის ადამიანია, რომელიც ახერხებს, გამუდმებით მის ირგვლივ იტრიალოს რუსულმა თუ ქართულმა მედიამ და ყოველთვის პოპულარობის პიკზე იყოს. მისი გემოვნება, სტილი, ქმედებები, პირადი ცხოვრება, საკონცერტო გამოსვლები - ხალხს ყველაფერი აინტერესებს მასზე და იგებს კიდეც. ერთადერთი, რაც ყველასგან გულმოდგინედ დამალა, ორსულობა იყო და მოულოდნელად დიდი მუცლით მისმა გამოჩენამ იმხელა აჟიოტაჟი გამოიწვია, საქართველოსა და რუსეთში ბევრი მნიშვნელოვანი მოვლენა დაჩრდილა.

საბერძნეთში და ახლა უკვე საქართველოშიც ყველა იცნობს თამთა გოდუაძეს, რომელსაც არც მანამდე აკლდა პოპულარობა, თუმცა''X-ფაქტორის'' ჟიურიში მისმა გამოჩენამ მისი ცნობადობის ხარისხი საქართველოში გააათმაგა. თამთა 15 წლისა წავიდა საქართველოდან საბერძნეთში და იქ მეგავარსკვლავად იქცა.



გარკვეული წლების შემდეგ ბერძნების საყვარელმა მომღერალმა თამთამ საქართველოსკენაც გამოიხედა და კარგი გარეგნობით, უშუალო და მხიარული ხასიათით, ფერადი და ხალისიანი სტილით ბევრი თანამემამულის გული დაიპყრო.

რასაკვირველია, ქეთი მელუა ამ სიის აუცილებელი წევრია. მიუხედავად იმისა, რომ ქეთი საზღვარგარეთ ერთ-ერთი ყველაზე ცნობილი ქართველია და ბრიტანეთის ყველაზე წარმატებულ და მდიდარ მუსიკოსთა რეიტინგებშიც გამუდმებით ხვდება, მოკრძალებული ცხოვრების წესის გამო ისე ხშირად არ ჩნდება მედიაში, ამიტომ პრესაში გამოჩენისა და ცნობადობის ხარისხით მხოლოდ რეიტინგის მასზე წინ მდგომ წევრებს ჩამოუვარდება.

ჰოლივუდში თანდათან სულ უფრო მეტ წარმატებას აღწევს ელენე სხირტლაძე - მათებურად ელენე სატინი. მას რამდენიმე სერიოზული როლი აქვს შესრულებული ცნობილ ამერიკულ სერიალებში და ასევე ეპიზოდური როლები მსხვილბიუჯეტიან სურათებში. ცოტა ხნის წინ ერთ-ერთ ყველაზე სექსუალურ ტელევარსკვლავადაც დაასახელეს.

ყველაზე მეტი წარმატებული ქართველი ალბათ ოპერის მომღერლებს შორის გვყავს. საზღვარგარეთ მათ იცნობენ და დიდ პატივს სცემენ, ისევე, როგორც საქართველოში. თუმცა ნინო სურგულაძეს მაინც უფრო იცნობს საზოგადოება იმის გამო, რომ მისი პოპულარობა ბავშვობიდან დაიწყო - კინოროლებით, რომლებმაც სახელი გაუთქვა.



საზღვარგარეთ მოღვაწე ცნობილ ქართველ ქალბატონებს შორის ამჯერად ნინო სუგულაძეზე შევაჩერეთ არჩევანი.

თინა კანდელაკი

ასევე რუსეთში მოღვაწე და ძალიან სკანდალური ფიგურაა. ეს არის ადამიანი, რომელიც ყოველთვის ახერხებს აქტუალურობის, და პოპულარობის შენარჩუნებას. ეს პოპულარობა ხან დადებითია, ხან - უარყოფითი, თუმცა მისთვის ამას მნიშვნელობა არ აქვს.


მთავარია, რომ მასზე სულ ლაპარაკობენ და ამ ცნობადობას მისთვის სერიოზული დივიდენდები მოაქვს - ფინანსური წარმატება, ტელევარსკვლავობა, პოლიტიკური გავლენაც კი.


ლიზა ბათიაშვილს საქართველოში არც ისე ბევრი იცნობს, თუმცა ის მსოფლიო მასშტაბის მევიოლინეა და საზღვარგარეთ მუსიკალურ ელიტაში ნამდვილი ვარსკვლავია.

ელენე გლურჯიძე ქართველი ბალერინაა, რომელმაც, ნინო ანანიაშვილის შემდეგ, ერთ-ერთმა პირველმა აალაპარაკა ფართო საზოგადოება ქართული ბალეტის შესახებ. ელენე თვით ლაგერფელდის მუზა აღმოჩნდა და ამან თავის დროზე მის პოპულარობაზე მნიშვნელოვნად იმოქმედა.

ხატია ბუნიათიშვილი ასევე კლასიკური მუსიკის სფეროდანაა. ბევრ ცნობილ ქართველ პიანისტს შორის ის ერთ-ერთია, რომელსაც კარგად იცნობენ როგორც საქართველოში, ისე საზღვრებს გარეთ.



სამშობლოში მის ცნობადობას მიხეილ სააკაშვილთან მეგობრობამ და სხვადასხვა შოუში მონაწილეობამ, ასევე თამამმა ჩაცმულობამ შეუწყო ხელი.

სოფო შევარდნაძე ასევე ტელევიზიის სფეროში მოღვაწეობს და ისიც რუსული ბომონდის აქტიური წევრია.



რასაკვირველია, მისი შემოქმედება და პირადი ცხოვრება ასევე ძალიან აინტერესებს საზოგადოებას საქართველოსა და რუსეთში, პირველ რიგში იმიტომ, რომ ედუარდ შევარდნაძის შვილიშვილია და ასევე იმიტომ, რომ აქტიური ადამიანია. ორივე ქვეყანაში მონაწილეობდა სხვადასხვა გახმაურებულ შოუში და პირად ცხოვრებაშიც აქვს ხოლმე ''გამონათებები'', რითაც ყვითელ პრესას განსაკუთრებულად იზიდავს.