"ჩემს ენაზე მოლაპარაკე" ადამიანი გიორგის სახით აღმოვაჩინე" - როგორ იპოვეს ერთმანეთი თათული ედიშერაშვილმა და გიორგი გასვიანმა

"როცა რეპეტიციაზეა, მშვიდად ვარ..."
მსახიობები არიან, პარტნიორებიც და დღეს ერთსა და იმავე სცენაზე უწევთ თამაში. ახმეტელის თეატრში, სპექტაკლში - "რომეო და ჯულიეტა" მათმა ბოლო ნამუშევარმა მაყურებლის ყურადღება ნამდვილად მიიქცია. გიორგი გასვიანს ლორენცოს როლი ერგო, თათული ედიშერაშვილს - ჯულიეტას ძიძის. მოცემულ ამოცანას თავი წარმატებით გაართვეს.

გიორგი გასვიანი:
- ახმეტელის თეატრში ერთი-ორი თვით ადრე მოვედი, ვიდრე თათული შემოგვიერთდებოდა ანუ როგორც იტყვიან, დავასწარი (იცინის)... ერთ მშვენიერ დღეს კი სამხატვრო ხელმძღვანელის კაბინეტში თათულიც შემოვიდა და სწორედ მაშინ გავიცანი. შემდეგ რეპეტიციებზე კარგად "შევათვალიერეთ" ერთმანეთი. მერე ისე მოხდა, რომ ყოველი რეპეტიციის შემდეგ, შესვენებაზეც ერთად გავდიოდით, ძალიან დავახლოვდით, შემიყვარდა და დავმეგობრდით. დღეს თეატრში მის გარეშე ერთი დღეც ვერ წარმომიდგენია.
თათული:
- ერთხელ ვუთხარი კიდეც და ცოტა არ იყოს, უტაქტოდ გამომივიდა: როცა აქ ვერ გხედავ, სიცარიელეა-მეთქი და გიორგისგან საშინელი პასუხი მივიღე (იღიმის)... თეატრში რომ მოვედი, ჩემთვის ჯერ კიდევ უცხო გარემოში ყველას ჩასაფრებულივით ვამოწმებდი, ვფრთხილობდი. მინდოდა, თანამშრომლებზე ნორმალური შთაბეჭდილება მომეხდინა და ბუნებრივია, ასეთ დროს გარკვეულწილად, ყველანი ვიპრანჭებით... მერე "ჩემს ენაზე მოლაპარაკე" ადამიანი გიორგი გასვიანის სახით აღმოვაჩინე. რიგ საკითხებზე ერთნაირი შეხედულება გვაქვს, მაგრამ ზოგჯერ ბუნებრივია, ვკამათობთ კიდეც, მაგრამ ეს კამათი არანაირად წყენამდე არ მიდის. მიხარია, რომ გიორგი გასვიანის სახით კარგი მეგობარი შევიძინე. ჩემთვის საინტერესოა მასთან ურთიერთობა როგორც სცენაზე, ისე - სცენის მიღმა. ბევრი საერთო მეგობარი აღმოგვაჩნდა, სხვადასხვა ადგილას მოგვიხდა შეხვედრა და მივხვდი, რომ თეატრის მიღმაც კომფორტული ადამიანია.
- გიორგი ასტროლოგიით არის გატაცებული. ამ მიმართულებით გარკვეულ რჩევებს თუ გაძლევს ხოლმე?
- ასტროლოგიაში აბსოლუტურად ვერ ვერკვევი. რაღაცებს რომ მეუბნება, თავს ვუქნევ, სინამდვილეში კი ვერც ვხდები, რას ამბობს (იღიმის)...
გიორგი:
- ადამიანების პაროდიებს ვაკეთებ ხოლმე, მაგრამ თათულის გაცნობის შემდეგ მისი პაროდია ვეღარ გავაკეთე - ეს იშვიათი შემთხვევაა...
თათული:
- გიორგი პირველად ვნახე, "აწკეპილი", წვერიანი ბიჭი იყო, რაღაცნაირი ვარცხნილობით... როცა კარგად გავიცანი, მერე მივხვდი, რომ ძალიან ბავშვური და გულჩვილია, გარეგნობის მიხედვით კი მასზე სულ სხვანაირი შთაბეჭდილება გექმნება...
გიორგი:
- თათული ედიშერაშვილთან მუშაობა დიდი სიამოვნებაა და ამავდროულად, არის გარკვეული პრაქტიკაც. სცენაზე მისი ყურება, თუნდაც - რეპეტიციების დროს ძალიან საინტერესოა.
- ვნახე თქვენი ბოლო ნამუშევარი - "რომეო და ჯულიეტა". გამოგიტყდებით ჩასაფრებული ვიყავი: სცენაზე, ძიძის როლში ვეძებდი "თამარ ღლონტს", მაგრამ ასე არ მოხდა, სულ სხვანაირი თათული აღმოვაჩინე.
თათული:
- როგორც მსახიობს, მუდმივად მაქვს შიში, რომ ჩემ მიერ შექნილი ტელეპერსონაჟი სცენაზე არ გამოჩნდეს. რთულია გაექცე იმ გმირს, რომელსაც წლების განმავლობაში ასახიერებ, ახლა კი თქვენ შემაგულიანეთ და გამახარეთ. ეს იმას ნიშნავს, რომ შემიძლია, სცენაზე უფრო თამამად ვიმოქმედო და ჩემი შინაგანი მოთხოვნილებები განვახორციელო.
- სპექტაკლი "რომეო და ჯულიეტა" უცხოეთშიც და საქართველოშიც არაერთხელ დადგმულა, მაგრამ ახმეტელის თეატრში სულ სხვანაიარი წარმოდგენა გვიჩვენეთ; ლორენცო და ძიძაც სხვა კუთხით დაგვანახვეთ...
თათული:
- ძიძასა და ლორენცოს უნდა გადაეწყვიტათ სხვა ადამიანების ურთიერთობა, მათი ბედი და არ ვიცი, ჩვენ ისეთი

რა ფორმა უნდა მოგვეძებნა, რომ თავი აგვერიდებინა მაყურებლის მძაფრი რეაქციისთვის... ისე, ჩემთვის წარმატებაა, როდესაც მეორეხარისხოვანი როლისთვის გაკრიტიკებენ ან გაქებენ. აბსოლუტურად ყველას აქვს უფლება თქვას ის, რასაც ფიქრობს...
გიორგი:
- თავიდანვე ჩაფიქრებული იყო, რომ სპექტაკლი აგებულიყო არა ორი გვარის დაპირისპირებასა და მტრობაზე, არამედ აქცენტები სხვა რამეზე უნდა გაკეთებულიყო. არ ვიცი, ლორენცო და ძიძა განგებ აკეთებენ ყველაფერს თუ შემთხვევით გამოუვიდათ ბოროტება, მაგრამ ვფიქრობ, ეს ყველაფერი იმიტომ მოხდა, რომ თავად არარეალიზებულები იყვნენ. როგორც ჩანს, ვერ დაიკმაყოფილეს ცხოვრებისეული მოთხოვნილებები და საშიშები გახდნენ საზოგადოებისთვის, განსაკუთრებით კი რომეო და ჯულიეტასთვის...
თათული:
- შექსპირის პიესები საოცარი ფანტაზიის განვითარების საშუალებას იძლევა.
- გიორგი, როცა თათული გაიცანი, ის უკვე პოპულარული მსახიობი იყო...
გიორგი:
- "შუა ქალაქში" ყოველთვის მომწონდა და ამ სერიალის პერსონაჟებიდან განსაკუთრებულად, დები ღლონტები მიზიდავდა. სულ ვფიქრობდი, ნეტავ, ეს მსახიობები სინამდვილეში როგორები არიან-მეთქი? თან, თათული გასართობ შოუშიც არსად მინახავს. საკუთარი პირადი ცხოვრების გამომზეურებითაც არავინ "შეუწუხებია". ვფიქრობ, ასეც უნდა იყოს: ყველაფრის გასაჯაროება შესაძლოა, ცუდი არ არის, მაგრამ არც სახარბიელო საქმეა.


- სხვათა შორის, ჟურნალისტებშიც მოუხელთებელი რესპონდენტის სახელი აქვს...
თათული:
- სიმართლე გითხრათ, არ მომწონს ჟურნალის გარეკანზე მუდმივად საკუთარი ფოტოს ხილვა. არავის განვიკითხავ, ყველას თავისი ცხოვრების წესი აქვს, მაგრამ პირდად მე, მირჩევნია, პრესის ფურცლებზე მაშინ გამოვჩნდე, როცა მკითხველისთვის სათქმელი მექნება და არ ვისაუბრო იმაზე, თუ როგორ ვამზადებ ფაფას შვილებისთვის. კარგი, ერთხელ შესაძლოა, ამითაც დაინტერესდეს ვინმე, მაგრამ ყველგან ერთი და იმავე თემაზე საუბარი მგონი, საინტერესო არავისთვის იქნება. თანაც, არაერთხელ უწყენინებიათ ჟურნალიტებს ჩემთვის, რადგან ყოფილა შემთხვევა, როცა `დიქტოფონს მიღმა~ საუბარიც გამოუქვეყნებიათ...
- თამარ ღლონტზე რას გვეტყვი?
- თამარი ერთი პროვინციელი ქალია, რომელიც მუდმივად საკუთარი თავის დამკვიდრებას ცდილობს და არცთუ ისე კარგი თვისებებით გამოირჩევა, მაგრამ ამას ისე აკეთებს, რომ მაყურებელში აგრესიას კი არა, ღიმილს იწვევს. რთულია განასახიერო ასეთი პერსონაჟი ისე, რომ მისი თავი მაყურებელს შეაყვარო. ეს ერთგვარი ბეწვის ხიდია, მაგრამ ამის გაკეთებაში იუმორის ჟანრი _ სიტკომი გეხმარება. თუმცა, რას როგორ ვაკეთებ, მართლა არ ვიცი (იღიმის)...
გიორგი:
- თათული ამ ჟანრის გენიოსია... მგონია, რომ სცენარისტებს თავად დაეხმარა ასეთი საუცხოო პერსონაჟის შექმნაში... თამარისგან განსხვავებით, თათული ძალიან თანამედროვე და საყვარელი ქალბატონია. ის ნამდვილი მეგობარი, სწორად მოაზროვნე ადამიანი, კარგი მსახიობი და კარგი დედაა. ძალიან მშრომელია, სულ გადაღებები და რეპეტიციები აქვს.
თათული:
- გიორგის მეც დავახასიათებ: საყვარელი ბიჭია, რომელმაც ისიც თავისი საქმე. ალბათ იცით, რომ ერთ-ერთ რადიოშიც მუშაობს და მსმენელები შეყვარებული არიან მასზე. გამორჩეული ხმის ტემბრი აქვს, ნიჭიერი კაცია... ახლა პირველად ვიტყვი იმას, რასაც ვფიქრობ: როდესაც დავგმეგობრდით და ერთმანეთს გული გადავუშალეთ, მასში სრულიად სხვა ადამიანი დავინახე. უნდა იცოდეთ, როგორ უვლის დედას, ბებიას...
გიორგი:
- მაკვირდები (იცინის)?
თათული:
- ყველა ახლობელ ადამიანს ვაკვირდები... მნიშვნელოვანია ისიც, რომ ყველაფერზე, რასაც აკეთებს, ხმამაღლა ლაპარაკობს. მისგან განსხვავებით, ბევრი ამას მალავს, იპრანჭება, გიორგი კი აბსოლუტურად გულწრფელია. ჩვენს თაობაში ბევრს ჰგონია, რომ მზრუნველობა `ტეხავს~, მე კი ვფიქრობ, _ ეს "ამაღლებს" ადამიანს.
- გიორგი, შეგიძლია, თათულის ასტროპორტრეტი შეგვიდგინო?
- ზოდიაქოთი ტყუპია - ეს ერთ-ერთი სამსახიობი ნიჭის მქონე ნიშანია ანუ პროფესიული არჩევანი სწორად გააკეთა. ტყუპი კარგი მსახიობია. არის მსუბუქი და ჰაეროვანი, კონტაქტური. მთვარე ჰყავს მორიელში, რაც იმას ნიშნავს, რომ ამ ადამიანის ქვეცნობიერი არის ძალიან ღრმა. ძლიერი ინტუიცია აქვს და ერთი მიმიკითაც კი ბევრ რამეს ხვდება. ალბათ, ჩვენ შორის რაღაც კავშირი არის იმ გაგებით, რომ ლილიტი (მიზიდულობის პლანეტა) მე ტყუპში მაქვს (მორიელი ვარ), მას კი - მორიელში. რატომღაც ასე მოხდა, ერთმანეთი მივიზიდეთ... მისი აღმავალი კვანძი ლომშია, ეს კი არის სცენის, დიდებისმოყვარის, ლიდერის ნიშანი, დაღმავალი კვანძი - მერწყულსა და ლომშია. სწორად ამუშავებს კარმულ ვალდებულებას და არის პირველი.
თათული:
- ეს მდგომარეობა მომწონს, მაგრამ არ გეგონოთ, რომ ხიბლში ვარ. მართლა ზედმეტად კრიტიკული გახლავართ საკუთარი თავის მიმართ, მაგრამ ლიდერობა მხიბლავს.
გიორგი:
- აი, ჩვენი კიდევ ერთი საერთო თვისება: თვითკრიტიკულები ვართ. თათული, გიფიქრია იმაზე, რომ შესაძლებელი იყო, ერთმანეთი არ გაგვეცნო?
- გიორგის გარეშე ვეღარ ვძლებ. ორი დღე რომ არ შემეხმიანოს, უკვე მაკლია.
შეიძლება, დავინახო და არც დაველაპარაკო, მაგრამ თუ რეპეტიციაზეა, მშვიდად ვარ.
გიორგი:
- ვისაც ნებისმიერი პრობლემის თუ სიხარულის დროს დაუფიქრებლად დავურეკავ, ეს თათულია.
- ზოგს ქალისა და მამაკაცის ასეთ მეგობრობა ვერ წარმოუდგენია...
თათული:
- რატომ? ადამიანს მეგობრობის უნარი თუ აქვს, შეუძლებელი არაფერია. მყავს მეუღლე, ორი შვილი და ძალიან ბედნიერი ვარ ჩემი ოჯახით. გიორგის კი წინ აქვს ეს ყველაფერი. მინდა, ბედნიერი იყოს.