უკრაინის მიერ თეთრ სიაში შეყვანას ოლეგ ბასილაშვილმა სულელი ხალხის სულელური სია უწოდა

მსახიობმა ოლეგ ბასილაშვილმა, რომელიც უკრაინის მეგობრების თეთრ სიაში მოხვდა, განაცხადა, რომ ასეთი სიებისადმი უარყოფითად არის განწყობილი. ”ეს უღირსი საქმეა. ისეთი სიების შევსება, სადაც ვიღაც რაღაცის მომხრეა, ვიღაც - წინააღმდეგი, მინიმუმ სულელობის ნიშანია. სულელურ სიებს სულელი ადამიანები ადგენენ”, - განაცხადა ბასილაშვილმა.

მსახიობის აზრით, ერთადერთი რაც შეძლებს რუსეთსა და უკრაინას შორის ურთიერთობის გამყარებას, ეს ამ ქვეყნების კულტურის წარმომადგენლების ურთიერთობაა.
დღეს ცნობილი გახდა, რომ კიევმა შეადგინა თეთრი სია, რომელშიც კულტურულ სფეროში მოღვაწე უკრაინის მეგობრები შედიან. როგორც უკრაინის კულტურის სამინისტროს პრესსამსახური იუწყება, საუბარია იმ ხელოვანებზე, რომლებიც
ქვეყნის ტერიტორიულ მთლიანობას და სუვერენიტეტს უჭერენ მხარს.

სიაში 34 გვარია შეტანილი. მასში შედიან რუსი მსახიობები მიხაილ ეფრემოვი და ოლეგ ბასილაშვილი, მწერალი ბორის აკუნინი, მუსიკოსი ზემფირა და ანდრეი მაკარევიჩი და სხვები. დასავლეთიდან სიაში მოხვდნენ არნოლდ შვარცნეგერი, ჯორჯ ქლუნი, ჯარედ ლეტო, მილა იოვოვიჩი და სხვები. აღნიშნულია, რომ ეს ადამიანები მაქსიმალურ მხარდაჭერას მიიღებენ უკრაინის ტერიტორიაზე საკუთარი შემოქმედებითი პროექტების განხორციელებისას.
წყარო: ambebi.ge