გია ყანჩელის იუბილესადმი მიძღვნილი კონცერტი ბერლინში "კონცერტჰაუზში" გაიმართება

კულტურისა და ძეგლთა დაცვის სამინისტროს მხარდაჭერით, საქართველოს ეროვნული სიმფონიური ორკესტრი ქართველი კომპოზიტორის, გია ყანჩელის საიუბილეო თარიღს მთელი წლის განმავლობაში კონცერტების სერიას მიუძღვნის.

როგორც "ინტერპრესნიუსს" კულტურისა და ძეგლთა დაცვის სამინისტროდან აცნობეს, ლეგენდარულ ქართველ კომპოზიტორს გია ყანჩელს 10 აგვისტოს 80 წელი შეუსრულდა. პირველი
კონცერტი დღეს, 22 აგვისტოს "იანგ ეურო კლასიკ" ფესტივალის ოფიციალური პროგრამის ფარგლებში ბერლინის ისტორიულ დარბაზში "კონცერტჰაუზში" გაიმართება.

სამინისტროს ცნობით, ბერლინის ცნობილ დარბაზში "კონცერტჰაუზში" გია ყანჩელის ნაწარმოებებთან ერთად არვო პიარტის მუსიკაც გაიჟღერებს. სოლისტები: დუდანა მაზმანიშვილი, ანდრეს მუსტონენი, გიორგი ცაგარელი. დირიჟორი და მუსიკალური ხელმძღვანელი ნიკოლოზ რაჭველი.

პროექტი ხორციელდება გერმანიაში საქართველოს საელჩოს პატრონაჟით; საქართველოს კულტურისა და ძეგლთა დაცვის სამინისტროსთან ერთად, მხარდამჭერია გერმანიის საგარეო საქმეთა სამინისტრო და ფონდი "DAAD".
წყარო: ambebi.ge