როგორ ვიმუშაოთ სიამოვნებით?

არსებობს ასეთი ფორმულა: ”ბედნიერებაა, არა აკეთო ის, რაც გინდა, არამედ გინდოდეს ის, რასაც აკეთებ”.





თუკი ორშაბათის გათენება თქვენთვის კოშმარია, ე. ი. პატარა ტრენინგი არ გაწყენდათ ამ თემაზე. გული არ გაიტეხოთ, თუ დილაადრიან დარეკილ მაღვიძარასთან ერთად, მთელი დღე მძიმე გრაფიკით, წამიერად ჩაგივლით თვალწინ, რადგან თქვენისთანები მრავლად არიან.

პირველ რიგში, უნდა გააცნობიეროთ, რომ ამ სამუშაოს გინაზღაურებენ. ეს გარკვეული ვალდებულება და თანამედროვე ცხოვრების შემადგენელი ნაწილია. ამიტომ სამუშაოზე ისე კი არ უნდა მიდიოდეთ, თითქოს სასაკლაოზე, არამედ - პირიქით, სიამოვნება უნდა მიიღოთ.

რატომაა ეს მთავარი?

გამუდმებით სამსახურზე ცუდის ფიქრი ცხოვრებას გვიწამლავს. დათვალეთ, დღეში რამდენ საათს ატარებთ სამსახურში? დამეთანხმეთ, რომ საკმაოდ დიდი დროა იმისთვის, რომ ამ პერიოდში მუდამ ცუდ ხასიათზე და გაძლებაზე იყოთ. ასე ხომ ჩვენი ცხოვრება ერთ ნაცრისფერ და უინტერესო მოგზაურობად შეიძლება გადაგვექცეს.

ამიტომ უთხარით "არა" უარყოფით განწყობას. განწყობის გასახალისებლად სამსახურის მიმართ დამოკიდებულება შეცვალეთ, საკუთარ თავს შთააგონეთ, რომ ეს მხოლოდ თქვენზეა დამოკიდებული.

ყოველი ადამიანი თავად ქმნის განწყობას და ეს მნიშვნელოვნად მოქმედებს მის ცხოვრებაზე. ასე რომ, ფრაზამ - ”არ მინდა მუშაობა, მეზარება და ა.შ”, შესაძლოა ქრონიკულად ცუდ ხასიათზე გამყოფოთ.

ჩავიხედოთ საკუთარ თავში
გვიპასუხეთ: რისთვის მუშაობთ? ალბათ, უმეტესობას ერთი პასუხი აქვს: ”რა თქმა უნდა, ფულისთვის”. ასეცაა! მატერიალური მხარე თქვენი მუშაობის მთავარი სტიმულატორია. საკუთარი შემოსავალი ხომ თქვენს ინდივიდუალურობასა და დამოუკიდებლობას განსაზღვრავს. მხოლოდ ეს ფაქტიც კი საკმარისია ბედნიერებისთვის.

თვითდარწმუნების საიდუმლოებები

მუშაობა რომ უფრო ხალისიანად და ენერგიულად შეძლოთ, სამი რჩევა დაგეხმარებათ:

• იყავით თამამები და იგრძენით თავი დამოუკიდებლად.
თქვენ თვითდაჯერებული, ლამაზი და ჭკვიანი ქალი ხართ. ყოველდღიურობა ისე წარმართეთ, როგორც გსურთ. და კიდევ, სამსახურს ხომ არ აურჩევიხართ? თქვენ აირჩიეთ იგი.

• ისწრაფეთ იდეალიზაციისკენ, მაგრამ ნუ ჩაიციკლებით.

ხდება, რომ სამსახურში ისე მიდიხართ, თითქოს იქ კატორღა გელით. რატომ ხდება ასე? გეშინიათ პასუხისმგებლობის? უნებლიე შეცდომების და გადაწყვეტილებების მიღების? ნუ შეგაშინებთ შეცდომები, იდეალური ადამიანები არ არსებობენ. შეცდომები კი სწორედ მთავარი დეტალია სრულყოფილების მისაღწევად.

იყავით მადლიერები

გიხაროდეთ ყოველი დღის გათენება. სიხარულით შეხვდით ყველა მოვლენას და პროექტს. გიყვარდეთ თქვენი სამუშაო, რადგან ბევრს ის საერთოდ არ აქვს. ხშირად გაიხსენეთ ის ”სიკეთე”, რაც სამსახურმა მოგიტანათ.

სახლში ყოფნით ვერასდროს იქნებოდით ასეთი დამოუკიდებელი და ბევრ რამეზე მოგიწევდათ უარის თქმა. სამსახურის წყალობით გადიხართ ყოველდღიურად გარეთ და გარეგნობასაც ყურადღებას აქცევთ.

სამუშაო ატმოსფეროს შეცვლის მარტივი რჩევები:

• ინტერესი გამოიჩინეთ მიმდინარე ფაქტების მიმართ.
იმუშავეთ ინტერესით. ეცადეთ, ყველა აღაფრთოვანოთ თქვენი შესაძლებლობებით. გამუდმებით ეძებეთ სიახლეები, დაეხმარეთ კოლეგებს. სულ მალე სამსახურში ფრენით წახვალთ.

• საკუთარ თავს უფლება მიეცით, საყვარელი საქმე აკეთოთ მთელი დღის განმავლობაში. თავი დაანებეთ კომპიუტერის მონიტორზე მუდმივად საათის ყურებას და სახლში წასვლამდე დარჩენილი წუთების თვლას. ამის ნაცვლად, გირჩევთ, ინტერნეტში რაიმე საინტერესო ბლოგი მოძებნოთ და გადაიკითხოთ; დაათვალიერეთ ფოტოები, რომლებიც დადებით განწყობაზე იმოქმედებს.

• გაანებივრეთ საკუთარი თავი სასიამოვნო წვრილმანებით. მაგიდაზე ისეთი ნივთები დააწყვეთ, რომლებიც სიამოვნებას და ღიმილს მოგგვრით, კედელზე კი ოჯახური ფოტოები გააკარით; შეცვალეთ კომპიუტერის ფონიც - შესაძლოა, სტანდარტულმა ბეგრაუნდმა მხოლოდ სევდა მოგგვაროთ.

• ხშირად გაიღიმეთ და ყველგან თავაზიანი იყავით! სიამოვნება მხოლოდ კარგ გუნება-განწყობასთან ერთად შეიძლება მიიღოთ.

• კარგად გამოიძინეთ. სასიამოვნო სამუშაო დღეს გისურვებთ!

ია ბერიაშვილი
ჟურნალი ”და ქალი”
(გამოდის თვის დასაწყისში)