არის თუ არა სალომე ბაკურაძე ბავშვივით დაუცველი?

"მისი ძალიან ცოტა ადამიანს სჯერა. ვალდებულებებისა და შეზღუდვების პანიკურად ეშინია. აგრესიულია. მისი მშვიდი გამომეტყველება ნუ მოგატყუებთ, შესანიშნავად ეხერხება სიმშვიდის ნიღბის მიღმა საკუთარი ემოციები და პრინციპულობა დამალოს.
გულის სწორმა პერიოდულად, მისი მხრიდან წამოსული ცინიზმი და აგრესიის შეტევები მოთმინებით უნდა აიტანოს. შეუძლია ადამიანების თანაგრძნობა, საიდუმლოებების შენახვა, მაგრამ მის შიდა ბუნებაში შეღწევა რთულია", -ასე ახასიათებენ ასტროლოგები ვირთხის წელში დაბადებულ კირჩხიბს, ეს კი მომღერალ სალომე ბაკურაძის ზოდიაქოს ნიშანია.

-ასტროლოგია მაინტერესებს და პირადი ჰოროსკოპიც შედგენილი მაქვს, მაგრამ ვერ ვიტყვი, რომ ყოველდღიურად ასტროლოგთა მითითებებისა და რეკომენდაციების მიხედვით ვცხოვრობ.

-"მისი სულიერი მდგომარეობა მთვარის ფაზებზეა დამოკიდებული, რისი წყალობითაც, ხასიათი ხშირად ეცვლება".
-ვერ ვიტყვი, რომ განწყობის ხშირი ცვალებადობა მახასიათებს, მაგრამ ჩემს ცხოვრებაში მსგავსი რამ ყოფილა. როცა ცუდ ხასიათზე ვარ, ვცდილობ, გარშემო მყოფებმა ეს ვერ შემამჩნიონ. ხასიათი იოლად მეცვლება.

-"ძალიან რთული და მგრძნობიარეა. ხან ძლიერი ადამიანის შთაბეჭდილებას ტოვებს, ხან კი -ბავშვივით დაუცველია".
-მგრძნობიარე და ემოციური ვარ, მაგრამ ვერ ვიტყვი, რომ რთული ხასიათი მაქვს. საკუთარ თავში ყოველთვის ვპოულობ ძალას, დაბრკოლებებს გავუმკლავდე. მინდა, ძლიერი ვიყო და ეს გამომდის კიდეც.

-ბავშვივით დაუცველი როდის ხარ?
-საერთოდ, ბავშვური ხასიათი მაქვს. მიყვარს, როცა ჩემზე ზრუნავენ, როცა ხმალამოღებული მხოლოდ მე არ ვიბრძვი. დიდი კომფორტია, როცა გვერდით გეგულებიან ადამიანები, რომლებიც შენს ჭირსა თუ ლხინს გაიზიარებენ.

-მელანქოლიის ტყვეობაში ხშირად ხარ?
-მელანქოლია ნაკლებად მახასიათებს, მაგრამ ვიცი, რომ ეს ჩემი ნიშნით დაბადებულ ადამიანთა თვისებაა.

-"მისი წყენინება ადვილია, მაგრამ რთულია უგუნებობის მიზეზის გარკვევა".
-მართალია, ჩემი უგუნებობის მიზეზის გარკვევა რთულია. ყოველთვის ვიცი, რა უნდა ვთქვა, რომ ადამიანს ეწყინოს და რა არ უნდა ვთქვა, რომ არ ვაწყენინო. ჰოდა, მგონია, რომ სხვებიც ასე არიან, უბრალოდ, მერე ვიღაცები ნიღაბს ირგებენ; ისე იქცევიან, თითქოს ვერაფერს ხვდებიან. არ მიყვარს თვალში თითის ჩარტმა და იმის ახსნა, თუ რატომ ვარ ცუდ ხასიათზე... ძალიან მარტივია ჩემი გახარებაც. დედა ამბობს ხოლმე, -დაკუჭული ქაღალდიც რომ აჩუქო, სიხარულისგან გაგიჟდებაო.

-"შეუძლია ადამიანების თანაგრძნობა, საიდუმლოებების შენახვა, მაგრამ მის შიდა ბუნებაში შეღწევა რთულია. არ უყვარს საკუთარ გრძნობებზე ლაპარაკი".
-ემოციური ვარ. ძალიანაც რომ არ მინდოდეს, ყველაფერი სახეზე "მაწერია". გრძნობების სიღრმეზე ნაკლებად ვლაპარაკობ. ყველა ადამიანს აქვს რაღაც, რასაც მხოლოდ თავისთვის იტოვებს. ჩემს გრძნობებს ძალიანაც არ ვამზეურებ. სხვები კი საიდუმლოებებს მანდობენ, რჩევასაც მეკითხებიან. ფსიქოლოგის ფუნქციაც ბევრჯერ შემისრულებია.

-"ინტუიციაზე დაყრდნობით უფრო ხშირად მოქმედებს, ვიდრე -გონებით".
-ფანტასტიკური ინტუიცია მაქვს. ფიქრი მიყვარს და როცა გადაწყვეტილება უნდა მივიღო, ბევრ რამეს ვაქცევ ყურადღებას, კარგად ავწონ-დავწონი ყველაფერს, სხვების თუ საკუთარ გამოცდილებას ვიხსენებ. ხანდახან მინანია, -ინტუიციას რატომ არ მივენდე-მეთქი? მინდა, მომავალში გადაწყვეტილებები წინათგრძნობაზე დაყრდნობით უფრო ხშირად მივიღო.

-"თუ კეთილად მოეპყრობი, მისი მართვა ადვილია, მაგრამ თუ რაიმეს გაკეთებას აიძულებ, ადგილიდან არ დაიძვრება".
-კი, ნამდვილად ასეა. იძულებით ვერავინ ვერაფერს გამაკეთებინებს. ისეთი მიამიტი და მიმნდობიც არ ვარ, მხოლოდ ტკბილი სიტყვით რომ

მომატყუონ, მაგრამ ამ ფორმით ჩემი მართვა გაცილებით ადვილია, მით უმეტეს, მაშინ, როცა ვგრძნობ, რომ ეს თბილი და ტკბილი სიტყვა გულწრფელია.

-"ძალიან მოსიყვარულე ნიშანია.
თუ ვინმეს შეიყვარებს -სამუდამოდ უერთგულებს, მაგრამ შეუძლია, სასტიკი მტერიც იყოს".
-მტერი? არ ვიცი, ამაზე რა ვთქვა. მტერი გყავს ომში და მას იარაღიდან ამიტომაც ესვრი. მტერი არა, მაგრამ ჩემს ცხოვრებაში შეიძლება იყოს შურიანი ადამიანი, არაკეთილისმსურველი... როცა პიროვნება გიყვარდება, ასეთ დროს თითქოს, გულში რაღაც გაგკრავს. მე ვთვლი, რომ მერე მთელი ცხოვრება ამ პირველადი განცდის გამეორებაა. როცა გიყვარს ადამიანი და მას შენთან რაღაც შეეშლება, შესაძლოა, მომავალში მისდამი გრძნობა განელდეს, მაგრამ დასაკარგად ბოლომდე ვერ გაიმეტებ.

-"ხშირად შურისძიებაზე მიდის, მაგრამ ამას იმდენად ჩუმად აკეთებს, ვერავინ ხვდება".
-თუ დამჭირდება, შესაძლოა, შურისძიებაც ვცადო, ანგელოზი არ ვარ. ადამიანთან რაღაც თუ მექნება გასარკვევი, სათქმელი, ყოველთვის ვეცდები მასთან დაკავშირებას.

-"რეალურად, მისი ძალიან ცოტა ადამიანს ესმის".
-მსგავსი განცდა არასდროს მქონია.

-"უყვარს ფულის შეგროვება".
-ვერ ვაგროვებ. ხარჯვა მიყვარს, მაგრამ ისეთიც არ ვარ, რომ ხვალინ¬დელ დღეზე არ ვიფიქრო. ჩემი უხასიათობის ერთ-ერთი მიზეზი შეიძლება, ფულის ნაკლებობაც იყოს.

-"როგორც ბუნებაში ხდება, კირჩხიბს თუ რამე სურს, მას მთელი ძალით ჩააფრინდება და ვერავინ გააგდებინებს".
-ნამდვილად ასეა! ყოველთვის მაქვს ის, რაც ძალიან მინდა...

-უსაფუძვლო შიშები გახასიათებს?
-მშიშარა ვარ, მაგრამ აკვიატებული შიშები არ მაქვს. იმას, რამაც შეიძლება, მომავალში ჩემი ფსიქიკა დააზიანოს, სიღრმეებში არ მივყვები.

-"კირჩხიბის სახე სარკეა, რომელზეც ყველა მისი განწყობაა ასახული".
-კი, ყოველთვის ასეა. მიუხედავად იმისა, რომ ვცდილობ, ჩემი ცუდი განწყობა ახლობლებისთვის გადამდები არ იყოს, ისინი მაინც ამჩნევენ, ყველაფერი რიგზე როდის ვერ მაქვს. ცოტა ხნის წინ, ძალიან ცუდ ხასიათზე ვიყავი. უახლოესმა მეგობარმა -თიკა მახალდიანმა მკითხა, რა ხდებაო? -არაფერი-მეთქი, მაგრამ მამჩნევდა, რომ სახე "წაშლილი" მქონდა. მეორედაც მკითხა და ვერაფერი დამაცდენინა. ბოლოს თქვა, -ვიცი, თუ მოგინდება შენ თვითონ მეტყვიო.

-"აგრესიულია. მისი მშვიდი გამომეტყველება ნუ მოგატყუებთ, მას შესანიშნავად ეხერხება, სიმშვიდის ნიღბის მიღმა საკუთარი ემოციები და პრინციპულობა დაფაროს".
-პრინციპული ვარ. აგრესიის გამოხატვა არ მიყვარს, მაგრამ ვხვდები, ჩემში ეს თვისებაც არის. უსამართლობას ვერ ვიტან. სწორედ გუშინ ვამბობდი: უსამართლობას იმდენად ვერ ვეგუები, მზად ვარ, ასეთ დროს მკვლელობა ჩავიდინო-მეთქი. როგორც ჩანს, ჩემში აგრესიის მარცვალი არის და შესაძლოა, ადამიანთა გარკვეულმა ქმედებებმა გააღვივოს.

-"ემოციების გამოხატვაშიც ძალზე თავშეკავებულია".
-ამ შემთხვევაში, ასტროლოგებს ვერ დავეთანხმები.

-"ის ყოველთვის ცდილობს, ნებისმიერი ურთიერთობიდან ნახოს გამორჩენა. სასურველი მიზნის მისაღწევად, ამ ადამიანისთვის არც საკუთარი შარმისა და მომხიბვლელობის გამოყენებაა უცხო".
-ანუ გარემოებებს ჩემს სასიკეთოდ ვიყენებ თუ არა? არა, არ ვიყენებ. "გამორჩენა" ძალიან ცუდი სიტყვაა და არც "სარგებელი" მომწონს. საერთოდ, ადამიანებთან ურთ¬იერთობა ძალიან მიყვარს. ჩემთვის სარგებელსა და გამორჩენაზე ფიქრი წარმოუდგენელია.

-"ვალდებულებებისა და შეზღუდვების პანიკურად ეშინია".
-შეზღუდვები არ მიყვარს და სულ ვცდილობ, ისე ვიცხოვრო, რომ არავინ არაფერში შევზღუდო. რაც შეეხება ვალდებულებებს: პასუხისმგებლობის გრძნობა კარგად მაქვს განვითარებული.

-"აზარტულია. დღევანდელი დღით ცხოვრებას ამჯობინებს და იშვიათად ფიქრობს მომავალზე".
-ამაზე სულ ვფიქრობ და მივედი დასკვნამდე, რომ იმდენად აზარტული ვარ, თამაშებშიც კი არ ვერთვები; არ მომწონს, როცა ვაგებ. ამ დროს აგრესიული და უხეშიც შეიძლება ვიყო. ჩემი პროფესიაც აზარტულია.

-"მიდრეკილება, საკუთარი სიამოვნებისთვის გზად ყველაფერი გაანადგუროს, ბევრ ვირთხას ბრწყინვალე კარიერის კრახით დამთავრებას უქადის".
-სულ იმისთვის ვიბრძვი, რომ მოვარჯულო ადამიანები, რომლებიც საკუთარი სურვილის იქით ვერაფერს ხედავენ. იმ კატეგორიას არ განვეკუთვნები, რომლებიც ირგვლივ ყველაფერს ჩეხენ და კაფავენ, ოღონდ ერთი ნაბიჯით წინ წაიწიონ. ეს არ ღირს ადამიანური ურთიერთობების გაფუჭებად ან როგორ უნდა იხარო, თუ ამ გზაზე მარტო მიდიხარ?

-"მას უყვარს ხალხთან ურთიერთობა და საზოგადოების ყურადღების ცენტრში იოლად ექცევა".
-მიყვარს და შეიძლება ითქვას, რომ საზოგადოების ყურადღების ცენტრში ყოფნასაც ვახერხებ.
-"გულის სწორმა პერიოდულად, მისი ცინიზმი და აგრესიის შემოტევები მოთმინებით უნდა აიტანოს".
-ცინიზმს ვერ დავარქმევ, მაგრამ საკმაოდ პირდაპირი ვარ. მეგობრები მეუბნებიან, -შენ შეგიძლია, ადამიანს იუმორით ისეთი რამ უთხრა, მიზანში მოარტყაო. სათქმელი რომ არ ვთქვა, დავიხრჩობი. ცინიზმი არ მიყვარს, ეს დამამცირებელია.
-როდესაც ცინიზმს გრძნობ, იმ ადამიანს როგორ ექცევი?
-ცინიზმს ცინიზმით არასდროს ვპასუხობ და ამას არც მომავალში გავაკეთებ.