რატომ არ გააჩინა ნანა ლორთქიფანიძემ მეორე ბავშვი : '' შვილზე მეტად ამქვეყნად არავინ მიყვარს''

მსახიობი ნანა ლორთქიფანიძე დედა მაშინ გახდა, როდესაც საქართველოში ყველას უჭირდა. გაუჭირდა შვილის გაზრდა, მაგრამ პრობლემებს მაინც გაართვა თავი. მეორე ბავშვის გაჩენა მოგვიანებით მოინდომა, მაგრამ უკვე გვიანი იყო. შვილთან ურთიერთობაზე და მისი აღზრდის მეთოდებზე ქალბატონმა ნანამ ჩვენს ინტერვიუში ისაუბრა.

- დედა 24 წლის ასაკში გავხდი. ეს იყო ნანატრი შვილი, იმიტომ, რომ სამი წლის განმავლობაში ბავშვის გაჩენასთან დაკავშირებით პრობლემები მქონდა. 1986 წელს დაიბადა ქეთი და გაგვაბედნიერა. 1989 წლამდე, სანამ ქვეყანაში ცნობილი მოვლენები განვითარდებოდა, სრულ ნირვანაში იზრდებოდა, ყველა გარს ეხვია და წარმოიდგინე, ასეთი სიტუაციიდან უცებ აღმოვჩნდით მძიმე 90-იანებში. არ ვი-ცოდი, შვილი როგორ გამომეკვება. ახლა უფრო მღალატობს ნერვები, როცა ვყვები, ვიდრე იმ მომენტში. მერე ''მოვიგონეთ'' ცხელი წყალი, ''კერასინკები'' და სხვადასხვა საშუალება…

- როგორი იყო თქვენი აღზრდის მეთოდი?
- ვერ ვიტყვი, რომ მკაცრი ვიყავი, მომთხოვნი სწავლის საკითხში გახლდით. ცემა-ტყეპითა და ზედმეტი სიმკაცრით, ზედმეტი დასჯით არა მგონია, ახალგაზრ

და თაობასთან რამე გაგივიდეს. ჩემი შვილისთვის ხელი არასდროს მომირტყამს, ერთ შემთხვევასაც ვერ გაიხსენებს. დასჯით დამისჯია, მობილური ახალი შემოსული იყო, გამაბრაზა, ჩამოვართვი და ოთახში სახლის ტელეფონიც გავუთიშე. ეს ძალიან დიდი სიმკაცრე იყო ჩემი მხრიდან, მისთვის კი - ყველაზე მწარე სასჯელი.

რაც შეეხება მის პირადს, ყოველთვის გაგებით ვეკიდებოდი და ამ თვალსაზრისითაც ძალიან მეგობრული ურთიერთობა გვქონდა. მასაც ანალოგიური დამოკიდებულება ჰქონდა ჩემი პირადის მიმართ. ჩემი შვილისთვის არაფერი დამიმალავს, არც მას.




- ქეთი დედისერთაა, რატომ არ გააჩინეთ მეორე შვილი?
- ასე აეწყო ყველაფერი, გავშორდი ქეთის მამას, მერე გავთხოვდი, გაირბინა წლებმა, როცა მომინდა, ქეთის დედმამიშვილი ჰყოლოდა, უკვე გვიან იყო. ახლა მას გვერდით ორი ვაჟკაცი ჰყავს, რომლებიც ცოტა ხანში ძმებივით ამოუდგებიან მხარში.

მიუხედავად იმისა, რომ შვილიშვილებზე მზე და მთვარე ამომდის, შვილზე მეტად ამქვეყნად არავინ მიყვარს. შვილიშვილებს იმხელა დრო და ენერგია მიაქვთ, რომ ვამჩნევ, ჩემს შვილს ყურადღებას ვაკლებ. ხანდახან დღეები ისე გადის, შვილს ვერ ვეფერები და ამას თავად ქეთიც აღნიშნავს. დედა, რამდენი ხანია, ჩემთვის არ გიკოცნიაო, ამას რომ იტყვის, გული მეტკინება ხოლმე...



შვილის სიყვარულის გამო მიდის მთელი ენერგია შვილიშვილებზე. შენი ქალიშვილი გეცოდება უძილო ღამეებისთვის, გადაღლილობისთვის, არ გინდა, რამეს გამოაკლდეს, რამე ეტკინოს და შენ, როცა დედა ხარ, საკუთარ თავზე ბევრ რამეს იღებ, მაგრამ ამ ვალდებულებას დიდი სიამოვნებით კისრულობ და დიდი სიყვარულით ასრულებ.