როდის არ რისკავს ნანუკა გოგიჩაიშვილი და ვინ იყო მისი პირველი სიყვარული

მოდელი და ტელეწამყვანი - ნანუკა გოგიჩაიშვილი მიიჩნევს, რომ საკმაოდ აქტიური ცხოვრების წესი აქვს. არ უყვარს უქმად ყოფნა და დასვენების დროსაც კი ცდილობს, რაიმეთი დასაქმდეს. კითხვას: ხარ თუ არა შეყვარებული? - თავს არიდებს. აღნიშნავს: ჩემი რჩეულის ვინაობას მხოლოდ მაშინ გაიგებთ, როცა დავქორწინდებიო.


ბავშვობა
- ძალიან ცელქი ვიყავი, თან - ცოტა არ იყოს, უცნაურიც. უფრო სწორად, ბებო მზრდიდა საკმაოდ უცნაურად (იცინის). ძალიან პატარას ზღაპრების ნაცვლად, შექსპირის სონეტებს მიკითხავდა. ბაბუაც ყოველთვის ცდილობდა, ჩემთვის წიგნების სიყვარული ჩაენერგა. მშობლებმა საკმაოდ ადრეულ ასაკში შექმნეს ოჯახი და ვინაიდან ბებია-ბაბუასთვის პირველი შვილიშვილი ვიყავი, ყველა მანებივრებდა. ოჯახის წევრებს გადანაწილებული ჰქონდათ, რა უნდა ესწავლებინათ ჩემთვის.

- ყველაზე ხშირად, ოჯახის წევრები რის გამო გსაყვედურობდნენ?
- მიუხედავად იმისა, რომ ცელქი ვიყავი, მშობლებისგან შენიშვნას თითქმის არასდროს ვიღებდი. ერთადერთი, ჩაცმის გამო ვისმენდი საყვედურებს დედისა და ბებიისგან. თბილად ჩაცმა არ მიყვარდა და ამიტომაც მიბრაზდებოდნენ... კიდევ ერთი ამბავი გამახსენდა: როცა ახალი საინტერესო წიგნის კითხვას დავიწყებდი, მას ვეღარ ვწყდებოდი და ვერც იმას ვგრძნობდი, რომ უკვე ბნელდებოდა ან უბრალოდ, შუქის ასანთებად ფეხზე წამოდგომისთვის დროის დაკარგვა მენანებოდა. ჰოდა, დედა ასეთ დროს თუ შემომისწრებდა, ბრაზობდა: ნანუკა, მაინცდამაინც თავი უნდა დაიბრმავო? შუქის ანთებას რა უნდაო?
საერთოდ, ჩემი ოჯახის წევრები იმდენად დამთმობი და კეთილები არიან, სულ ვცდილობდი, მათგან ზედმეტად შენიშვნა არ მიმეღო. არ მინდოდა, საყვარელ ადამიანებს ჩემ გამო ენერვიულათ.

სკოლის პერიოდი
- მახსოვს, სკოლაში ყველანაირი ეტაპი გავიარე: იყო პერიოდები, როცა ნორმალურადაც ვსწავლობდი და ძალიან კარგადაც... ძალიან მიყვარდა ფიზიკა და ქიმია, რაც ალბათ, მამიდაჩემის დამსახურებაა. მასწავლებლებს არასდროს ვაბრაზებდი. მიყვარდა ჩემი პირველი დამრიგებელიც.

- ბავშვობაში რა პროფესიაზე ოცნებობდი?
- მინდოდა, მწერალი გამოვსულიყავი, წერა კარგად გამომდიოდა და ვფიქრობდი, რომ საინტერესო რაღაცების დაწერას შევძლებდი და წიგნსაც გამოვუშვებდი. თუმცა, აზრი ძალიან მალე შევიცვალე.

პირველი სიყვარული
- სკოლაში მგონი, არავინ მყვა­რებია, მაგრამ მახსოვს, ბაღში ყველაზე ლამაზი ბიჭი, გიგი მომწონდა და ამ ამბავს ოჯახის წევრები დღემდე მახსენებენ ხოლმე. როგორ გამოვხატავდი სიყვარულს, არ ვიცი. ერთმანეთს შეძლებისდაგვარად ვეპრანჭებოდით (იცინის).

- სკოლის დამთავრების შემდეგ, სწავლა სად გააგრძელე?
- ბავშვობიდან ძალიან კარგად ვხატავდი, ამიტომ, სკოლის დამთავრების შემდეგ "ნიკოლაძეში", მოდელირებაზე ჩავაბარე... სამხატვრო აკადემიაშიც მინდოდა სწავლის გაგრძელება, მაგრამ გადავიფიქრე და სწავლა საერთაშორისო ურთიერთობებზე გავაგრძელე.

- მიზანდასახული ადამიანი ხარ?
- საკმაოდ მიზანდასახული ვარ. როცა რაღაცის გაკეთება მთელი გულით მინდა, ვერანაირი სირთულე ვერ დამაბრკოლებს.

- შრომისმოყვარეც ხარ? სიზარმაცე ხანდახან მაინც გახასიათებს?
- თამამად შემიძლია ვთქვა, რომ შრომისმოყვარე ვარ. სიზარმაცე ჩემი თვისება არ არის. პასუხისმგებლობის გრძნობას არასდროს ვკარგავ. როცა, რაღაცას დამავალებენ, ვცდილობ, ყველაფერი მაღალ დონეზე შევასრულო.

პირველი წარმატება
- 14 წლის ვიყავი, ნანა შუკვანის ჩვენებაზე რომ გამოვედი, სადაც მხოლოდ ორი დამწყები მოდელი ვიყავით, დანარჩენი მონაწილეები კი იმ დროისთვის საკმაოდ წარმატებულები იყვნენ: კრისტი ყიფშიძე, სალომე ღვინიაშვილი, ნათია მაქაცარია, თამუნა გაბრიელაშვილი. ეს ჩვენება მაშინ შარდენზე ჩატარდა და იმ დროისთვის საკმაოდ დიდი ჰონორარიც მივიღე. ეს ჩემი პირველი წარმატება

იყო სამოდელო სფეროში. იმ პერიოდში მოდელობაზე არც ვფიქრობდი, მაგრამ წარმატებულმა გამოსვლამ მომცა ბიძგი, ეს საქმიანობა დამეწყო.

ჯანსაღი ცხოვრების წესი
- ვარჯიში და სპორტდარბაზებში სიარული მიყვარს. მაქვს პერიოდი, როცა სისტემატურად ვვარჯიშობ, მაგრამ ბოლო დროს ამ მხრივ გავპასიურდი. საოცარი გურმანი ვარ. ყველანაირი გემრიელი კერძი მიყვარს და საკუთარ თავს არაფერში ვზღუდავ.

- ალკოჰოლური სასმელები თუ გიყვარს?
- არც ვსვამ, არც - ვეწევი. მაქსიმუმ, შეიძლება, 2 ჭიქა შამპანური მივირთვა, ისიც - საკუთარ დაბადების დღეზე ან ახალ წელს.

- ძილი გიყვარს? რომელ საათზე იწყება შენი დილა?
- ძილი მიყვარს, მაგრამ ყოფილა შემთხვევები, როცა დღე-ღამის განმავლობაში მხოლოდ 4 საათით შევძელი დაძინება... დილას 6 საათზე ვდგები. ვცდილობ, თუ დრო მაქვს, დღის განმავლობაში 3 საათი მაინც დავიძინო, რათა ენერგიის აღდგენა შევძლო.

გემოვნება

- შენი გემოვნების ჩამოყალიბებაზე ზეგავლენა ვინ ან რამ იქონია?
- ალბათ, რაღაც ეტაპზე დედამ, შემდგომ კი უკვე დამოუკიდებლად ვცდილობდი საკუთარ თავზე ზრუნვას. უგემოვნო ნამდვილად არ ვარ.

- იმიჯს ხშირად იცვლი?
- არა, გარეგნობასთან თამაში არ მიყვარს, სარისკო ექსპერიმენტებს თავს ვარიდებ.

- რისკიანი ხარ?
- შესაძლებელია, ზოგჯერ თამამად ვიმოქმედო, თუმცა, ბრმად არასდროს ვრისკავ.

პირადი ცხოვრება
- საერთოდ, პირად ცხოვრებაზე ლაპარაკი არ მიყვარს. ეს ის არის, რაშიც ათასი თვალი და ყური არ უნდა ჩარიო. ჩემს პირად ცხოვრებაში მომხდარ სიახლეს მხოლოდ იმ შემთხვევაში გაიგებს ხალხი, როდესაც იმ ერთადერთ ადამიანს ვიპოვი, ვისთან ერთადაც ოჯახის შექმნას გადავწყვეტ. უფლება რომ მქონდეს, ანონიმურად დავტოვებდი მეუღლის ვინაობას. მეორე ნახევართან ერთად შექმნილი იდეალური სამყაროთი უნდა დატკბე, მაგრამ საქვეყნოდ არ უნდა ისაუბრო, თუ როგორ გიყვარს და როგორ უყვარხარ.

- როცა საზოგადოების ყურადღების ცენტრში ექცევი, ეს გაღიზიანებს თუ პირიქით - გსიამოვნებს?
- ყურადღება არ მაღიზიანებს. როცა საზოგადოებრივი თავშეყრის ადგილას ვარ, ხალხისგან დიდ ყურადღებას ვგრძნობ, მათგან ყოველთვის საკმაოდ დადებითი მუხტი მოდის. მიუხედავად ამისა, ხალხმრავლობა არ მიყვარს.

- როგორი მამაკაცები მოგწონს?
- მამაკაცი პირველ რიგში, ჭკვიანი უნდა იყოს. თუ ჩვენ შორის დიალოგი საინტერესოდ შედგა, მომეწონა მისი აზროვნება, ცხოვრებისადმი დამოკიდებულება, ხასიათი, მისით ადვილად მოვიხიბლები. არ დაგიმალავთ და მომთხოვნი ვარ. მინდა, ჩემი მომავალი მეორე ნახევარი გამორჩეული ადამიანი იყოს (იცინის).

- ოდესმე დამოუკიდებლად ცხოვრება გიცდია?
- ამერიკაში ყოფნისას იქ დარჩენის და სამოდელო საქმიანობის გაგრძელების დიდი შანსი მქონდა. პირველ ეტაპზე დარჩენა 3 წლით მომიწევდა. მიუხედავად მშობლების თანხმობისა, რომლებიც ფიქრობდნენ, რომ ამ შანსზე უარი არ უნდა მეთქვა, საქართველოში დაბრუნება გადავწყვიტე... ამ თემაზე საერთოდ არ ვსაუბრობ, რადგან ბევრი ვერ გაიგებს, რატომ ვთქვი უარი იმ ოქროს შანსზე, რომელიც ცხოვრებამ მომცა. უბრალოდ, არ მინდოდა, გარკვეული პერიოდი ბებიებისა და ბაბუებისგან, საყვარელი ადამიანებისგან შორს გამეტარებინა.

დასვენება

- აქტიური დასვენება გიყვარს თუ პასიური?
- დასასვენებლად ძირითადად, დასთან ერთად მივდივარ ხოლმე. აქტიური ცხოვრება მიყვარს. საქმე რომც არ მქონდეს, რაღაცას მაინც გამოვძებნი და საკუთარ თავს დავასაქმებ. არ მიყვარს უმოქმედობა. ჩემთვის სიტყვა "დასვენება" არ არსებობს.

- საკურორტო რომანი გქონია?
- არა და არც მესმის, ერთკვირიანი ფლირტი რატომ უნდა მინდოდეს? ურთიერთობებს საკმაოდ სერიოზულად ვუყურებ და ჯერ იმაზე ვფიქრობ, მინდა თუ არა კონკრეტულ ადამიანთან ურთიერთობა, მერე უკვე გულსაც ვამზადებ მის შესაყვარებლად... არ მიყვარს დროის სისულელეში ხარჯვა.

- მთაში დასვენება უფრო გიყვარს თუ ზღვისპირეთში?
- მთაში დასვენებაც მიყვარს, მაგრამ პრიორიტეტს ზღვაზე ყოფნას ვანიჭებ. ზღვა განსაკუთრებული ენერგიით მმუხტავს.