ბავშვობის აუხდენელი ოცნება და სკოლიდან "გამოყოლილი" სიყვარული

მსახიობი გიორგი ცხადაძე 7 წლის ასაკში უკვე პოპულარული იყო - "ერისიონის" ცნობილი კლიპიდან ქართველ მაყურებელს პატარა ბიჭი კარგად ახსოვს.
ის ახლა 23 წლისაა. სულ ახლახან სერიალში - "ჩემი ცოლის დაქალები" გამოჩნდა. ამბობს, რომ შეყვარებულია. თურმე, პირად ცხოვრებაზე საუბარი არ უყვარს, მაგრამ რჩეულის ვინაობა მაინც გაგვიმხილა.

ბავშვობა
- საერთოდ, ყველა ბავშვი ცელქია, მაგრამ ვფიქრობ, მე გამონაკლისი ვიყავი. როგორც მეუბნებიან, ცელქი და ონავარი არ ვყოფილვარ, პირიქით - სერიოზული და საკმაოდ მოწესრიგებული გახლდით. უფროსი დები მყავს და ვცდილობდი, ჩემი საქციელით მათი თანატოლი ვყოფილიყავი. აქედან გამომდინარე, "ვდიდობდი", დიდი კაცის მანერები მქონდა (იცინის).

- მშობლებისგან შენიშვნას ყველაზე ხშირად, რის გამო იღებდი და შემდგომ თუ ითვალისწინებდი?
- მახსოვს, კომპიუტერული თამაშები ძალიან მიყვარდა და სახლში ძირითადად სულ იმაზე ლაპარაკობდნენ, თუ რამდენ დროს ვატარებდი კომპიუტერთან. ეს ის შემთხვევა იყო, როცა მათ რჩევებს არ ვითვალისწინებდი და ასე ვთქვათ, ვურჩობდი.

- ამ ურჩობისთვის არ გსჯიდნენ?
- ხშირად მსჯიდნენ იმით, რომ გარკვეული პერიოდი კომპიუტერთან მიახლოება მეკრძალებოდა (იცინის).

- როგორი მოსწავლე იყავი? მასწავლებლებს აბრაზებდი?
- სკოლაში არცთუ ისე ბეჯითად ვსწავლობდი, თუმცა, როგორღაც ვახერხებდი, რომ მასწავლებლებს ვყვარებოდი.

- ალბათ, ზრდილობითა და ყოფაქცევით, არა?
- შეიძლება ასეც იყო. უზრდელი ბავშვი მართლა არ ვყოფილვარ. ყოველთვის ვიცოდი, ვის როგორ უნდა მოვქცეოდი.

- ბავშვობაში ვინ გინდოდა, რომ გამოსულიყავი?
- პატარაობაში ტრაქტორისტობაზე ვოცნებობდი. მთელი ბავშვობა სოფელში, ბაბუასთან მაქვს გატარებული. ახლაც სასიამოვნოდ ვიხსენებ იმ პერიოდს. ძალიან მიყვარდა სოფელში ყოფნა. მახსოვს, ბაბუას ყოველ წელს სულ იმის პრობლემა ჰქონდა, რომ ტრაქტორისტს მისთვისაც მოეცალა და მიწა დაეხნა. აქედან გამომდინარე, სულ ვფიქრობდი, - რომ გავიზრდები, დიდ ტრაქტორს შევიძენ და სოფელში მიწას ყველას უფასოდ დავუხნავ-მეთქი.

- მშობლები რა პროფესიის არიან?
- მამა მომღერალია. ოპერის თეატრში, ჯანო კახიძის ანსამბლში მღეროდა. მოგვიანებით "ერისიონში" გადაინაცვლა, სადაც მერე მეც ვმღეროდი. დედა კი პროფესიით პედაგოგია.

პირველი სიყვარული
- სკოლის პერიოდში ვინც მიყვარდა, დღემდე ის არის ჩემი რჩეული. ცნობილი პოეტების ლექსებს ვუკითხავდი და ვატყუებდი, რომ მე დავუწერე (იცინის). ვარდებითა და ლამაზი თაიგულებით უკან დავდევდი და ასე მოვიგე მისი გული.

- გამოდის, დიდი ხანია, შეყვარებული ხარ. შენს გეგმებში დაოჯახება ჯერ არ შედის?
- დაოჯახებას არ ვჩქარობთ. უბრალოდ, ერთად ვართ და ერთმანეთი გვიყვარს. ერთად თავს ბედნიერად ვგრძნობთ.

- ვინ არის შენი რჩეული?
- ჩემი შეყვარებული სალომე ლემონჯავაა. პროფესიით ჟურნალისტი გახლავთ. ბევრი საერთო გვაქვს. დაქორწინებას იმიტომ არ ვჩქარობთ, რომ ჯერ ბევრი რამ გვაქვს გასაკეთებელი. სალომეც და მეც ამჟამად, ჩვენ-ჩვენს პროფესიებზე ვართ კონცენტრირებული. ვფიქრობთ, ყველაფერს თავისი დრო აქვს.

პროფესიული არჩევანი

- მსახიობობა რა ასაკში გადაწყვიტე?
- მსახიობობა ჩემი ბავშვობის ოცნება არ იყო, მაგრამ სცენასთან კავშირი რომ მექნებოდა, ამას ყოველთვის ვგრძნობდი.

- მონაცემები გქონდა?
- დიახ, მსახიობური მონაცემები ბავშვობიდან მქონდა. ოთხი წლისა მამას კონცერტზე ფილარმონიაში ვიყავი და შინ რომ მივედით, ზუსტად ის მიმღერია, რაც მამამ შეასრულა. კიდევ, "ერისიონის" პროექტმა - "ქართული ლეგენდა" შემაყვარა სცენა.

- რა ასაკიდან დადიოდი ცეკვაზე?
- ცეკვა
7 წლიდან დავიწყე, თუმცა ამ სფეროში ბევრი ვერაფერი გამომივიდა (იცინის). ძირითადად, მუსიკა მომწონდა, ბევრ ინსტრუმენტზე ვუკრავ.

- რომელ ინსტრუმენტებზე შეგიძლია დაკვრა?
- ფანდურზე, სალამურზე, გიტარაზე, დოლზე, კახონზე (ესპანური ინსტრუმენტი) და ფორტეპიანოზე დაკვრასაც ვცდილობ... მიმაჩნია, რომ ხელოვანი ადამიანი მუდმივად უნდა იზრდებოდეს და ვითარდებოდეს, იქნება ეს მუსიკალურად თუ - სხვა მიმართულებით, სხვაგვარად ვერაფერს მიაღწევ.

- მიზანდასახული ხარ?
- სხვათა შორის, ვარ. აქამდე რაც მიზნად დავისახე, ეტაპობრივად, ყველაფერი რეალობად იქცა და იმედია, ასეც გაგრძელდება. რაც მთავარია, მიზნის მისაღწევად შრომა არ მეზარება. ხანდახან სიზარმაცეც "შემომეპარება" ხოლმე. თუმცა, რომ არ მოვიტყუო, სიზარმაცეს სერიოზული ზიანი ჩემთვის ჯერ არ მოუყენებია.

- თავს წარმატებულ მსახიობად მიიჩნევ?
- იყო წარმატებული მსახიობი - ძალიან რთულია... წარმატება ჩემთვის, პირველ რიგში, შრომისმოყვარეობას ნიშნავს.

პირველი წარმატება
- ჩემი პირველი წარმატება სადიპლომო ნაშრომია - სარტრის "ჭუჭყიანი ხელები", რომელშიც მთავარი როლი შევასრულე. დიდი მადლობა ნუკრი ქანთარიას და ვატო ჯუღელს ამისთვის. მათგან ძალიან ბევრი რამ ვისწავლე. ის ოთხი წელი, რაც მათთან ერთად თეატრალურში გავატარე, ნამდვილად ნაყოფიერი იყო.

- სერიალ "ჩემი ცოლის დაქალებში" როგორ აღმოჩნდი და რა შეიცვალა ამის შემდეგ შენს ცხოვრებაში?
- სერიალში კასტინგით მოვხვდი. ამ ყველაფერში ეკა მჟავანაძე დამეხმარა, რომელიც ძალიან ბევრ მსახიობს ეხმარება. შეიცვალა ის, რომ დღეს ყველასთვის დუდუს შვილი - თავში ავარდნილი ბიჭი ვარ და მეკითხებიან, სინამდვილეშიც ასეთი ხარო? რა მოხდება შემდეგ და როგორ განვითარდება მოვლენები, არ ვიცი. იმედი მაქვს, "ჩემს" შეცდომას გამოვასწორებ და კარგი ბიჭი გავხდები.

- ვინ არის შენი შემოქმედების ყველაზე კრიტიკული შემფასებელი?
- ჩემი შეყვარებული, ოჯახის წევრები და, რა თქმა უნდა, მეგობრები. მათი რჩევა ჩემთვის მნიშვნელოვანი და გასათვალისწინებელია.

- ამჟამად რა სიახლეა შენს შემოქმედებაში?
- დღეს ახმეტელის თეატრის გუნდი ბრაზილიაში გასტროლზე მივფრინავთ (ინტერვიუ ჩაწერილია 16 აგვისტოს. - ავტ.) - მონაწილეობას მივიღებთ საერთაშორისო თეატრალურ ფესტივალში. სპექტაკლი, რომლითაც ამ ფესტივალზე წარვდგებით, "2+2=2" ბრაზილიელმა რეჟისორმა დადგა. პრემიერა ახმეტელის თეატრში უკვე გაიმართა. იმედია, გასტროლი კარგად ჩაივლის.

ჯანსაღი ცხოვრების წესი
- ყოველ დილით დაახლოებით 10 საათზე ვიღვიძებ. თუ ძილი დამაკლდა, ამ დროს თავს ცუდად ვგრძნობ და არც ისე პროდუქტიული ვარ. ამიტომ ყოველთვის ვცდილობ, დღე-ღამეში 7-8 საათი მაინც მეძინოს.

- მავნე ჩვევები თუ გაქვს?
- იშვიათად ვიღებ ალკოჰოლს. შეიძლება, დაბადების დღეზე, ქორწილში ან მსგავს სიტუაციებში მოხვედრისას ცოტა დავლიო კიდეც. სიგარეტთანაც მსგავსი დამოკიდებულება მაქვს, სისტემატურად არ ვეწევი.

იმიჯი და გემოვნება
- მოგეხსენებათ, გემოვნება მრავალნაირია... ვფიქრობ, ის გარემო, სადაც ყოველდღიურად ყოფნა გიწევს, ასევე ინტერესი თუ შეხედულება, რაც გაქვს, გავლენას ახდენს გემოვნების ჩამოყალიბებაზე. ვფიქრობ, ჩემი გემოვნების ჩამოყალიბებაზეც გარემომ და ირგვლივ მყოფმა ადამიანებმა იმოქმედეს.

დასვენება

- სად დაისვენე ამ ზაფხულს?
- ჯერ ზღვაზე ვიყავი, შემდეგ - მთაში, ყაზბეგში. ჩემთვის იდეალური დასვენებაც სწორედ ეს არის. მთასაც და ზღვასაც თავისი ხიბლი აქვს. საუკეთესო ვარიანტი ალბათ, ჯერ ზღვაზე წასვლა, გართობა და შემდეგ - მთაში დასვენებაა.

წყარო: gzapress.ge