ქალბატონები, რომელთაც წლებმა ვერაფერი დააკლო

გასულ კვირას სოციალურ ქსელში წარსულში ცნობილი ტოპმოდელის ლინდა ევანგელისტას ახალი ფოტოები გავრცელდა. სილამაზით ცნობილი ქალბატონი მისმა ერთგულმა თაყვანისმცემლებმაც ვერ იცნეს. ლამაზმანი, რომელიც ერთდროს სხეულის ფორმებითა და სილამაზით მსოფლიოს აოცებდა, დღეს ერთ ჩვეულებრივ გასუქებულ დიასახლისად გადაქცეულა. მის თვალებში, სამწუხაროდ, ძველებური შუქიც აღარ ჩანს. ლინდას გულშემატკივრების ნაწილი ამტკიცებს, რომ მთელი ცხოვრება დიეტაზე მყოფი და მსოფლიოს ყურადღებით შეწუხებული ყოფილი მოდელი ახლა უფრო ბედნიერად გამოიყურება.

რამდენიმე წლის წინ საზოგადოება ასევე შოკში ჩააგდო ლიკა ქავჟარაძის ფოტოებმა. ულამაზესი მარიტა, რომელიც დღემდე ატყვევებს ეკრანიდან მაყურებელს, კინოს წლების წინ ჩამოშორდა და არავის სჯეროდა, რომ ერთ დროს ულამაზესი მარიტა ასე შეიცვლებოდა.

ლამაზად დაბერებასაც ალბათ ბედი უნდა. უამრავი ფაქტორია, რომელიც ადამიანის გარეგნობაზე ახდენს გავლენას. პირველი მაინც გენეტიკაა, შემდეგ ცხოვრების წესი, გადატანილი ტრავმები და ხშირ შემთხვევაში, მოუწესრიგებელი პირადი ცხოვრებაც, რომელიც ქალების გარეგნობაზე აუცილებლად ტოვებს თავის კვალს.

ამჯერად წარმოგიდგენთ ქართველ და უცხოელ ვარსკვლავებს, რომლებსაც დროის ქარტეხილებმა ვერაფერი დააკლეს და სიბერეშიც ინარჩუნებენ სილამაზეს. უფრო მეტიც, ზოგიერთი მათგანი სიბერეში უფრო გალამაზდა.

იტალიური კინოს შეუცვლელი ვარსკვლავი, 80 წლის სოფი ლორენი ერთ-ერთი მაგალითი გახლავთ იმისა, რომ შეიძლება, ქალმა ამ ასაკშიც დააკარგვინოს თავი ნებისმიერ მამაკაცს. მასზე ოცნებობდნენ, მისთვის იბრძოდნენ, მაგრამ ის მაინც ბევრისთვის მიუწვდომელ ქალად დარჩა, რადგან მთელი ცხოვრება რეჟისორ კარლო პონტის ერთგულია და მამაკაცს ორი ვაჟიშვილი აჩუქა.

ყველა დროის ქართული სცენის დედოფალი ნანი ბრეგვაძე ის გამონაკლისი გახლავთ, რომელსაც წლებმა ვერაფერი დააკლო. პირიქით, მის ფოტოებს თუ გადავხედავთ, ქალბატონი ნანი ასაკის მატებასთან ერთად უფრო გალამაზდა.



მართალია, მისი პირადი ცხოვრება არ ყოფილა მარტივი, ცნობილია, რომ ჯერ კიდევ ახალგაზრდა იყო, როდესაც მეუღლეს დაშორდა, მაგრამ ლეგენდარულმა ქალბატონმა ისე იცხოვრა, რომ არასოდეს გახვეულა სკანდალებში. მისი პირადი ცხოვრება კი ყოველთვის იდუმალებით იყო მოცული და ბოლომდე

ასე დარჩა.

სიაში მოხვდა იტალიური კინოს კიდევ ერთი ლეგენდა, 59 წლის ორნელა მუტი. 15 წლიდან თამაშობდა ფილმებში, მაყურებელმა, გარდა ნიჭიერებისა, უდავო სილამაზითაც შეიყვარა. ორნელა ერთ-ერთია მსოფლიო ვარსკვლავებს შორის, რომელსაც გამორჩეული და ადვილად დასამახსოვრებელი გარეგნობა აქვს.



მსახიობი ასაკშიც ინარჩუნებს ძველებურ ხიბლს და რამდენიმე წლის წინ საკუთარი საიუველირო ხაზიც შექმნა. ამის შემდეგ ბუტიკები გახსნა რომში, მილანში, პარიზში. ორნელა წლების წინ პლასტიკურ ქირურგს გაჰყვა ცოლად, მაგრამ, როგორც ამბობენ, მის უზადო გარეგნობას მეუღლის სკალპელი არ დასჭირვებია.

კირა ანდრონიკაშვილი მსახიობი, ცნობილი ოჯახისა და არისტოკრატიული გვარის წარმომადგენელი ულამაზესი ქალბატონია. ქალბატონი კირას სილამაზე გენეტიკურია. მისი მამიდა ნატო ვაჩნაძე გახლდათ, დედა – ეკატერინე ჯორჯაძე.



არაჩვეულებრივი სახის კანის წყალობით, წლები დღესაც არ ეტყობა. ამბობს, რომ ამისთვის სულაც არ სჭირდება ძვირად ღირებული კოსმეტიკური კრემები. სახის კანს დედის რეცეპტებით უვლის.

ლალი ბადურაშვილი საზოგადოებამ ახალგაზრდობაში ერთი როლით – შორენა კოლონკელიძით გაიცნო. სამწუხაროდ, მისი კინოკარიერა ვერ განვითარდა და დღემდე თითქმის ყველა სატელევიზიო შოუში ამ როლზე უწევს საუბარი.



ულამაზეს ქალბატონს ახალი თაობა, როგორც ნინი ბადურაშვილის ბებიას იცნობს და ახალგაზრდა მომღერალს ყველაზე მეტად მას ამსგავსებენ, რაც ნინისთვის ძალიან დიდი კომპლიმენტია. ლალი ბადურაშვილი ერთ-ერთია ძველი თაობის კინომსახიობებიდან, რომელიც ლამაზად დაბერდა.