„ჩვენი ყანჩელი“ - გია ყანჩელის იუბილისადმი მიძღვნილი კონცერტი

ლეგენდარულ ქართველ კომპოზიტორს გია ყანჩელს 2015 წლის 10 აგვისტოს 80 წელი შეუსრულდა. ეროვნული სიმფონიური ორკესტრისა და ნიკოლოზ რაჭველის ინიციატივით დაიგეგმა საიუბილეო კონცერტების სერია, როგორც საქართველოში, აგრეთვე ევროპაში.

კონცერტების სერია 22 აგვისტოს ბერლინის ისტორიულ დარბაზში ”კონცერტჰაუზში” გაიხსნა, რომელსაც მაესტრო თავად ესწრებოდა.

2015 წლის 28 სექტემბერს რიგით მეორე საიუბილეო კონცერტი ბრიუსელის საკონცერტო დარბაზში შედგა. ღონისძიებამ ხელოვნების სასახლე ”ბოზარში” სრული ანშლაგით ჩაიარა. ბრუსელში წარმოდგენილი პროგრამის მოსმენის შესაძლებლობა 30 ოქტომბერს მესხიშვილის სახელობის თეატრში ქუთაისელ მსმენელსაც მიეცა.

10 ნოემბერს კი გია ყანჩელის 80 წლის იუბილისადმი მიძღვნილი საღამო თბილისის საკონცერტო დარბაზში გაიმართება. ნატო მეტონიძე, ლიზა ბაგრატიონი, მიშა ჯავახიშვილი, ეროვნული სიმფონიური ორკესტრი, სამების საპატრიარქო გუნდი, აფხაზეთის სახელმწიფო კაპელა და გორის ქალთა კამერული გუნდი წარმოგიდგენთ კინოსა და თეატრისათვის შექმნილ შედევრებს.

აღიარებული ალტისტის გიორგი ცაგარელისა და 200-ზე მეტი მუსიკოსის შესრულებით აგრეთვე, აჟღერდება მაესტროს უკვდავი ქმნილება „სტიქსი“.

2015 წელს საიუბილეო კონცერტები დაგეგმილია კიევსა და ბაქოში.

10 ნოემბერის კონცერტის ბილეთები რეკორდული სისწრაფით გაიყიდა, რის გამოც მაყურებელთა თხოვნით დაემატა კიდევ ერთი საღამო 11 ნოემბერს.

პროექტის მხარდამჭერია თბილისის მერიის კულტურული ღონისძიებების სამსახური.
წყარო: ambebi.ge