"წარმოსახვაში უცნობი ქალიც არაერთხელ ვყოფილვარ"

"ერთ დღეს დავფიქრდი, ერთფეროვანი ცხოვრება ძალიან მოსაწყენი იქნებოდა. გამოსავალი მარტივად ვიპოვე, თეატრალურში ჩავაბარე, საკუთარ თავს მივეცი შესაძლებლობა, ერთდროულად რამდენიმე ადამიანის ცხოვრებით მეცხოვრა. ასე გავხდი მსახიობი", - ამბობს სოფო გორელიშვილი. ახლა მის ცხოვრებაში აქტიური შემოქმედებით პერიოდია. პარალელურად, ახალი როლების მოლოდინშია, შემოთავაზება ერთი ქართული ფილმიდან და რუსული პროექტიდან აქვს, დეტალებზე ჯერ ვერ ლაპარაკობს. განიცდის, რომ ბევრი საქმიდან გამომდინარე, ბოლო დროს ვეღარ ახერხებს, დარჩეს აქტიურ მკითხველად. მისი საყვარელი ავტორი დოსტოევსკია, პერსონაჟი - მიშკინი. პრეამბულის მაგიერ - წიგნის სამყაროში ჩემი მეგზური დედა იყო. ძალიან პატარა ასაკში შექსპირის ნაწარმოებებს მაკითხებდა, თანაც - რუსულ ენაზე. შესაძლოა, მაშინ წესიერად ვერც აღვიქვამდი, მაგრამ კმაყოფილი ვარ, ამან გარკვეულწილად ჩემზე გავლენა იქონია. ვწუხვარ, ბევრი საქმიდან გამომდინარე, აქტიური მკითხველი რომ ვეღარ ვარ. ყველაზე ბევრს სტუდენტობის წლებში ვკითხულობდი. ძალიან ვცდილობ, კითხვა ჩემს შვილს შევაყვარო. ჯერ პატარაა, მაგრამ მინდა, წიგნებს ზღაპრებით შევაჩვიო, ილუსტრაციებზე გიჟდება, ძალიან აინტერესებს. დოსტოევსკის შემოქმედება გამორჩეულად მიყვარს. მართალია, მძიმე, მაგრამ საინტერესო საკითხავია. ეს ადამიანი თავისი ბიოგრაფიითაც საინტერესოა. მისი ცხოვრებისეული ამბები გარკვეულწილად შემოქმედებაზეც აისახება. ლიტერატურული პერსონაჟები რეალურ ცხოვრებაში რომ არსებობდნენ, დიდი სიამოვნებით ვიმეგობრებდი დოსტოევსკის მიშკინთან. დანარჩენი ყველა თავისებურად სახიფათო პერსონაჟია. მხატვრული ნაწარმოების კითხვის დროს ხშირად უარყოფითი პერსონაჟებისადმი მეტი ინტერესი მაქვს, შესაძლოა თანაგრძნობის მომენტიც. როდესაც მხატვრულ ნაწარმოებს ვეცნობი, პერსონაჟებთან ერთად, მწერლის მიერ გამოგონილ სამყაროში ვცხოვრობ. მეტსაც გეტყვი, ორჰან ფამუქის "უმანკოების მუზეუმს" რომ ვკითხულობდი, ღამე მესიზმრებოდა. ეს ძალიან ღრმა ემოციური რომანია. როგორც ჩანს, ჩემზე იმდენად დიდი შთაბეჭდილება მოახდინა, რომ წიგნის სამყაროდან ძილის დროსაც კი ვერ გამოვდიოდი. ძალიან მიყვარს ცვაიგი. ჩემს წარმოსახვაში, მისი უცნობი ქალიც არაერთხელ ვყოფილვარ. მისი სიყვარულით მეც შემყვარებია... საერთო პიროვნული თვისებები არაერთ გმირთან აღმომიჩენია. კონკრეტულად ერთ-ერთის დასახელება ძალიან მიჭირს. რატომღაც, ყველა პერსონაჟი, რომელთანაც ჩემს თავს ვაიგივებ, ძალიან დრამატულია, რაღაც უბედურება სჭირს. არ ვიცი, ასე რატომ ხდება. ინტელექტუალური თამაშები ძალიან მიყვარს. სტუდენტობის წლებში, როდესაც სადიპლომო სპექტაკლზე ვმუშაობდი, ხშირად იყო შემთხვევა, რეპეტიციებს შორის 1-2 საათი თავისუფალი დრო მქონდა. ოპერის წინ, ერთი ქალი კროსვორდებს ყიდდა. ყოველდღე ამ ქალს ვსტუმრობდი, კროსვორდები მიმქონდა, ვავსებდი, დრო გამყავდა და თან საინტერესოდ ვერთობოდი. - "რაც უნდა გენიალური, ახალი, ანდა სერიოზული აზრი მოგივიდეს თავში, მაინც რჩება მუდამ ისეთი რამ, რასაც სხვა ადამიანებს ვერასგზით ვერ გადასცემ, თუნდაც მთელი ტომები დაწერო; მუდამ არის რაღაც ისეთი, რაც არაფრის დიდებით არ დაეთანხმება შენი ტვინიდან გადმოსვლას და მუდამ შენთან დარჩება, ისე წახვალ ამ ქვეყნიდან, რომ შენს მთავარ იდეას ვერავის გადასცემ". - დოსტოევსკის რომელ ნაწარმოებში ვხვდებით ამ სიტყვებს? - "იდიოტი". - რა ჰქვია ბრიყვულად გაწეულ სამსახურს, რომელსაც განზრახული სიკეთის ნაცვლად ზიანი და უსიამოვნება მოსდევს? - (ფიქრობს) - მიგანიშნებ, ეს გამოთქმა მას შემდეგ გაჩნდა, რაც კრილოვის იგავ-არაკი "დათვი და მეუდაბნოე" გამოქვეყნდა. - დათვური სამსახური. - "ლიტერატურა ჩემი კანონერი ცოლია, ხოლო მედიცინა - საყვარელი. როდესაც მე ვიღლები ერთ-ერთი მათგანისგან, მივდივარ და მთელ ღამეს ვატარებ მეორესთან". დაასახელე ამ სიტყვების ავტორი. ის ცნობილი რუსი დრამატურგია. - პროფესიით ექიმი ჩეხოვი იყო. - დიახ. ცნობილია, რომ მას რუსეთში ფანების საკმაოდ დიდი არმია ჰყავდა. რას ეძახდნენ მათ? - ანტონოვკებს. - ვინ გახდა 1921 წელს სტამბოლში გამართული მსოფლიო სილამაზის კონკურსის გამარჯვებული? - (ფიქრობს) არ ვიცი, ვინ გახდა? - მიგანიშნებ: ეს პიროვნება ქართველი პოეტის მუზა იყო. ამ პოეტის ერთ-ერთი ცნობილი ლექსი სწორედ მას ეძღვნება. - გალაკტიონის "მერი" ანუ მერი შერვაშიძე? - დიახ. ის კოკო შანელის სახლის სახე იყო. - მართლა? რა საინტერესოა, ეს პირველად გავიგე. - ექიმების აზრით, ის ხელს უშლის კარიესის წარმოქმნას, აძლიერებს ნივთიერებათა ცვლას, აყოვნებს სიბერეს, ამაღლებს ცხოვრების ტონუსს. რა აქვთ ექიმებს მხედველობაში? - ვერ ვხვდები. - მიგანიშნებ, ადამიანის ქმედებაზეა ლაპარაკი, მაგრამ ამას მარტო ვერ გააკეთებ, აუცილებლად გჭირდება პარტნიორი. - ახლა მეტად დამაბნიე, კარიესთან სხვა ადამიანი რა შუაშია? ღიმილი, არა? - კოცნაზეა ლაპარაკი. - ეგ კი მომივიდა აზრად, მაგრამ არ ვთქვი. - მგრძნობელობა ტუჩებზე მეტია თუ თითებზე? - თითებზე, არა? - ცდები, ტუჩებზე 200-ჯერ მეტია. "ღმერთმა შექმნა არც ისე ბევრი სრულყოფილი თავი, ხოლო დანარჩენი დაფარა თმით. ვინ იყვნენ ამ კლუბის წევრები? - მაიმუნები? - არა. ადამიანები იყვნენ, მაგრამ რა საერთო ნიშანი აერთიანებდათ მათ? - ყურადღება რას უნდა მივაქციო? - ვიზუალურ მხარეს. - ვისაც თავზე თმა არ ჰქონდა ანუ მელოტები? - გამოიცანი. ვინ იყო მსოფლიოში პირველი მილიარდერი? - არ ვიცი. - როკფელერი. ის ახალგაზრდობაში ამბობდა: "ორი დიდი სურვილი მაქვს, გამოვიმუშაო მილიონი და ვიცხოვრო 100 წელი". აისრულა თუ არა მან ორივე სურვილი? - მილიარდი გამოიმუშავა, 100 წელი არა მგონია, ეცოცხლა. - 98 წლის ასაკში გარდაიცვალა. ამ ძაღლის ჯიში სად გაჩნდა, უცნობია. ვარაუდობენ, რომ მისი სამშობლო იყო ინდოეთი, საიდანაც მოხვდა საბერძნეთში, იუგოსლავიაში, ვენეციის ყურის სანაპიროზე. ამ ჯიშის სახელი ნაწარმოებია ყურის სანაპიროს სახელიდან. დიდი ხნის მანძილზე ნაკლებად პოპულარული იყო. ინტერესი 1960 წლიდან დისნეის მულტფილმის გამოსვლის შემდეგ გაჩნდა. რომელი ჯიშის ძაღლზეა ლაპარაკი? - დალმატინელზე. - ინგლისში მდებარე ეს უნიკალური სამეფო რეზიდენცია 600 ოთახისგან შედგება და მასში განთავსებული ხელოვნების ნიმუშები, მსოფლიოს მრავალი ცნობილი მუზეუმისთვისაც კი დიდი ფუფუნებაა. რომელ სასახლეზეა ლაპარაკი? - ბუკინგემის სასახლე. - რამდენს იწონის ოსკარის ქანდაკება? - ზუსტად არ ვიცი, მაგრამ დაახლოებით 3-4 კილოგრამამდე იქნება. - 3.18 კგ-ს იწონის. "ოსკარით" დაჯილდოების ცერემონიაზე, გამარჯვებულებს ნანატრ სტატუეტებს ართმევენ და რამდენიმე დღის შემდეგ უბრუნებენ. რატომ? - მასზე მფლობელის სახელი და გვარი რომ ამოიტვიფროს. - მის გამო გი დე მოპასანი საყვარელი ქალაქის დატოვებას აპირებდა. საფრანგეთის მთავრობამ კი მიიღო წერილი, რომელსაც ხელს ინტელიგენციის 40-მდე წარმომადგენელი აწერდა. ისინი წინააღმდეგი იყვნენ პროექტისა, რომელიც შემდგომ მაინც განხორციელდა. - რომელიმე კონკრეტულ პროექტზეა ლაპარაკი? - კონკრეტულ შენობაზე, რომელიც დღეს ქვეყნის სიმბოლოსაც კი წარმოადგენს. - ეიფელის კოშკი საფრანგეთში ბევრს აღიზიანებდა. - რომელი პოეტის ლექსზე შეიქმნა სიმღერა "ქარი გიმღერის ნანასა"? - "...ზღაპარს გიამბობს ჭადარი./ ძეწნამ ალერისთ ამავსო,/ ეჭვებით ნაავადარი.../ საქართველოო ლამაზო,/ "სხვა საქართველო სად არის"? სამწუხაროდ ავტორს ვერ ვიხსენებ. - ანა კალანდაძე. რამდენი გქონია ხელფასი, თუ 20%-ით გაზრდისა და 20 ლარით შემცირების შემდეგ იგივე დაგრჩება? - ანუ ჩემი ხელფასის რაოდენობაა X. გამიზარდეს 20%-ით, მომაკლეს 20 ლარი და იგივე დამრჩა. რა გამოდის, 100 ლარი არ მქონია? - რა თქმა უნდა. 1922 წელს, როცა ეს ცნობილი შოტლანდიელი გამომგონებელი გარდაიცვალა, მისი ხსოვნის პატივსაცემად, 1 წუთით შეწყდა ყველა სატელეფონო საუბარი. საინფორმაციო საშუალებები წერდნენ, რომ იმ დროს ამერიკაში 13 მილიონი ტელეფონი დუმდა. რომელი გამომგონებლის გარდაცვალებაზეა ლაპარაკი? - სავარაუდოდ მასზე, ვინც ტელეფონი გამოიგონა. - დიახ, ეს გამომგონებელი ანდრეი ბელი გახლდა. კაპადოკია მისი უძველესი სახელია. სწორედ აქედან წამოვიდა წმინდა ნინო საქართველოში ქრისტიანობის გასავრცელებლად. სად მდებარეობს ეს ისტორიული ადგილი? - თურქეთში. - "39 საფეხური", "რებეკა", "ჩიტები", "ადამიანი, რომელმაც ზედმეტად ბევრი იცოდა", "ფსიქო"... ვინ არის ამ ფილმების რეჟისორი? - ალფრედ ჰიჩკოკი. - დაბოლოს, დაასრულე აგათა კრისტის ცნობილი გამონათქვამი: "ძალიან დამღლელია იმ ადამიანთან ურთიერთობა, რომელიც ყოველთვის..." - იტყუება. - "...ყოველთვის მართალია".
წყარო: gzapress.ge