ბიკინიში გამოწყობილი ორსული მოდელი მილანის მოდის კვირეულზე

მილანის მოდის კვირეული დამთავრდა და ბევრი სიურპრიზიც დაგვიტოვა. ერთ-ერთი ყველაზე დასამახსოვრებელი - 6 თვის მოდელის საცურაო კოსტიუმების ჩვენების დროს პოდიუმზე გამოსვლა იყო.

თეთრეულის იტალიური ბრენდის, Pin-Up stars-ის შოუმ მსოფლიო მედიაში დიდი ხმაური გამოიწვია (არადა, შეიძლებოდა საერთოდაც შეუმჩნეველი დარჩენილიყო!). ყველაფერი ჭკვიანური პიარ-გათვლის შედეგი იყო: დეფილეს ორგანიზატორებმა გარისკეს და... პოდიუმზე მოდელი რაფაელა ფიკო გამოუშვეს, რომელიც ორსულობის მე-6 თვეში იმყოფება.

მაღალ ქუსლებზე შემომდგარმა გოგონამ შოუს განმავლობაში წარმატებით წარმოადგინა სხვადასხვა საცურაო კოსტიუმი.

24 წლის მოდელი რაფაელა, სხვათა შორის, არა მარტო როგორც მოდელია ცნობილი, არამედ, როგორც იტალიელი ფეხბურთელის, მარიო ბალოტელის შეყვარებულიც. ფერადკანიანი მეამბოხე ბომბარდირის სახელი წინა წლის ევროპის ჩემპიონატის მერე ყველას პირზე ეკერა.

იმის შესახებ, რომ ის მალე მამა გახდება, მარიომ გერმანიასთან მატჩის წინ გაიგო - სასიხარულო სიახლე ფიკომ საყვარელ მამაკაცს ტელეფონით აცნობა. "მან მითხრა, რომ უზომოდ ბედნიერია", - თქვა ერთ-ერთ ინტერვიუში მომავალმა დედამ.

ამ დროისთვის მოდელი და ფეხბურთელი უკვე ერთად აღარ იყვნენ - რაფაელა ჩემპიონატამდე ცოტა ხნით ადრე ბოიფრენდს დაუსრულებელი სასიყვარულო ინტრიგების გამო დაშორდა. ბალოტელი ხომ თავისი მოურჯულებელი ხასიათით არის ცნობილი: ის მსგავს ურთიერთობებს ღალატად არ მიიჩნევდა, იმის მერეც კი, რაც გასულ ზამთარს რაფაელას ცოლობა სთხოვა! დღეს წყვილის ურთიერთობა ისეთივე დაულაგებელია, როგორც ადრე: არშემდგარი ცოლ-ქმარი ხან რიგდება, ხან შორდება და ბავშვის მოლოდინშიც კი არ შეუძლიათ მივიდნენ კომპრომისამდე.

სანამ ფიკო ჟურნალისტებთან საუბრისას ამაყად აცხადებს, რომ მისი მომავალი შვილი ბალოტელის გვარს ატარებს, მარიო... მამობის დამადასტურებელი ტესტის ჩატარებას ითხოვს! ამდენი გარჩევისა და ჩხუბის შემდეგ ფეხბურთელმა გადაწყვიტა, რომ გოგონას, უბრალოდ, უნდოდა, მისი სახელით ესარგებლა. რაფაელა დათანხმდა ანალიზის გაკეთებაზე და განაცხადა: "ფიქრობთ, რომ მდიდარი ფეხბურთელის ცოლობაზე ვოცნებობ? ცდებით. არ მჭირდება მისი ფული. ჩვენ ორივეს გვინდოდა ეს ბავშვი".

იმედი ვიქონიოთ, რომ არეულობა წყვილის ურთიერთობაში მიწყნარდება. მანამდე კი დავტკბეთ სიცოცხლით სავსე ფოტოებით პოდიუმიდან. როგორ მოგწონთ რაფაელას აღნაგობა? სხვათა შორის, ის პირველი მოდელი არ არის, ვინც პოდიუმზე საინტერესო მდგომარეობაში გამოვიდა. მანამდე იგივე გააკეთეს მირანდა კერიმ, ალესანდრა ამბროსიომ და სხვებმა (თუმცა არა 6 თვის ორსულებმა).

ფიკოს გამოსვლა მილანის მოდის კვირეულის ერთადერთი სიურპრიზი არ ყოფილა: Phillipp Plein-ის შოუზე დეფილეს მონაწილეებს შორის მოდელი-ტრანსსექსუალი ლეა T გამოვიდა. თუმცა... დღეს ამით ვიღას გააკვირვებ?