X
  • ტესტი: რას ხატავ ტელეფონზე საუბრისას ან მოსაწყენ თათბირზე?

    ყვავილები, გულები, ვარსკვლავები, კატები, თვალები – რას აღარ ხატავენ ადამიანები, როდესაც საუბრობენ ტელეფონით ან იმყოფებიან თათბირზე. ხატავენ და ვერც კი ხვდებიან, რომ მათი "შედევრები" შესაძლებელია შეფასდეს ფსიქოლოგიისა და გრაფოლოგიის თვალსაზრისით.


    სწორხაზოვანი ფიგურები

    მნიშვნელობა არ აქვს, როგორ არის შესრულებული ნახატი: მოცულობით გამოსახულება 3-D ეფექტით, თუ ყველაზე პრიმიტიული კვადრატები - სამკუთხედები - ხუთკუთხედები მეტყველებს, რომ მისი ავტორი არის ძალზედ ორგანიზებული ადამიანი. თუ გეომეტრიული ფორმები ერთმანეთს კვეთს, ერთმანეთზეა გადადებული, ეს იმას ნიშნავს, რომ რთული სიტუაციიდან გამოსავალი ჩიხში მოექცა.

    მნიშვნელოვანია შეაფასოთ ასევე ხაზის სისქე - მსუყე, მკვეთრი შტრიხები იმაზე მიუთითებს, რომ "მხატვარი" ძლიერია და შეუძლია საკუთარი მიზნების განხორციელება. თუ დაწოლა იმდენად დიდია, რომ ნახატი ფურცელზე ამოტვიფრულს ჰგავს, მაშინ არა მარტო უნდა მოადუნოთ ხელი, რომლითაც ფანქარი გიჭირავთ, არამედ ცხოვრებისგან სიამოვნება უნდა მიიღოთ ზუსტად აქ და ახლა, იმის მაგივრად, რომ დაძაბულმა იაროთ დასახული მიზნისკენ.

    ყვავილები - ორნამენტები

    გვირგვინებს ვარდებისგან, ტიტების შეკვრას, გვირილებსა
    და სხვა ყვავილებს, ისეთებსაც კი, რომლებიც მცენარეების ატლასებში საერთოდ არ მოიძებნება, ხატავენ კომუნიკაბელური ადამიანები, რომლებთანაც მარტივი და მოსახერხებელია განიხილოთ ნებისმიერი პრობლემა, იცინოთ და იჭორაოთ კიდეც.

    ყურადღება მიაქციეთ დეტალების მოხაზულობას: რაც უფრო ზედმიწევნით არის ნახატი შესრულებული, მით მრავალმხრივი ინტერესები აქვს მის ავტორს. თუ ყვავილების გარდა კომპოზიციაში ბალახი, ჭიანჭველები ან ხეებიც არის დამატებული, შესაძლებელია, ვივარაუდოთ, რომ თქვენს წინაშე განსაკუთრებით პოზიტიური ადამიანია.

    აბსტრაქციონიზმი

    სურათებს კანდინსკისა და მალევიჩის სტილში ხატავენ ძალიან კრეატიული ადამიანები, რომლებიც მზად არიან, უარი თქვან პირად ბედნიერებაზე და აკეთონ მნიშვნელოვანი, საჭირო, მაგრამ ძალიან მოსაწყენი საქმე. აბსტრაქტული ჩანახატები - სტრესთან ბრძოლის შესანიშნავი საშუალებაა. რაც უფრო ფანტაზიით არის ნახატი შესრულებული, მით ემოციურია მისი ავტორი.

    გარდა ამისა, კრეატიული ჩანახატების ავტორები ვერ იტანენ, როცა ცდილობენ მათ გამოტეხვას ან რაიმე საიდუმლოს გამხელას ათასნაირი ხრიკით - ისინი ამჯობინებენ, შეინახონ თავიანთი აზრები და საიდუმლოებები თავისთან.

    თვალები

    ადამიანები, რომლებიც ხატავენ თვალებს, სხვაზე მეტად მიდრეკილნი არიან ფილოსოფიური მსჯელობისა და ფიქრებისკენ. რამდენად გასაკვირიც უნდა იყოს, სწორედ "თვალები" გამოხატავს იმას, რამდენად კმაყოფილია ადამიანი თავისი სამუშაოთი. თუ ნახატი ფურცლის ზედა ნაპირშია მოთავსებული, მაშინ მისი ავტორი პერსპექტიულია და/ან სავსეა საინტერესო პროექტებითა და იდეებით.

    თუ პირიქით, ნახატი ქვედა კიდეშია მოთავსებული, მაშინ, რბილად რომ ვთქვათ, მას ამჟამინდელი სამუშაო განსაკუთრებული ენთუზიაზმით არ ავსებს. გარდა ამისა, ამ ნახატის მიხედვით შესაძლებელია ადამიანის ტემპერამენტის განსაზღვრა - მარცხნივ მიმართულ თვალებს ხატავენ ისინი, ვინც ნელა და ზედმიწევნით მიდის ფინალისკენ. მარჯვნივ მიმართულს, პირიქით, ადამიანები - ენერჯაიზერები, ვის ხელშიც ყველაფერს ცეცხლი უკიდია.

    ცხოველები

    ადამიანი, რომლის უბის წიგნაკში მთელი ზოოპარკია ჩახატული, საკუთარ თავს ერთი მთლიანის ნაწილად მიიჩნევს და კარგ მოთამაშედ ითვლება ჯგუფში. ასეთ ადამიანებს შეუძლიათ მოსმენა, სუსტის დაცვა და გამხნევება, ლიდერის გვერდში დგომა. თუ უფრო კონკრეტულ გამოსახულებებს გამოვყოფთ, მაშინ კატა - ეს იმის ნიშანია, რომ ადამიანს სიახლოვე აკლია; ჩიტები თავისუფლებისა და უსაფრთხოებისკენ სწრაფვას აღნიშნავს; ნიანგები - ლიდერობისკენ ლტოლვას; სპილოები კი - აბსოლუტურ უშიშროებას, ყველაზე მკაცრი უფროსის მიმართაც კი.

    გულები

    გული - არის ნახატი, რომელსაც ყველაზე ხშირად ხატავენ ლაპარაკში ან მოსმენაში გართული ადამიანები. აუცილებელი არ არის, იყო ფსიქოლოგი იმისათვის, რომ მიხვდე, რისი განსახიერებაა ეს ფიგურა: როგორც წესი, ეს ან ახალი რომანტიკული ურთიერთობების წყურვილია, ან ახალი ვნებიანი რომანის დასაწყისი, ის დრო, როცა თავში მხოლოდ ერთი აზრი გიტრიალებს - "როდის ვნახავ".

    დააკვირდით, რა ფორმის გამოვიდა გული: რაც უფრო მომრგვალებულია და მასიური გული, მით ემოციურია მისი ავტორი. თუ მთელი ფურცელი გულებით არის მოხატული, "შედევრი" ზედმეტად მგრძნობიარე ადამიანის მიერ არის შესრულებული. ის ბრაზდება ყველაზე და ყველაფერზე, ხანდახან კი უმიზეზოდაც.

    თუ ნახატი სქემატურად არის შესრულებული - ცალკე შტრიხებით, მაშინ თქვენს წინაშე არის ადამიანი, რომელიც აგრესიისკენ არის მიდრეკილი. ის, პირველ რიგში, ყოველთვის საკუთარ თავზე ფიქრობს. თუ გულის ფორმა უფრო სამკუთხედს მოგაგონებთ, მაშინ ამ ესკიზის ავტორი საკუთარ თავში ჩაკეტილია და საკუთარ სისუსტეებს ზედმიწევნით მალავს.     წყარო

    2 371 ნახვა
    GOGATV