სოფო ბედია: გამირისკავს, ოღონდ - უაზროდ არა

შეიძლება თუ არა ქალი-მძღოლის ნდობა

სოფო ბედია 2 წელია, საჭეს მართავს. მიიჩნევს, რომ უკვე საკმაოდ მოწესრიგებული და კარგი მძღოლია. ავტომობილი ”ნისან მურანო” 2 წლის წინ, მომავალმა მეუღლემ - მიშა მესხმა აჩუქა. სოფოს ეს მანქანა ისე მოსწონს, რომ ჯერჯერობით, მის შეცვლაზე არც კი ფიქრობს.



- უკვე საკმაოდ თავდაჯერებული მძღოლი ვარ.
- ბევრი იწვალე, მართვის მოწმობა რომ აგეღო?
- სულ ოთხი პრაქტიკული გაკვეთილი გავიარე, თეორია კი ორ კვირაში ვისწავლე. პირველსავე გასვლაზე ჩავაბარე გამოცდა. მახსოვს, ძალიან გახარებული და ბედნიერი ვიყავი. მეგონა, რაღაც დიდი საქმე გავაკეთე. ჩემი ”ნისან მურანო” ძალიან მომწონს და მიყვარს კიდეც (იღიმის).
- საჭეს პირველად რომ მიუჯექი, რა შეგრძნება დაგეუფლა?
- პირველ რიგში, მივხვდი იმას, რომ დრო ტყუილად დამიკარგავს. ვიდარდე, მართვის მოწმობა აქამდე რატომ არ ავიღე-მეთქი?
- სისწრაფე გიყვარს? პატრულს სიჩქარის გადაჭარბების გამო თუ დაუჯარიმებიხარ?
- სისწრაფე მიყვარს, მაგრამ რისკიანი არ ვარ! ქალაქში სწრაფად არ დავდივარ, უფრო - ტრასაზე და მაშინაც ვცდილობ, ზომიერების გრძნობა არ დავკარგო. მხოლოდ ერთხელ დამაჯარიმა პატრულმა სიჩქარის გადაჭარბების გამო.
- ცხოვრებაშიც არასდროს გაგირისკავს?
- გამირისკავს, ოღონდ - უაზროდ არა. ვფიქრობ, ადამიანს წინდაუხედავი საქციელი აუცილებლად, სადღაც გადაჩეხს.
- მართვის მოწმობის აღების შემდეგ, პირველად ყველაზე შორ მანძილზე სად წახვედი?
- მართვის მოწმობა ავიღე ივლისში და 2 კვირაში ბათუმში წავედი. შიშის გრძნობა ნამდვილად არ მქონია, უბრალოდ, დაძაბულობას ვგრძნობდი. როცა ფრთხილი, დაკვირვებული და მოწესრიგებული ადამიანი ხარ, რთული არაფერია. დამწყებისთვის ავტობანზე გაცილებით იოლია მანქანის მართვა, ვიდრე აქ, ქალაქში.
- თავს მოწესრიგებულ მძღოლად მიიჩნევ, არა?
- ყოველ შემთხვევაში, ამას ვცდილობ და წესებსაც არასდროს ვარღვევ.
- საავარიო სიტუაციაში არ აღმოჩენილხარ?
- ჯვარი მწერია და ავარიაში არ მოვყოლილვარ. იმდენად ფრთხილი ვარ, რომ ყველაფრის წინასწარ გაანალიზებას ვცდილობ და ასეთ დროს უფრო იოლია საფრთხის თავიდან აცილება.
- სადმე მიუვალ ადგილას რომ გაგიფუჭდეს ავტომობილი, როგორ მოიქცევი? საბურავის დამოუკიდებლად გამოცვლას თუ შეძლებ?
- არა, საბურავს ვერ გამოვცვლი. ეს არადროს დამჭირვებია ანუ ექსტრემალურ სიტუაციაში არასდროს მოვხვედრილვარ და შესაბამისად, არ ვიცი, ეს როგორ უნდა გავაკეთო. ალბათ, ვინმეს დახმარებას ვთხოვ.
- შუქნიშანზე გაჩერებული, მაკიაჟს ისწორებ?
- არა, საჭესთან უკვე მაკიაჟით ვზივარ და არაფრის შესწორება არ მჭირდება ხოლმე (იცინის).
- რომელია შენი ოცნების ავტომობილი?
- ძალიან მომწონს ”რეინჯ როვერი”, ”იქს-6” და ”პანორამა”. ისე კი, ”მერსედესის” ფანი ვარ. ვფიქრობ, ამ მარკის ავტომობილი გამორჩეულად დახვეწილი და ელეგანტურია...
- ტანსაცმელი, ფეხსაცმელი და სხვა საჭირო ნივთები თუ დაგაქვს ავტომობილით?
- კი, რაც შეიძლება დამჭირდეს, ყველაფერს მანქანაში ვინახავ. ფეხსაცმელიც მიდევს, სამოსიც და კიდევ ათასი რამ (იღიმის).
- ავტომობილი ხელით თუ გაგირეცხავს?
- არა, ასე არასდროს მოვქცეულვარ.
- როდესაც საჭეს მართავ, მძღოლი მამაკაცები თუ გითმობენ გზას?
- დიახ, ხშირად მითმობენ გზას, რაც მიხარია და მსიამოვნებს. ეს ელემენტარულად, ქალისადმი პატივისცემის გამოხატვაა, სხვა - არაფერი.
- მანქანა შენთვის ფუფუნების საგანია თუ უბრალოდ, გადაადგილების საუკეთესო საშუალება?
- ავტომობილი ჩემთვის ყველაფერია! მეხმარება გადაადგილებაში და თან, ყველანაირ კომფორტს მიქმნის.
- მეგობრები რას გეუბნებიან, როგორი
მძღოლი ხარ?
- საკმაოდ კომფორტული მძღოლი ვარ. არავის ვანერვიულებ, დავდივარ მშვიდად, წყნარად და ვცდილობ, ჩემი ავტომობილის სალონში მსხდომებმა თავი დაცულად იგრძნონ.
- შენი ავტომობილით მგზავრობისას, ახლობელმა ადამიანებმა რა წესები უნდა დაიცვან?
- არანაირი წესები და კანონები არ მაქვს. ჩემი მანქანით შეგიძლიათ მგზავრობა წესების გარეშე...
- ავტომობილში რა მუსიკას უსმენ?
- გემოვნებიან მუსიკას, ”პოპს” ”ჯაზს” და რა თქმა უნდა, ლამაზ ქართულ სიმღერებს!
- ”სითი პარკს” არასდროს წაუყვანია შენი ავტომობილი?
- კი, ერთხელ წაიყვანეს. ზუსტად 5 წუთით მყავდა მანქანა გაჩერებული და უკან მიბრუნებულს, ადგილზე რომ არ დამხვდა, ძალიან გავბრაზდი, მაგრამ სიბრაზე რას მიშველიდა (იცინის)?
- ეთანხმები სტერეოტიპს, რომ ქალები ცუდი მძღოლები არიან?
- რა სისულელეა! რა თქმა უნდა, ამას არ ვეთანხმები!
- შენი აზრით, რა აღიზიანებთ მამაკაცებს ქალ მძღოლებში?
- კაცები ცოტა არ იყოს, ეგოისტები არიან. არ მოსწონთ, რომ მანდილოსნებს ყველაფერი კარგად გამოგვდის, მათ შორის - ავტომობილის მართვაც.
- ექსტრემალურ სიტუაციებში მოხვედრილხარ? ასეთ დროს თავი როგორ დაგიძვრენია?
- კი, მოვხვედრილვარ და სიტუაციიდან სიფრთხილისა თუ გამჭრიახობის წყალობით, მშვიდობით გამოვმძვრალვარ.
- მანქანის მოვლა თუ გიყვარს?
- რა თქმა უნდა, მიყვარს. ჰოდა, ვინაიდან კარგად ვუვლი, ისიც ერთგულად მემსახურება, ჯერ არ გავუწბილებივარ.
- რას ურჩევ დამწყებ მძღოლებს?
- ვურჩევ, სიფრთხილე არ დაივიწყონ, იარონ საშუალო სიჩქარით და რაც ყველაზე მნიშვნელოვანია, აკონტროლონ სიტუაცია სარკეების მეშვეობით.
- მეუღლე, როგორც მძღოლს, როგორ გაფასებს?
- თავიდან მაკრიტიკებდა ხოლმე. დროთა განმავლობაში კი მიხვდა, რომ უკვე შეიძლებოდა ჩემი ნდობა და ახლა მშვიდად მიზის ხოლმე გვერდით.
- საჭის მართვის დროს მობილურით სარგებლობ?
- არა, რადგან ზუსტად ვიცი, ასე რომ მოვიქცე, ყურადღება გამეფანტება და საფრთხეს შევუქმნი არა მხოლოდ საკუთარ თავს, არამედ სხვებსაც. ყველას ვურჩევ, საჭის მართვის დროს მობილური ტელეფონით არ ისაუბრონ. გაუფრთხილდნენ სხვა მძღოლებსაც და საკუთარ თავსაც.
- ავტომობილში ყველაზე დიდ კომფორტს რა გიქმნის?
- კარგი მუსიკა და მეგობრები, რომლებიც გზადაგზა მართობენ.
- ახლო მომავალში ავტომობილის გამოცვლას აპირებ?
- გამოცვლას, რა თქმა უნდა, ვაპირებ, მაგრამ ჯერჯერობით, გაყიდვა მენანება. კარგად მემსახურება, არაფერს ვუჩივი. ვნახოთ, მომავალში რას გადავწყვეტ.
- საჭესთან მჯდომი გაბრაზებას როგორ გამოხატავ?
- ხშირად ვბრაზდები, როცა მძღოლები ”ნაგლობენ”. ჰოდა, ასეთ დროს ჩემთვის ვბურტყუნებ ხოლმე.
წყარო: ambebi.ge