ტემპერამენტიანი, თავნება და "ფეთქებადი" მსახიობი გამოწვევების პირისპირ

"რთულია, მაგრამ ყოველთვის საკუთარ თავს ვეჯიბრები"

"ტემპერამენტიანი, თავნება და "ფეთქებადია". ის ერთგული მეგობარი, მაგრამ სახიფათო მეტოქეა, ძალზე ცვალებადი ხასიათით გამოირჩევა. ასევე ცნობისმოყვარეა. ზოგი მიიჩნევს, რომ ყველაფერში ცხვირის ჩაყოფა უყვარს. შეუძლია იყოს გულუხვი, მაცდური, სასტიკი - გააჩნია მიზანს და სიტუაციას, რომელიც იმ წუთში აქვს დასახული. სასიყვარულო "ფრონტზე" განვითარებული მოვლენების შესაბამისად, ის ან მზესავით ანათებს, ან დარდისგან კვდება", - ასე ახასიათებენ ასტროლოგები მაიმუნის წელში დაბადებულ კირჩხიბს, ეს კი მსახიობ ანდრია გველესიანის ზოდიაქოს ნიშანია.


- ასტროლოგიით დიდად არ ვინტერესდები, მაგრამ მეგობარმა პირადი რუკა გამიკეთა და ჩემი ნიშნის დახასიათებიდან ზოგიერთი დეტალი ჩემს ხასიათს ემთხვევა.

- "ცვალებადი ხასიათით გამოირჩევა".
- არ ვიცი, რამდენად ცვალებადი ხასიათი მაქვს, მაგრამ დაკვირვებული ვარ. ჩემთვის ორ სასურველ ნივთს შორის არჩევანი ერთზე თუ უნდა გავაკეთო, ამ შემთხვევაში, გადაწყვეტილების მიღება მიჭირს - ამას "ვირის სინდრომს" ეძახიან.

- "ყველაზე რთულ პრობლემებსაც კი იოლად უმკლავდება, ჭკვიანი და მოხერხებულია".
- წინააღმდეგობები, პრობლემები არ მთრგუნავს. სირთულეების გადალახვა პიროვნულად მზრდის. 23 წლის გახლავართ, მაგრამ ჰგონიათ, რომ ბევრად მეტის ვარ.

- "ზოგჯერ გაუბედაობითა და ყოყმანით გამოირჩევა".
- გაუბედაობასთან დაკავშირებით, საკუთარ თავზე ბევრი ვიმუშავე. ვფიქრობ, რომ დღეს არც გაბედულება მაკლია და თავდაჯე­რებულობაც მაქვს. თავდაჯერებულობის გარეშე არაფერი გამოვა, წინ ვერ წაიწევ, წარმატებული ვერ გახდები. მე მჯერა საკუთარი თავის.

- "ტემპერამენტიანი, თავნება და "ფეთქებადია".
- როგორი სიზუსტით აქვთ აღწე­რილი. მე მუდმივად ვმუშაობ საკუთარ თავზე. "ფეთქებადი" ხასიათი არ მომწონს და ვცდილობ, გამოვასწორო. სხვათა შორის, "ცეკვავენ ვარსკვლავებში" საკუთარ თავზე მუშაობის შედეგს ვგრძნობ. მონაწილეები მეუბნებიან, რომ უკონფლიქტო ვარ, ბევრისთვის ჩემ­თან ურთიერთობა კომფორტულია. ასეთი სიტყვების მოსმენა მიხარია. კონფლიქტს ყოველთვის ვერიდებოდი, მაგრამ წარსულში იყო შემთხვევები, როცა ემოციებს ვერ ვთოკავდი.

- თავნება რამდენად ხარ?
- ჩემი აზრით, დიდად თავნება არ ვარ, მაგრამ ახლობლებს რომ ჰკითხო, მათ შეიძლება, ეს ნაწილობრივ დაადასტურონ და ისიც თქვან, ცოტათი ეგოისტიც არისო.

- წყენის გულში ჩადება გჩვევია?
- არა. წყენა შეიძლება, 5 წუთში აღარ მახსოვდეს, გულში არ ვიტოვებ. ლავირების უნარიც მაქვს.

- "ძალიან ცნობისმოყვარე ადამიანია. ზოგი თვლის, რომ ყველაფერში ცხვირის ჩაყოფა უყვარს".
- ცნობისმოყვარე ვარ მხოლოდ ჩემს საქმეში. სხვის ცხოვრებაში ცხვირი არასდროს ჩამიყვია და ვინც კარგად მიცნობს, ამას დაადასტურებს. არავის ცხოვრებაში ჩარევის სურვილი არ მქონია და ამით ბედნიერი ვარ. ჩემი საქმე თავზე საყრელად მაქვს, და სხვისით აღარ ვინტერესდები.

- ავანტიურისტი ხარ?
- არ ვიცი. არა, არ მგონია, დიდი დოზით ვიყო.

- როგორ ფიქრობ, წარმატებული რის ხარჯზე ხარ?
- თავდაპირველად, ჩემი წარმატება იღბალმა და ნიჭიერებამ განაპირობა. ახლა ძალიან ბევრს ვშრომობ. ყველა საქმეს, რომელსაც ხელს მოვკიდებ, მთელი სერიოზულობით ვუდგები და თავიდან ბოლომდე ვიხარჯები. ჩემი სურვილი იყო, რომ მსახიობი და მომღერალი გამოვსულიყავი, ეს არავის დაუძალებია. შეიძლება ითქვას, თვითნასწავლი მომღერალი ვარ. ბავშვობაში ჯანო კახიძის კაპელაში დავდიოდი, მაგრამ ვოკალის პედაგოგი არ მყოლია. მიყვარს საქმე, რომელსაც დღეს ვემსახურები.

- ასტროლოგები თვლიან, რომ შენ წარმატებული ხარ ამბიციური ბუნების

ისეთ სფეროში ვარ, აქ პირველი თუ არ იქნები, მაშინ საქმეს საერთოდ უნდა ჩამოშორდე. ლიდერობა მიყვარს. რთულია, მაგრამ ყოველთვის საკუთარ თავს ვეჯიბრები. ამბიციური ვარ სიმღერის დროს, როლის შესრულებისას - ამის გარეშე რამეს მივაღწევ? იმასაც ვაცნობიერებ და ვაკონტროლებ, რომ ამბიციები არაჯანსაღ ფორმაში არ გადაიზარდოს.

- "მოსწონს ფლირტი და მარტივად იქცევს სხვის ყურადღებას".
- ფლირტის მოყვარული თინეიჯერობის წლებში ვიყავი. მგონია, რომ ეს ეტაპი ყველა ახალგაზრდის ცხოვრებაშია.

- "ის კარგად ახერხებს გრძნობებით მანიპულირებას".
- ურთიერთობებში ყოველთვის გულწრფელი ვარ. გრძნობებით არასდროს მითამაშია.

- "სასურველი ადამიანის მოხიბვლა წამში შეუძლია".
- ეს გადამეტებულად ნათქვამია. ვერავინ იტყვის, რომ საპირისპირო სქესის მოხიბვლის წარუმატებელი შემთხვევა არ ჰქონია.
- "მაიმუნისთვის უდიდესი სიყვარული მოდის გონებით და არა - გულით".
- ჩემთვის იდეალურია, როცა გული და გონება თანხვედრაშია. სამწუხაროდ, გულით უფრო ხშირად ვიღებ გადაწყვეტილებებს, ვიდრე - გონებით.

- სამწუხაროდ, რატომ?
- ყოფილა შემთხვევა, რომ დავუზარალებივარ. რაღაც მომენტში, გონების ჩართვა მეტად საჭიროა. მიუხედავად ყველაფრისა, დიდი პატივს ვცემ ადამიანებს, რომლებიც გულის კარნახით მოქმედებენ. გულიანი ადამიანები მიყვარს.
- "სასიყვარულო ურთიერთობაში ერთგულია და ყველა დეტალს პასუხისმგებლობით ეკიდება".
- კი, ნამდვილად ასეა.

- "სასიყვარულო "ფრონტზე" განვითარებული მოვლენების კვალდაკვალ, ის ან მზესავით ანათებს, ან დარდისგან კვდება".
- კი, ასეა, რადიკალისტი ვარ. შუალედური არაფერი შემიძლია: ან ვანათებ და გიჟივით ვარ, ან - არა.

- ახლა როგორი მდგომარეობა გაქვს, ანათებ?
- ვანათებ, მაგრამ პირად ცხოვ­რებაზე ლაპარაკი არ მინდა.
- "მას შეუძლია იყოს გულუხვი, მაცდური, სასტიკი - გააჩნია მიზანს და სიტუაციას, რომელიც იმ წუთში აქვს დასახული".
- ჩემში ბევრნაირი თვისებაა თავმოყრილი და ეს პროფესიაში ძალიან მეხმარება. როდის რომელი თვისების წინ წამოწევა და ამუშავება დამჭირდება, არავინ იცის. მაგრამ ეს იმას არ ნიშნავს, რომ სასტიკი ვარ ან ყოველთვის გულუხვი. სისასტიკე ძალიან არ მომწონს. აგრესიულიც ნაკლებად ვარ.

- "იმავე წარმატებით ხარჯავს ფულს, როგორც გამოიმუშავებს".
- წარმატებით ვერ გამოვიმუშავებ. შემგროვებელი არასდროს ვყოფილვარ. მხოლოდ ერთი შემთხვევა მახსენდება: ბავშვობაში ყულაბა მქონდა იმისთვის, რომ დრინი მეყიდა. დრინი კი 18 ლარი ღირდა.

- "მას არ უყვარს სხვაზე დამოკიდებულ მდგომარეობაში ყოფნა. არის შემთხვევები, როცა დახმარების მიღებაზე უარს ამბობს, თავად კი სხვებს სიამოვნებით ეხმარება".
- მართალია, ასეთი შემთხვევა ჩემს ცხოვრებაში არაერთხელ ყოფილა. ძალიან ახლოს უნდა იყო ადამიანთან, ფული რომ სთხოვო. ზოგჯერ შეიძლება, ოჯახის წევრთანაც მოგერიდოს. ვინმეს ვალი რომ მქონია, ღამეები არ მძინებია იმაზე ფიქრით, რომ გადახდა არ დამგვიანებოდა. ზოგჯერ მეუბნებიან, რომ მდგომარეობას ვართულებ. ესეც ალბათ, ჩემი ემოციური ბუნებიდან გამომდინარეა.

- "კირჩხიბის ზოდიაქოს ნიშნით ყველაზე ამოუცნობი, მგრძნობიარე ადამიანები იბადებიან. მას მთვარე მართავს. აქედან გამომდინარე, ამ ადამიანის ხასიათი მთვარის ფაზებზეა დამოკიდებული".
- ძალიან ხშირად დავფიქრებულვარ, მზის ამოსვლა და დილა უფრო მიყვარს თუ საღამო და მთვარიანი ღამე? ორივესადმი სიყვარული ძალიან დიდი დოზითაა. არაფერი მირჩევნია იმის ნახვას, როგორ ამოდის მზე - ეს სიცოცხლით მავსებს; მომწონს იმის ცქერა, მთვარე როგორ ამოდის და დაცურავს ცაზე, ღამის იდუმალება მიზიდავს.

- "ის ერთგული მეგობარი, მაგრამ სახიფათო მეტოქეა".
- გამოწვევების არ მეშინია, ბრძოლისუნარიანი ვარ. სულელურ ნაბიჯს არ გადავდგამ, მაგრამ გამოწვევებსაც თავისებური ხიბლი აქვს. რაც შეეხება ჩემს საიმედო მეგობრობას: ყოველგვარი ყალბი თავმდაბლობის გარეშე შემიძლია ვთქვა, რომ ერთგული და საიმედო მეგობარი ვარ.