• თიკა ჯამბურია თავის სიყვარულზე, შეცდომებსა და ტკივილზე...

    "ვიბნევი, როცა თვალებში მიყურებს ის ადამიანი, რომელსაც ვეპრანჭები"

    მომღერალი თიკა ჯამბურია ბოლო პერიოდში მსმენელის წინაშე ბენდთან - "ლაბორატორია" ერთად გამოდის. როგორ აღმოჩნდა ის რობი უილიამსის კონცერტზე, რას გააკეთებდა, ძალიან ბევრი ფული რომ ჰქონდეს, როდის იბნევა და როგორ გამოდის მდგომარეობიდან, როდესაც დაძაბული პერიოდი აქვს? - ამ ყველაფერს მის მიერ დასრულებული წინადადებებიდან შეიტყობთ.

    - დაბადების თარიღი...
    - ...1991 წლის 4 მარტი.
    - ბავშვობაში მინდოდა გამოვსულიყავი...
    - ...პრეზიდენტი. მსურდა, ბევრი კარგი საქმე გამეკეთებინა და მაშინ ეს ჩემს წარმოდგენაში მხოლოდ პრეზიდენტს შეეძლო.
    - ცხოვრებას თავიდან რომ ვიწყებდე...
    - ...რა თქმა უნდა, ზოგიერთ რამეს შევცვლიდი. არ მჯერა ადამიანების, რომლებიც ამბობენ, - იმავენაირად ვიცხოვრებდი, არაფერს შევცვლიდიო. დავიჯერო, წარსულში ერთი ისეთი შეცდომა მაინც არ და­უშვიათ, რომელსაც არ ნანობენ?
    - ჩემს წარმატებაში ყველაზე დიდი წვლილი მიუძღვით...
    - ...მშობლებს. ჩემი სურვილი იყო მემღერა და ისინი ყოველთვის მხარში მედგნენ.
    - ბედნიერი ვარ, რომ...
    - ...მყავს ნინა. არც კი ვიცი, ის ემოცია, რომელიც ნინასთან მაკავშირებს, როგორ უნდა გადმოგცე. მის დაბადებას მოუთმენლად ველოდებოდი. მაინტერესებდა, როგორი იყო, ვის ჰგავდა და ა.შ. დაიბადა და ვნახე ყველაზე ლამაზი გოგო, რომელიც ცხოვრებაში მინახავს.
    - ნინა სიმღერის მიმართ...
    - ...ინტერესს დიდად არ ამჟღავნებს, მაგრამ კარგი ხმა და სმენა აქვს. მინდა, რომ იმღეროს. საკუთარი სურვილით იშვიათად თუ წაიმღერებს ხოლმე.
    - თვისება, რომელიც ჩემში ყველაზე მეტად მომწონს...
    - ...არანორმალურად ერთგული და ძალიან თბილი ვარ.
    - თვისება, რომელიც არ მომწონს და ვცდილობ, გამოვასწორო...
    - ...სიჯიუტეა. მე რომ თბილი ვარ, ეს რამდენადაც კარგია, იმდენად ცუდიც არის, რადგან ხანდახან მაზარალებს.
    - ვჯიუტდები, როცა...
    - ...კონკრეტული მიზეზის დასახელება არ შემიძლია.
    - ჩემზე ამბობენ...
    - ...რომ ძალიან პოზიტიური ადამიანი ვარ - ამაზე მეგობრები, ოჯახის წევრები, ყველანი თანხმდებიან.
    - დაშვებულ შეცდომებს...
    - ...ძალიან ხშირად ვიმეორებ. სულ მგონია, ადამიანს ურთიერთობაში ერთხელ რომ შეეშლება, ის მეორედ იმავეს აღარ გააკეთებს. ყველას ვენდობი და გამოდის, რომ ეს ჩემი შეცდომაა. ადამიანებისგან იმედგაცრუება ხშირად მქონია. შეიძლება ითქვას, რომ ამას ყოველდღიური ხასიათი აქვს.
    - საკუთარ შეცდომებზე ვისწავლე...
    - ...ვერაფერიც ვერ ვისწავლე.
    - დათმობა შემიძლია, თუ...
    - ...მიღირს; თუ ის ადამიანი ჩემთვის ძვირფასია.
    - თავს ვერ ვიკავებ და ვტირი, როცა...
    - ...ვამბობ, ძალიან ძლიერი ადამიანი ვარ-მეთქი, მაგრამ ხშირად ვტირი, მათ შორის - სხვების თანდასწრებით. გულს რომ მტკენენ, მეტირება. ჩემი ხასიათის ერთი პლუსი კიდევ ის არის, რომ წყენა მალე მავიწყდება. ეს თვისება რომ არ მქონდეს, ამდენ ტკივილს ვერ გავუძლებდი.
    - ვიბნევი, როცა...
    - ...თვალებში მიყურებს ადამიანი, რომელსაც ვეპრანჭები, რომელიც ძალიან მომწონს.
    - ამ ბოლო დროს ასეთი დაბნეულობა...
    - ...მაქვს თუ არა? ადამიანი ვიღაცას სულ ეპრანჭება. ოღონდ, ეს ისე, რომ ფლირტსაც ვერ ვუწოდებ. ვერ ვიტყვი, რომ დიდად პრანჭია ვარ, ზოგჯერ ეს მეზარება კიდეც.
    - თავისუფლება არის...
    - ...უპირველს ყოვლისა, ყველასგან დამოუკიდებლობაა. თავისუფლებაა, როდესაც მართალი ხარ საკუთარ თავთან. ნამდვილი თავისუფლება გონებაში, გულში გაქვს. შინაგანი თავისუფლება კომფორტიც არის.
    - ამ წუთში ძალიან მინდა ვიყო...
    - ...კუნძულ ბალიზე, სრულიად მარტო, რომელიმე კოტეჯში. მარტო ყოფნა ჩემთვის მოსაბეზრებელი არ არის.
    - წონასწორობიდან ჩემი გამოყვანა შეუძლია...
    - ...ძალიან რთულად ვკარგავ წონასწორობას და ამ დროს ძალიან ცუდი ვარ. არ შემიძლია ვიყო სასტიკი, დაუნდობელი. ასეთ დროს უბრალოდ, საკუთარი თავი არ მომწონს. ადამიანებისთვის გამიზნულად არასდროს მიტკენია, ცუდი არ გამიკეთებია, სამაგიეროს გადახდის სურვილი არ მქონია. შურისძიება ჩემთვის უცხო რამ არის.
    - მეზარება...
    - ...დილით ადრე ადგომა.
    - დღემდე ვერაფრით ვისწავლე...
    - ...მართვის მოწმობა ვერ ავიღე, მიუხედავად იმისა, რომ მანქანა მყავს. იმდენი ხანია, ვსწავლობ, დავიტანჯე. იმედია, უახლოეს მომავალში მართვის მოწმობას ვეღირსები.
    - ცხოვრებას ვილამაზებ...
    - ...ჩემი შვილით და იმ ადამიანებით, რომლებიც ყველაზე მეტად მიყვარს.
    - სიყვარული ეს...
    - ...ქალისა და მამაკაცის სიყვარული არის გრძნობა, რომელმაც ერთდროულად შეიძლება გაგხადოს ყველაზე ბედნიერიც და უბედურიც. როცა გიყვარს და უყვარხარ, ყველაფერი გიხარია, მეტად თბილი და პოზიტიური ხდები არა მხოლოდ შეყვარებულთან, საერთოდ, ადამიანების მიმართ. ამ გრძნობამ საპირისპიროც შეიძლება განგაცდევინოს: არაფერი გიხაროდეს, ადამიანებთან ურთიერთობის სურვილი მოგიკლას. სიყვარული ეს არის გრძნობა, რომელმაც შეიძლება, დაგანგრიოს. დღეს ჩემი ყველაზე დიდი სიყვარული არის ნინა. არ ვიცი, ჩემს ცხოვრებაში რა უნდა მოხდეს, რომ მასთან ერთად ყოფნა აღარ მომინდეს. სხვადასხვანაირი დედაშვილური სიყვარული არსებობს. ნინასთან სრულიად განსხვავებული გრძნობა მაკავშირებს, ის ჩემთვის ყველაფერია და ეს მხოლოდ დედაშვილობა არ არის.
    - როცა შეყვარებული ვარ...
    - ...ვარ ძალიან ერთგული.
    - ახლა შეყვარებული...
    - ...არ ვარ.
    - ყოველთვის შეუძლია კარგ ხასიათზე დამაყენოს...
    - ...მოგზაურობამ. მუსიკამ შეიძლება, როგორც კარგ, ასევე ცუდ ხასიათზე დამაყენოს.
    - ჩემი ყველაზე დიდი სისუსტე...
    - ...ჭამის სიყვარულია. გემრიელობები მიყვარს და არც სამზარეულოში ტრიალია ჩემთვის უცხო. ერთდროულად, გურმანიც ვარ და კარგი მზარეულიც.
    - როცა საჯაროდ მაქებენ...
    - ...ვიცინი. ეს რეაქცია ერთდროულად, უხერხულობისგანაც არის გამოწვეული და სიხარულისგანაც.
    - მეშინია...
    - ...სიმაღლიდან გადმოხედვის.
    - ხშირად მსაყვედურობენ...
    - ...ხელში სულ ტელეფონი ნუ გიჭირავსო. ამ საყვედურს უმეტესად, დედისგან ვისმენ.
    - ვუფრთხილდები...
    - ...საყვარელ ადამიანებს, ურთიერთობებს.
    - ვნანობ, რომ...
    - ...თეატრალურ უნივერსიტეტში სწავლის პერიოდი კარგად ვერ გამოვიყენე. მეორე კურსზე რომ ვიყავი, ფეხმძიმობის გამო ხელი შემეშალა. სწავლა ბოლო წლებში უფრო მოვინდომე.
    - როდესაც დაძაბული პერიოდი მაქვს...
    - ...ასეთ დროს საკუთარ თავთან განმარტოება და ლაპარაკი მშველის. ზოგადად, მარტო ყოფნა მიყვარს. რთულ პერიოდში ჩემი თავის გარდა, ვერავინ მშველის.
    - ადამიანი, ვის აზრსაც ყოველთვის ვითვალისწინებ...
    - ...დედაა. ვეკითხები, მაგრამ ვერ ვიტყვი, რომ მისთვის ყველაფერი დამიჯერებია. რაც არ დამიჯერებია, მინანია.
    - ვერაფრით წარმოვიდგენდი...
    - ...რობი უილიამსის კონცერტს თუ დავესწრებოდი. ზუსტად ამ დღეს თავად მქონდა დმანისში კონცერტი. დიდი ხნის წინ ვიცოდი, რომ ვერ დავესწრებოდი და ამ აზრს შეგუებული ვიყავი. შესაბამისად, ბილეთის შეძენაზეც არ ვიზრუნე. თბილისში 9-ის ნახევარზე დავბრუნდი. ჩემს დას დავურეკე, - ცუდ ხასიათზე ვარ, რობის კონცერტზე მინდა-მეთქი. ამ შემსრულებელზე ბავშვობიდან ვგიჟდები. ჩემმა დამ მითხრა: სტადიონთან გავიდეთ და იქნებ ბილეთები გადამყიდველებისგან ავიღოთო. მოკლედ, ისე მოხდა, რომ ბილეთი არავის ჰქონდა. ძალიან მოვინდომეთ, მაგრამ შეძენა ვერ მოვახერხეთ. - ახლა აქ დავდგები და ავტირდები-მეთქი, - ვთქვი ძალიან შეწუხებულმა. ეს სიტყვები ერთმა გულისხმიერმა კაცმა გაიგონა. კარი გაგვიღო და შეგვიშვა. სხვათა შორის, კარგ ადგილზე მოვხვდი, ძალიან ვისიამოვნე და აღმოვაჩინე, რომ რობის ყველა სიმღერის ტექსტი ზეპირად მცოდნია.
    - არავისთან ვსაუბრობ...
    - ...ასეთი თემები ალბათ, არ არის. ძალიან გულწრფელი ვარ. 2 და მყავს და ისინი ჩემი ყველაზე დიდი მესაიდუმლეები არიან.
    - ძალიან ბევრი ფული რომ მქონდეს...
    - ...ავაშენებდი ძალიან მაღალი დონის საავადმყოფოს ბავშვებისთვის. მსოფლიოს სხვადასხვა ქვეყნიდან ყველაზე მაღალი დონის ექიმებს მოვიწვევდი. ყველაფერს ისე გავაკეთებდი, რომ ჩვენი პატარებისთვის საზღვარგარეთ სამკურნალოდ წასვლა აღარ გამხდარიყო საჭირო. მძიმე სენით დაავადებული ბავშვების გამო, გული ისე მტკივა, მთლიან თანხას ამ საქმეს მოვახმარდი. ძალიან ხშირად გამოვდივარ საქველმოქმედო კონცერტზე, რომელიც პატარების დასახმარებლად ეწყობა.
    - დარიგება, რომელიც არასდროს დამავიწყდება...
    - ...ერთხელ ჩემი მეგობრის დედამ მითხრა, - როცა გულს გატკენენ და ამის გამო თავს ცუდად იგრძნობ, სამ დღეს გაუძელი, მერე ყველაფერი კარგად იქნებაო. დაკვირვებული ვარ და ყველაზე მეტად მართლა 3 დღე მიჭირს, მერე ყველაფერი თავისით ლაგდება.
    - დაბოლოს...
    - ...გისურვებთ ყველანი კარგად იყოთ. აკეთეთ ის საქმე, რომელიც გიყვართ, მოგწონთ და უფრო ნაკლები ცუდი ამბავი მოხდება ჩვენს ქვეყანაში.
    წყარო: ambebi.ge
    1 555 ნახვა
    18-06-2016, 00:32
    GOGATV

    abezara