• Dolce&Gabbana-ს იტალიური დღესასწაული, სოფი ლორენი, მადონა და სხვები - რას ყვება ნინო სურგულაძე ნეაპოლის ჯადოსნურ დღეებზე

    "ამჟამად ვიმყოფები ნეაპოლში, სადაც "აიდას" რეპეტიციები მაქვს. ისე დაემთხვა, რომ სწორედ 7-9 ივლისს ლორენი-პონტის ოჯახი იმყოფებოდა ნეაპოლში ძალიან ლამაზი მისიით... მთელი მსოფლიოს მაღალი მოდის წამყვან ბრენდს - Dolce&Gabbana-ს დაარსებიდან 30 წელი შეუსრულდა. მათ გადაწყვიტეს ნამდვილი დღესასწაული მოეწყოთ იტალიელებისთვის და ნეაპოლისთვის" - მსოფლიოში წარმატებული, ქართველი საოპერო მომღერალი ნინო სურგულაძე ნეაპოლის ჯადოსნურ დღეებზე გვიამბობს...

    სოფი ლორენის დაჯილდოვებაზე ნინო სურგულაძე სოფი ლორენის ოჯახმა - დოლჩე და გაბანასთან და ნეაპოლის ხელმძღვანელობასთან ერთად მიიწვიეს.

    - ნეაპოლში 400- მდე მოწვეული "ვიპ" სტუმარი, უამრავი გადაკეტილი ქუჩა, გამოფენები, მოდის ჩვენებები 4 დღის განმავლობაში, მაღალი გემოვნების დიდი ზეიმი იყო... ვფიქრობ ნეაპოლის უნიკალურობამ თავის დიდი ხიბლი შემატა ამ ყოველივეს. სოფია ლორენი წლებია უკვე  "დოლჩე და გაბანასთან" თანამშრომლობს. ამ საიუბილეო დღეებში სწორედ ის იყო მთავარი გმირი და მასპინძელი... ასევე "ვიპ" სტუმრები იყვნენ ნიკოლ კიდმანი და მადონა.

    მე მხვდა წილად ბედნიერება შევხედროდი ისევ ქალბატონ სოფიას და მის ოჯახს. სოფიას ვაჟი - კარლო პონტი მეუღლესთან და შვილებთან ერთად იმყოფებოდა დღესასწაულზე. მიხარია რომ გავიცანი ორი დიდი დიზაინერი Dolce და Gabbana, ორი საოცრად უბრალო და სასიამოვნო ადამიანი. დავესწარი მათ საოცარ ჩვენებას, სადაც შერწყმული იყო ნეაპოლის საოცრად ორიგინალური ქუჩები, ჯადოსნური განათება, უბადლო სამოსი, ქარიზმატული მოდელები, პავაროტის ჩანაწერები და ორკესტრი... უამრავი ნეაპოლიტანელი, მსოფლიოდან ჩამოსული სტუმარი თუ ტურისტი ჩაერთო ამ აქციაში. შემდგომ ლორენების ოჯახმა მიმიწვია ქალბატონი სოფიას დაჯილდოვებაზე, სადაც საზეიმო ვითარებაში სოფია ლორენს ნეაპოლის საპატიო მოქალაქეობა მიენიჭა. ცერემონიალს ოჯახი, სტილისტი დოლჩე და გაბანა და ნეაპოლის ხელმზღვანელობა ესწრებოდა. გენიალური არტისტისთვის ნეაპოლი სამშობლოა და დიდი სიყვარული, მის ბავშვობას უკავშირდება, ბედნიერი და ასევე სევდიანი მოგონებები აქვს. ცერემონიალზე სიტყვის წარმოთქმისას ცრემლიც ჩამოუგორდა ლოყაზე...

    - როგორ გაიხსენა საქართველოში ყოფნა?
    - როდესაც სოფი ლორენს


    ვხვდები, ყოველთვის ვრწმუნდები, რომ რაც უფრო დიდია ადამიანი, მით უფრო უშუალოა და უბრალო. მან პირად საუბარში კიდევ ერთხელ ძალიან ტბილად მოიხსენია საქართველოში ვიზიტი, ქართველები და დამპირდა რომ აუცილებლად დაბრუნდება... სოფია ერთ-ერთი უკანასკნელი მოჰიკანია გენიალური პლეადის და მინდა რომ დიდ ხანს ამშვენებდეს სამყაროს თავის არსებობით. ის სამაგალითოა როგორც არტისტი და ისევე როგორც პიროვნება. ბედნიერი ვარ მან, რომ გაიცნო ჩვენი ქვეყანა! პატარა მაგრამ დიდი საქართველო... ქვეყანა, სადაც დიდი სიყვარული შეუძლიათ და ამ სიყვარულის ნაწილი მასაც ხვდა წილად ჩვენთან ყოფნის პერიოდში...

    - თქვენს სამომავლო გეგმებზე გვიამბეთ...
    - "აიდას" პრემიერა სულ მალე შედგება და ვემზადები. ფონდი "ნატვრის ხე" აგრძელებს მუშაობას და ჩვენ მალე შეგატყობინებთ შედეგებს ბავშვებთან დაკავშირებით. ასევე სამომავლო გეგმებსაც გაგანდობთ... მენატრებით, მიყვარხართ!


    წყარო: ambebi.ge
    1 652 ნახვა
    11-07-2016, 00:45
    GOGATV