• ჩემი "ცნობადობა" კომფორტს უფრო მეტად მიქმნის, ვიდრე დისკომფორტს ნინი ქარსელაძის სისუსტე

    მარტო ყოფნა არ მიყვარს და სულ ვცდილობ, მეგობრებთან ან ოჯახის წევრებთან ერთად ვიყო


    მომღერალ ნინი ქარსელაძეს ძალიან უყვარს ზღვაზე დასვენება. მითხრა: სადაც მზე, სიმშვიდე, კომფორტი და ჩემთვის საყვარელი ადამიანებია, ყველგან კარგად ვისვენებო.


    - ვიდრე დასვენებაზე ვილაპარაკებთ, მითხარი, შენს შემოქმედებით ცხოვრებაში რა სიახლეა?
    - არნო ბაბაჯანიანის შვილმა მაჩუქა მამის სიმღერა "ზალატოე ტანგო", რომლის ახლებური ვერსია ჩავწერე. ვაპირებ რუსეთში წასვლას, მაგრამ წინასწარ ვერ გეტყვით, რა გეგმებით მივდივარ.
    - უკვე გადაწყვეტილი გაქვს, სად დაისვენებ?
    - ჯერ არ გადამიწყვეტია, დასასვენებლად კონკრეტულად სად წავალ, მაგრამ მთაში დასვენებას რომ ზღვა მირჩევნია, ეს ვიცი. ზღვა ჩემი სისუსტეა!
    - ვისთან ერთად გიყვარს დასვენება?
    - დასვენების დროს უპირატესობას მეგობრებთან ერთად ყოფნას ვანიჭებ. ასევე, კომფორტულად ვგრძნობ თავს ოჯახის წევრების გარემოცვაში. საერთოდ, მარტო ყოფნა არ მიყვარს და სულ ვცდილობ, მეგობრებთან ან ოჯახის წევრებთან ერთად ვიყო, სხვა შემთხვევაში - დასვენება კი არა, ტანჯვა გამომივა (იღიმის).
    - როცა დასასვენებლად მიდიხარ, თან ბევრი ბარგი მიგაქვს?
    - ყველგან და ყოველთვის, ჩემი ბარგი არის გამორჩეულად დიდი და მძიმე. არ აქვს მნიშვნელობა დღეების რაოდენობას, ყოველთვის მიმაქვს ყველაფერი, რადგან წინასწარ არასოდეს იცი, რა შეიძლება დაგჭირდეს ან მოგინდეს.
    - დასვენების დროს ყველას სურს, თავი კომფორტულად იგრძნოს. როცა ვთქვათ, სანაპიროზე მყოფს გცნობენ და ყურადღებას გაქცევენ, ეს დისკომფორტს ხომ არ გიქმნის?
    - არა, ჩემი "ცნობადობა" კომფორტს უფრო მეტად მიქმნის, ვიდრე დისკომფორტს.
    - გაიხსენე ზაფხული, რომელიც გამორჩეულად კარგად დაგამახსოვრდა.
    - ყველაზე კარგად 2 წლის წინ, მონაკოში გატარებული ზაფხული მახსენდება, რომელიც ბიძაჩემთან, ჩემი ბავშვობის დროინდელ მეგობართან და რუს ამხანაგებთან ერთად გავატარე. მართლაც, დაუვიწყარი იყო...
    - ქართული კურორტები თუ მოგწონს?
    - ძალიან მიყვარს ბათუმში დასვენება.
    - ზღვის განუყოფელ ნაწილად რა მიგაჩნია?
    - საცურაო კოსტიუმი და ნამზეურის მისაღები ინდური ზეთი.
    - დასვენების პერიოდში შოპინგი თუ გიყვარს?
    - ხშირ შემთხვევაში, წინასწარ ვყიდულობ და ვამზადებ ყველაფერს, რაც შეიძლება დასვენების დროს დამჭირდეს, მაგრამ ზოგჯერ მიწევს საშოპინგოდ მაღაზიებში სიარულიც (იღიმის).
    - ოდესმე, საკურორტო რომანი გქონია?
    - უკვე დიდი ხანია, დასვენების პერიოდში არავინ გამიცნია და შესაბამისად, არც ფლირტი მქონია...
    წყარო: gza.ambebi.ge
    1 091 ნახვა
    18-07-2016, 13:25
    GOGATV