"გენიოსი რომ ვიყო, რა გამაუბედურებდა?" - ცეკვა წვიმაში და თიკო მოსემღვდლიშვილის ახდენილი ოცნება

სულიერი და ფიზიკური ძალაა საჭირო იმისთვის, რომ ჭეშმარიტ სიყვარულამდე მივიდეთ

მსახიობ თიკო მოსემღვდლიშვილს რამდენიმე უცნაური შეკითხვა დავუსვი და ასე ვცადე, საკუთარი თავის დახასიათებაში დავხმარებოდი. კითხვაზე, თუ რას შეცვლიდა საკუთარ ცხოვრებაში, დროის უკან დაბრუნება რომ შეეძლოს? - ემოციურმა მსახიობმა მიპასუხა, 18 წლისა არ გავთხოვდებოდიო.



- შეხედე საკუთარ თავს სარკეში და გულახდილად მითხარი: რამდენი წლის ხარ?
- დაახლოებით 20-22 წლის ვარ - ჩემი ხასიათიდან გამომდინარე, ვფიქრობ, ჯერ კიდევ ამ ასაკის გახლავართ.
- რა გირჩევნია, მოითმინო წარუმატებლობა თუ არასოდეს გამოცადო ის?
- მოითმინო ჯობია, რადგან ყველაფერი გამოსწორებადია და ყველა წარუმატებლობას აუცილებლად მოსდევს წარმატება.
- თუ ცხოვრება ხანმოკლეა, რატომ ვაიძულებთ საკუთარ თავს, ვაკეთოთ ის, რაც არ მოგვწონს?
- ზუსტად ეგ არის პრობლემა, რომ ამას ვერ ვიაზრებთ. იძულებით არაფერს ვაკეთებ. უბრალოდ, ვცდილობ, ისე მოვიქცე, როგორც ჩემთვის ჯობს, ეს კი იმას გულისხმობს, რომ ზოგჯერ სასურველის უარყოფაც მიწევს.
- თუ მოგეცა შანსი, მხოლოდ ერთი დეტალი შეცვალო შენს ცხოვრებაში, რას შეცვლი?
- 18 წლის ასაკში არ გავთხოვდებოდი და ცოტა უფრო ადრე დავიწყებდი ფიქრს კარიერაზე.
- წარმოიდგინე, რომ ბედნიერება გახდა მსოფლიოს ვალუტა. რა ტიპის სამსახური გაგხდიდა მდიდარს?
- რა თქმა უნდა, ჩემი პროფესიები გამაბედნიერებდა: მსახიობობა ან მომღერლობა.
- შენ აკეთებ იმას, რისიც გჯერა თუ ცდილობ, დაიჯერო ის, რასაც აკეთებ?
- რეალისტი ვარ და არ "დავფრინავ". თუმცა, ზოგჯერ შეიძლება, თავს ძალასაც ვატან.
- დავუშვათ, გამოაქვეყნეს სტატისტიკა, რომ ადამიანი საშუალოდ 40 წლამდე ცოცხლობს. რას შეცვლი შენს ცხოვრებაში იმისთვის, რომ დარჩენილი წლები უკეთესად გაატარო?
- ემოციებს შევცვლიდი და ბევრ საკითხთან მიმართებაში, გაცილებით ცივი, გულგრილი ვიქნებოდი. ახლა ყველაფერს ყურადღებას ვაქცევ და განვიცდი. არადა, ნერვიულობა ჯანმრთელობისთვისაც რომ საზიანოა, ეს ყველამ ვიცით.
- რამდენად აკონტროლებ იმ მოვლენებს, რაც შენს ცხოვრებაში ხდება?
- ვცდილობ, გავაკონტროლო ყველაფერი და ჯერჯერობით ამას ვახერხებ.
- დავუშვათ, ნაცნობებთან ერთად სასადილოდ წახვედი. მოულოდნელად, ისინი იწყებენ ვიღაცის უსამართლოდ გაკრიტიკებას და არ იციან, რომ ის შენი მეგობარია. როგორ მოიქცევი?
- თუ უსამართლოდ აკრიტიკებენ და თუ "ის" ნამდვილად ჩემი მეგობარია, აუცილებლად დავიცავ, სულ რომ 700 კაცი დამესხას თავს.
- ჩვენი ჟურნალის მეშვეობით, შვილს რას ურჩევ?
- ვურჩევ, ყველას არ ენდოს, მაგრამ ხომ იცი, რაც უნდა ურჩიო ადამიანს, თუ ცხოვრებამ არ ასწავლა, სხვის ნათქვამს ვერ გაითვალისწინებს.
- დაარღვევდი თუ არა კანონს საყვარელი ადამიანის გადასარჩენად?
- თუ იმ კანონის დარღვევა სიკვდილით არ დაისჯება, ამ შემთხვევაში - კი....
- რით განსხვავდები სხვა ადამიანებისგან?
- ვფიქრობ, სხვებისგან არაფრით განვსხვავდები. მეც ისეთი ვარ, როგორც ყველა.
- გაიხსენე ის, რაზეც ოდესღაც ოცნებობდი და არ გამოგივიდა...
- ყოველთვის მინდოდა პოპულარული გოგო ვყოფილიყავი და ეს გამომივიდა. რაც მინდოდა და არ გამომივიდა? - მსგავსი არ მახსენდება.
- შენც იმ აზრზე ხარ, რომ დროა, რაც შეიძლება მალე წახვიდე საქართველოდან?
- კი, დროა, ამ ქვეყნიდან გამიშვან. წავიდოდი ამერიკაში და ჩემს კარიერას უკეთესად მივხედავდი. აქ უბრალოდ, დროს ვკარგავ. წლები მიდის, მე კი ერთსა და იმავე ადგილს ვტკეპნი.
- უბედური გენიოსი თუ ბედნიერი სულელი - ამ ორიდან რომელს აირჩევდი?
- გენიოსი რომ ვიყო, რა გამაუბედურებდა (იცინის)? ვფიქრობ, სულელი არასდროს ვიქნებოდი.
- ისურვებ ისეთივე მეგობარს, როგორიც თავად ხარ?
- დიახ, ნამდვილად ვისურვებ ჩემნაირი მეგობრის ყოლას და სხვათა შორის, მყავს კიდეც ისეთი მეგობრები, ვისშიც საკუთარ თავს ვხედავ.
- რა უფრო უარესი იქნება: შენი მეგობარი საცხოვრებლად სამუდამოდ, სხვა ქვეყანაში წავიდეს თუ ახლოს გყავდეს, მაგრამ შეწყვიტო მასთან ურთიერთობა?
- მირჩევნია, წავიდეს, კარგად იყოს და ისევ ჩემს მეგობრად დარჩეს.
- ყველაზე მეტად, რის გამო ხარ სამყაროსადმი მადლიერი?
- მადლიერი ვარ, რადგან მომცა ისეთი გარეგნობა, რომ სარკეში ჩახედვა მიხარია... ასევე, მადლიერი ვარ, რომ მომცა ნიჭი, ჩემი საყვარელი საქმე ვაკეთო.
- შესაძლებელია სიმართლის გაგება ბრძოლის გარეშე?
- სიმართლე არასოდეს დაიმალება და ამისთვის არანაირი ბრძოლა არ არის საჭირო. უბრალოდ, ცოტა დრო და მოთმინება გვჭირდება. დრო ოდესმე ყველაფერს ახდის ფარდას.
- რეალობის შეგშინებია?
- შიშს ვერ დავარქმევ, მაგრამ ყოფილა შემთხვევა, როცა არ მინდოდა, რაღაც ისე გამოსულიყო, როგორც რეალურად ხდებოდა. რეალობის შიში ჯერ არ მქონია. ვნახოთ, რა იქნება მომავალში.
- თუ გახსოვს, დაახლოებით 1 წლის წინ რაზე იყავი გაბრაზებული?
- საერთოდ, კარგი მეხსიერება მაქვს. ზოგჯერ რაღაცაზე ვბრაზდები, მაგრამ დრო რომ გადის, მერე მეცინება, - ამის გამო რატომ ავიშალე ნერვები-მეთქი?
- რა არის შენი ბავშვობის დრო­ინდელი ყველაზე ბედნიერი მოგონება?
- ანსამბლი "სერენადა" (ჯგუფს კომპოზიტორი ნანა დაუშვილი ხელმძღვანელობდა) და იქ გატარებული პერიოდი, კონცერტები - ეს ყველაფერი ძალიან კარგად მახსენდება.
- წარსულში ჩადენილმა რა ქმედებამ გაგრძნობინა თუნდაც, წამით, რომ ადამიანი ხარ?
- ასე კონკრეტულად ვერაფერს ვიხსენებ... თუმცა, იმის თქმა კი თამამად შემიძლია, რომ არაადამიანურს არასდროს არაფერს ვაკეთებ. მიყვარს სიკეთე და რაც მთავარია, არ ვარ ბოროტი.
- თუ არა ახლა, მაშინ როდის?..
- თუ ახლა არა, ალბათ, მაშინ, როცა უფრო საჭირო იქნება.
- ამბობენ: თუ ჯერ კიდევ არაფრისთვის მიგიღწევია, დასაკარგი არაფერი გაქვსო. ამ მოსაზრებას ეთანხმები?
- დასაკარგი და შესაძენი ყოველთვის არის, უბრალოდ, იმ ყველაფრის ფასი უნდა იცოდე, რაც გაქვს... ისე, თუ რაღაცას არ მიაღწიე, ვერც ვერაფერს დაკარგავ.
- რა ხდება ომის მიზეზი?
- მარტივად არაფერი გამოდის. სულიერი და ფიზიკური ძალაა საჭირო იმისთვის, რომ ჭეშმარიტ სიყვარულამდე მივიდეთ. ამისთვის კი უამრავი ომი უნდა გადაიტანო, პირდაპირი და ირიბი გაგებითაც (იღიმის).
- შეგიძლია, დაუფიქრებლად უპასუხო კითხვას: რა არის კარგი და რა - ცუდი?
- არა, ამ კითხვაზე რომ გიპასუხო, კარგად უნდა დავფიქრდე.
- ახლა მაგიდაზე მილიონი დოლარი რომ დაგიწყონ და გითხრან, ფული აიღე და მუშაობა მიატოვეო, როგორ მოიქცევი?
- თუ გაქვს საკუთარი თავის იმედი, რომ ამ მილიონს სწორად გამოიყენებ, მაშინ კი უნდა გარისკო და სამსახურზე უარი თქვა.
- გაყიდდი შენი ცხოვრების 10 წელს მსოფლიო აღიარებაზე?
- არ გავყიდდი!.. ჩემი სიცოცხლის 10 წელზე მნიშვნელოვანი არა მგონია, რამე იყოს...
- არსებობს განსხვავება ცხოვრებასა და არსებობას შორის?
- რა თქმა უნდა, განსხვავება არსებობს. თუმცა, ზოგიერთი ადამიანი ვერ ხვდება, რა უფრო მნიშვნელოვანია: ცხოვრება თუ არსებობა.
- თუ ჩვენს შეცდომებზე რაღაცას ვსწავლობთ, რატომ გვეშინია შეცდომების დაშვების?
- ჰმ... თუ ისეთ შეცდომას გადააწყდები, რომლის მსგავსიც მანამდე არ დაგიშვია, რა თქმა უნდა, შეგეშინდება. აი, "ნასწავლი შეცდომა" კი ვერ დაგაფრთხობს - გეცოდინება, როგორ უნდა გამოასწორო შენი ესა თუ ის ნაბიჯი.
- ბოლოს როდის მოისმინე საკუთარი გულისცემა?
- კარგა ხანია, არ მომისმენია. იმედია, მალე მოვისმენ (იღიმის)...
- რა გიყვარს ყველაზე მეტად?
- ჩემი მეგობრები მიყვარს და ახლაც მათთან ერთად ვართ, დასასვენებლად წამოვედით...
- სად ისვენებთ?
- ბათუმში ვარ და ძალიან კარგ დროს ვატარებთ.
- გახსოვს, რა გააკეთე გუშინ, გუშინწინ და გასულ კვირას?
- კი, მახსოვს: გუშინ მთელი ღამე წვიმაში დავდიოდი და ვცეკვავდი...
- ამბობენ, წვიმაში სეირნობა შეყვარებულ ადამიანებს მოსწონთო. შეყვარებული ხარ?
- არა, შეყვარებული არ ვარ. უბრალოდ, ცხოვრებაში პირველად ვისიამოვნე წვიმაში ცეკვით და ეს ძალიან მაგარ შეგრძნებებთან ყოფილა დაკავშირებული.

წყარო: gza.ambebi.ge