როგორ ცხოვრობს ერთ დროს პოპულარული ნატა ნუცუბიძე

ლამაზი და სექსუალური ნატა ნუცუბიძე საზოგადოებას "ჯეობარის" პირველი სეზონიდან ახსოვს. დავინტერესდი, წლების წინ ძალზე პოპულარული გოგო ამჟამად როგორ ცხოვრობს.

- დიდი ხანია, ფართო საზოგადოების წინაშე არ გამოჩენილხარ. მოგვიყევი, რა შეიცვალა შენს ცხოვრებაში?
- ოჯახი შევქმენი და მთლიანად ოჯახურ საქმიანობაში ვარ ჩაფლული. 3 ბიჭი მყავს. პრინციპში, მეტი არც არაფერი მომხდარა... ახლა მეუღლესთან ერთად აღარ ვცხოვრობ - 2 წელია დაშორებულები ვართ. ცხოვრებას ბავშვებთან ერთად ვაგრძელებ.
- შენი ყოფილი მეუღლე ვინ არის?
- მრბოლელი - გიორგი სულავა. "ჯეობარშიც" მაკითხავდა ხოლმე. პროექტიდან გამოსვლის მერე, ერთმანეთს კიდევ უფრო დავუახლოვდით და მეოთხე თუ მეხუთე წელს ოჯახი შევქმენით. თუმცა, როგორც გითხარით, 2 წელია ერთად აღარ ვართ.
- ამდენწლიანი ურთიერთობა რატომ დაგენგრათ?
- რაღაც ისეთი პრობლემა შეგვექმნა, რაც ალბათ, ვერ გადავლახეთ. კონკრეტული არაფერი ყოფილა. მიუხედავად ამისა, გიორგი ძალიან კარგი მამაა, ბავშვებთან ხშირი ურთიერთობა აქვს. შვილები ერთადერთია, რაც ამჟამად გვაკავშირებს.
- შენი ვაჟები გაგვაცანი...
- უფროსი - ნიკა რამდენიმე დღეში 12 წლის გახდება. სპორტი აინტერესებს და კალათბურთზე დადის; შუათანა - სანდრო მეორე კლასში გადავიდა, უმცროსი კი სკოლაში წელს შევა... სამივე ავტომობილებზე გიჟდება!
- ბავშვებთან როგორი ურთიერთობა გაქვს?
- ძალიან მეგობრული.
- ახლა რას საქმიანობ?
- ალბათ, სექტემბრიდან ვეცდები, მეც ჩავერთო აქტიურ საქმიანობაში.
- მუშაობას რომელ სფეროში აპირებ? მახსოვს, მოდელი იყავი...
- კი, მაგრამ ეს ადრე იყო - ჩემი მოდელობა ასე ვთქვათ, "მოვილიე" (იღიმის). შეიძლება, დიზაინერობის კუთხით ვიმუშაო. საერთოდ, დიზაინის ფაკულტეტი მაქვს დამთავრებული, არქიტექტურის განხრით - ინტერიერიც და მოდელირებაც, მაგრამ დრო და საშუალება არასდროს მქონდა, რომ ამ სფეროში რამე გამეკეთებინა. ვნახოთ, იქნებ ნელ-ნელა რაღაცას მივაღწიო. მთავარია, საქმე დავიწყო (იცინის). ისეთი სამსახური მინდა, რომ ხალხთან ურთიერთობა მქონდეს.
- უცხო ადამიანები გცნობენ?
- ბევრჯერ ყოფილა შემთხვევა, როცა უცხო ადამიანებს უთქვამთ, - ვაიმე, ნატა, რამდენი ხანია, არ გვინახავხარო. წინათ ქუჩაში სისტემატურად რომ მაჩერებდნენ, ცხადია, ახლა ასე აღარ ხდება.
- ის დრო არ მოგენატრა, როცა პოპულარობის ზენიტში იყავი?
- მგონი, ყველაფერს თავისი დრო აქვს. ის პერიოდი უკვე გამოვიარე... უბრალოდ, ის დრო კარგად მახსენდება.
- ალბათ, კვლავ ბევრი თაყვანისმცემელი გყავს...
- კი, არიან, მაგრამ ფართო საზოგადოებაში ისე აქტიურად აღარ ვჩანვარ და დიდად არც მაწუხებენ. ჩემს გზას მივყვები და აქეთ-იქით ზედმეტ გადახრას თავს ვარიდებ.
- "ჯეობარელებთან" ურთიერთობ?
- ურთიერთობა დიდხანს გვქონდა, მაგრამ მერე წლებმა თავისი ქნა და ნელ-ნელა გავიფანტეთ. ერთადერთი, ვისთანაც დღემდე ძალიან კარგი ურთიერთობა მაქვს, ბარსელონა, იგივე - თეო ბერეკაშვილი გახლავთ. დიტოს სოციალური ქსელით ვეკონტაქტები... გვეგონა, "ჯეობარელები" წლების განმავლობაში ერთად ვიქნებოდით, მაგრამ ცხოვრება ისე წარიმართა, რომ ყველა თავის გზას დაადგა...
- შენი ტყუპისცალი და - ნინა როგორ არის?
- ნინაც გათხოვდა. 2 გოგონა ჰყავს და ისიც საოჯახო საქმეებშია ჩაფლული.
- ხშირი ურთიერთობა გაქვთ?
- კი, თითქმის სულ ერთად ვართ. დღე არ გავა, რომ ერთმანეთს არ დავეკონტაქტოთ: თუ ვერ ვნახე, ტელეფონით მაინც ვლაპარაკობთ. ახლაც, კიკეთში ერთად ვისვენებთ - ბავშვები გვყავს წამოყვანილი...

წყარო: ambebi.ge