ნათია კვაშალი შეყვარებულია - "ერთმანეთთან 6-წლიანი მეგობრობა გვაკავშირებს"

მსახიობ ნათია კვაშალს სურათების გადაღება ძალიან უყვარს და საოჯახო ალბომიც აქვს. თუმცა, ახლა ფოტოებს იშვიათად ბეჭდავს, მათ კომპიუტერში ინახავს. საოჯახო ალბომს მასთან ერთად გადავხედე. ნათია ინტერვიუს ბოლოს გამოგვიტყდა, რომ შეყვარებულია.


- ვიდრე შენს ფოტოებზე ვისაუბრებთ, მითხარი, სად ისვენებ?
- ზაფხულში სადაც უნდა წავიდე და დავისვენო, არაფრად მივიჩნევ, ზღვაზე თუ არ წავედი. ჩემთვის ნამდვილი დასვენება ზღვასთან ასოცირდება. ამიტომ, მალე ზღვას მივაშურებ.
- როგორი დასვენება გიყვარს?
- ჩემი დასვენება დაღლას უფრო ჰგავს. თუმცა, ზღვაზე მეგობრებთან, ოჯახის წევრებთან ერთად დროს სასიამოვნოდ ვატარებ ხოლმე.
- ნათია, როგორი ბავშვი იყავი?
- როგორც გადმოცემით ვიცი, ძალიან აუტანელი და ცუდი ხასიათის ბავშვი გახლდით. ყველაფერზე ვტიროდი, მაგრამ ხშირად, ტირილის მიზეზი არც კი მქონდა. აი, აქ ერთი წლის ვარ. ეს ჩემი საყვარელი ფოტოა...
- შენს ჭირვეულობას მშობლები როგორ ეგუებოდნენ?
- დედა ხშირად მეუბნება, რომ ჩემს ამ საქციელს დიდი მოთმინებით იტანდა მანამ, ვიდრე გაუსაძლისი არ გახდებოდა. - როცა გეკითხებოდი, რატომ ტირი? უფრო უმატებდიო, - ღიმილით ამბობს. ბოლოს ალბათ, მიეჩვია და ჩემს უაზრო ტირილს ყურადღებას აღარ აქცევდა (იცინის).
- ეს ალბათ, შენი საყვარელი დათუნიაა, არა?
- ამ სურათში დაახლოებით ორი წლის ვარ. ეს დათუნია გამორჩეულად მიყვარდა, მაგრამ ჩემი არ იყო. მეზობლის ბავშვს ძალით წავართვი და ვთამაშობდი. კბენიაც ვიყავი, როცა რომელიმე ბავშვის საქციელი არ მომეწონებოდა, მწარედ ვიკბინებოდი.
- შენს ოჯახზე მომიყევი რამე...
- ჩემს ოჯახზე ყოველთვის ამაყად ვსაუბრობ, რადგან ვფიქრობ, ძალიან გამიმართლა. მიუხედავად იმისა, რომ მე და ჩემი ძმა რთულ პერიოდში ვიზრდებოდით, მშობლებმა ყველაფერი გააკეთეს იმისთვის, რომ სიყვარულში გვეცხოვრა. მკაცრად არასოდეს გვექცეოდნენ. ოჯახისგან ყოველთვის სითბოს, სიყვარულსა და დიდ თანადგომას ვგრძნობდი. ეს სურათი, სადაც მე და ჩემი ძმა მამასთან ერთად ვართ აღბეჭდილი, გამორჩეულად მიყვარს.
- მეზობლებს ვეჩხუბებოდიო, - ამბობ. საინტერესოა, ძმასთან როგორი ურთიერთობა გქონდა?
- მე და ჩემი ძმა ძალიან ხშირად, თითქმის ყოველდღე ვჩხუბობდით, მაგრამ იმდენად ნათელი და ბედნიერი ბავშვობა მქონდა, რომ ეს ჩხუბიც კი სასიამოვნო მოგონებად დამრჩა. ამ სურათში, სადაც ძმასთან ერთად ვარ, დაახლოებით ბაღის ასაკის გახლავართ.
- თანატოლებში თავის გამოჩენა თუ გიყვარდა?
- თავის გამოჩენა და მსგავსი რაღაცები სკოლის პერიოდში დავიწყე. ბაღის პერიოდიდან ის მახსოვს, რომ იქაური საჭმელები საოცრად მიყვარდა. ყოველდღე სიამოვნებით მივდიოდი ბაღში იმ იმედით, რომ იქ მაკარონს მაჭმევდნენ. სახლში დაბრუნებულს კი თუ ის კერძი არ დამხვდებოდა, რისი მომზადებაც დედას დავუბარე, შემეძლო, იმდენ ხანს მეტირა, ვიდრე არ გამიკეთებდნენ.
- სკოლაში როგორი ჩაცმული დადიოდი?
- მოდის ტენდენციებს ნამდვილად არ ვითვალისწინებდი. სკოლაში ყოველთვის კომფორტულად და თბილად მეცვა. მეგობრები ხშირად ვიხსნებთ იმ პერიოდს და ვაღიარებთ, რომ საკმაოდ უგემოვნოდ ვიმოსებოდით.
- სკოლის დამთავრების შემდეგ იმიჯი თუ შეიცვალე?
- რა თქმა უნდა, სკოლის დამთავრების შემდეგ ყველაფერი შეიცვალა: ჩაცმის სტილიც, ვარცხნილობაც, თავის მოვლაც დავიწყე და ვცდილობდი, ყოველთვის ფორმაში ვყოფილიყავი.
- მაკიაჟის წასმაც დაიწყე...
- მაკიაჟის გამოყენება უფრო, პირველ კურსზე ყოფნისას დავიწყე. ალბათ, ასაკის ბრალი იყო. ვფიქრობდი, რომ მიხდებოდა. ახლა მაკიაჟს მხოლოდ განსაკუთრებულ შემთხვევებში, სპექტაკლის ან გადაღების დროს ვიყენებ. ყოველდღიურად მხოლოდ წითელ ტუჩსაცხს ვხმარობ. მახსოვს, პატარაობისას ძალიან მომწონდა დედის ქუსლიანი ფეხსაცმელი და პარფიუმერია. მინდოდა, მალე გავზრდილიყავი, მსგავსი რაღაცები მეც რომ მქონოდა, მაგრამ ახლა ვერც მაკიაჟთან და ვერც ქუსლიან ფეხსაცმელთან ვერ ვმეგობრობ (იცინის).
- ამ ფოტოსურათში მოკლე ვარცხნილობა გაქვს...
- უკვე დიდი ხანია, მინდა, თმა შევიჭრა, მაგრამ ვერ ვბედავ; არ ვიცი, რამდენად მომიხდება. შეღებვაც მხოლოდ ერთხელ გავრისკე - შავი საღებავი დავიდე და არ მომიხდა, ასაკს მმატებდა. ამის შემდეგ მიჭირს თმაზე ექსპერიმენტების ჩატარება.
- ჩაცმის როგორ სტილს ანიჭებ უპირატესობას?
- თავისუფალი სტილის სამოსი მომწონს. ზაფხულში ვცდილობ, მაქსიმალურად კომფორტულად და გრილად მეცვას. კლასიკური სტილის სამოსს მხოლოდ განსაკუთრებულ შემთხვევაში ვიცვამ და ამ დროსაც ვიტანჯები.
- შოპინგზე ვისთან ერთად დადიხარ?
- სამოსის შერჩევა მეგობრებთან ერთად მიყვარს. მათი რჩევების გათვალისწინებით, ყოველთვის სწორ და კარგ არჩევანს ვაკეთებ.
- ეს სტუდენტობის დროინდელი ფოტოა, არა?
- დიახ. აქ ჩემს პედაგოგთან და ჯგუფელებთან ერთად ვარ. სტუდენტობის წლები ძალიან კარგად მახსენდება. თამამად შემიძლია ვთქვა, რომ საუკეთესო სტუდენტობის წლები მქონდა. ძალიან მეგობრული ჯგუფი მყავდა და სწავლასთან ერთად, დროსაც ფანტასტიკურად ვატარებდით.
- თამაშობ როგორც თეატრში, ასევე კინოში. საინტერესოა, სად უფრო კომფორტულად გრძნობ თავს: სცენაზე თუ კამერების წინ?
- ორივე ძალიან საინტერესოა და მათ ერთმანეთს ვერც შევადარებ. ორივეს თავისებური სირთულე ახლავს ისევე, როგორც უდიდესი ხიბლი. მე ვისურვებდი, რომ ორივე მხრიდან ბევრი შემოთავაზება მქონდეს... ეს ფოტო ბათუმის თეატრშია გადაღებული. გასტროლზე ვიყავით. თავისუფალმა თეატრმა "კავკასიური ცარცის წრე" წარუდგინა მაყურებელს. ამ სპექტაკლში ჟუჟუნას როლს ვთამაშობ. გასტროლმა წარმატებით ჩაიარა... ეს კადრი კი ფილმის - "ტიფლისი" გადაღების დროს დააფიქსირეს. ვისურვებდი, რომ ბევრი ასეთი სასიამოვნო წუთი და ფოტო იყოს ჩემს ცხოვრებაში.
- ჩარლისთან ფოტო სად გადაიღე?
- ეს ფოტო ამსტერდამშია გადაღებული. მე და ჩარლი - კარგი ფოტო გამოვიდა.
- გარეგნობაში რაიმეს თუ შეცვლიდი?
- პლასტიკურ ქირურგიაზე არასოდეს მიფიქრია. დიდი იმედი მაქვს, რომ ეს მომავალშიც არ დამჭირდება.
- რა არის შენი სილამაზის საიდუმლო? თავს განსაკუთრებულად უვლი?
- განსაკუთრებულს არაფერს ვაკეთებ. თუმცა, უნდა გამოვტყდე და ვთქვა, რომ ხშირად მიწევს დიეტაზე ყოფნა და წონის კონტროლი.
- ის კითხვაც უნდა დაგისვა, რომელზე პასუხის გაცემა ბევრს არ უყვარს: შეყვარებული გყავს?
- კი, შეყვარებული ვარ. ჩვენ ძალიან გვიყვარს ერთმანეთი, მაგრამ მის ვინაობას ჯერ ვერ გაგიმხელთ. ერთს გეტყვით, რომ ერთმანეთთან 6-წლიანი მეგობრობა გვაკავშირებს.
- მეგობრობა როგორ გადაიზარდა სიყვარულში?
- ყველაფერი თავისთავად მოხდა. ალბათ, მხოლოდ მეგობრები არც მანამდე ვყოფილვართ.