• რა ფოტოებს აქვეყნებენ და რას წერენ "ინსტაგრამზე" რუსული Comedy Club-ის წევრები თბილისური ვოიაჟის შემდეგ

    20 აგვისტოს სპორტის სასახლეში რუსული Comedy Club-ის შოუ გაიმართა. ტელეკომპანია TNT-ს ყველაზე პოპულარული პროექტის წევრები საქართველოში კონცერტამდე 1 დღით ადრე ჩამოვიდნენ. 15 ცნობილ კომედიანტს შორის იყვნენ კლუბის ყველაზე პოპულარული სახეები: პროექტის დამფუძნებელი გარიკ მარტიროსიანი, გარიკ ხარლამოვი, ტიმურ ბატრუდინოვი, დემის კარიბიდისი, სოხუმელი ზურაბ მატუა, დიმიტრი სოროკინი და სხვები.

    Comedy Club წელს კავკასიურ ტურნეში იმყოფება. საქართველოში ისინი სოჭში გამართული კონცერტის შემდეგ ჩამოვიდნენ და შოუს შემდეგ ერევანისკენ გააგრძელეს გზა.

    კლუბის წევრები ინსტაგრამის პირად გვერდებზე საქართველოში გადაღებულ ფოტოებს აქვეყნებენ. დემი კარიბიდისი (კარიბოვი) რომელიც თბილისშია დაბადებული, ასეთ


    პოსტს აქვეყნებს სოციალურ ქსელში:

    "33 წლის შემდეგ, მე იმ ქალაქში გამოვედი სცენაზე, სადაც მოვევლინე ქვეყნიერებას. ჩემთვის ეს განსაკუთრებული დღეა. მადლობა ჩემ საყვარელ თბილისს! დარწმუნებული ვიყავი მხიარულება გველოდა წინ. ასეთი მხიარული, ჭკვიანი და კულტურული პუბლიკისგან სხვა მოლოდინი არც შეიძლებოდა გვქონოდა" - წერს თბილისში დაბადებული კარიბიდისი, რომლის ოჯახიც საქართველოდან საბჭოთა კავშირის დაშლის შემდეგ წავიდა.

    Comedy Club-ის იუმორისტები საქართველოში ჩრდილოეთ ოსეთიდან შემოვიდნენ და საქართველოს ბუნებით მოხიბლულები შთაბეჭდილებებს სოციალურ ქსელში აზიარებენ:

    "ჩვენ საქართველოში ვართ. უწყვეტ აღფრთოვანებას განვიცდით ირგვლივ არსებული მშვენიერების გამო... და ეს მხოლოდ დასაწყისია..." - წერს კლუბის კიდევ ერთი პოპულარული სახე ტიმურ ბატრუდინოვი ინსტაგრამზე.

    პოპულარული იუმორისტული შოუ Comedy Club პირველად ეთერში 2005 წლის 23 აპრილს გავიდა. მას შემდეგ მათი ხუმრობები, შეუდარებელი პაროდიები და ვირტუოზული იმპროვიზაციები მაყურებელში დიდი პოპულარობით სარგებლობს.


    წყარო: ambebi.ge
    1 254 ნახვა
    21-08-2016, 23:14
    GOGATV