"სიყვარული ჩემი სუსტი წერტილია" - მარიტა როხვაძის ცხოვრების დევიზი

პირადი ჰოროსკოპი არასდროს შემიდგენია, მაგრამ ჩემი ზოდიაქოს ნიშანს კარგად ვიცნობ "ზოდიაქოს 12 ნიშნიდან ყველაზე რთულად აღსაწერია. ამბიციური, კარიერისტი, უკომპრომისო და ამაყია. ხშირად, საკუთარ თავზე მითების შექმნის სიყვარული სჩვევია. როცა შეყვარებულია, რბილი, მოსიყვარულე და უპრეტენზიო პარტნიორია. საყვარელი ადამიანისთვის ყველაფერზე წამსვლელია. მისთვის იუმორი ერთ-ერთი ფარული საბრძოლო იარაღია - ის ხუმრობს, რათა დამალოს ცრემლი. ისეთი ჯიუტია, რომ ადამიანებს უჭირთ მასთან ურთიერთობა", - ასე ახასიათებენ ასტროლოგები მამლის წელში დაბადებულ თევზებს, ეს კი მომღერალ მარიტა როხვაძის ზოდიაქოს ნიშანია.

- ასტროლოგიით დაინტერესებული ვარ. პირადი ჰოროსკოპი არასდროს შემიდგენია, მაგრამ ჩემი ზოდიაქოს ნიშანს კარგად ვიცნობ. ასტროლოგებმა ბოლომდე კარგად ვერ გაიგეს, ვინ ვარ. როგორც ამბობენ, თევზები ყველაზე რთულად ამოსაცნობი და აღსაწერი ნიშანია.
- საკუთარ თავს კარგად იცნობ?
- კი. საკუთარი თავისთვის შორიდან "სხვისი თვალითაც" შემიხედავს. გადაწყვეტილებებს მარტივად ვიღებ და შეცდომების დაშვების არ მეშინია. ვერ ვიტყვი, რომ ძალიან წინდახედული ვარ. სპონტანურად, დაუფიქრებლად ხშირად ვმოქმედებ. რისკი უმეტესად, ამართლებს. ძალიან კარგი ინტუიცია მაქვს. რაღაცებს წინასწარ ვგრძნობ და ეს ძალზე მეხმარება.
- "თევზების ზოდიაქოს ნიშნის სიმბოლო საპირისპირო მიმართულებით მცურავი ორი თევზია, რომელიც ბედის ირონიით, ერთმანეთზეა გადაბმული. აქედან გამომდინარე, ის, თუ როგორი იქნება მისი ცხოვრების დინება, მთლიანად მასზეა დამოკიდებული".
- მართალია. ახლა აღმავალი პერიოდი მაქვს. საპირისპირო მიმართულებით მცურავი თევზების ბრალია ის, რომ ხასიათი ხშირად მეცვლება.
- "რბილი ხასიათისა და მორიდებულობის გამო, ბევრი თევზი საკუთარი ნიჭისა და შესაძლებლობების რეალიზებას ხშირად ვერ ახერხებს".
- არასწორია. მორიდებული, რბილი ხასიათი არ მაქვს. არც მშიშარა ვარ. ზომიერების ფარგლებში თამამი გახლავართ.
- "შეყვარებული თევზი უპრეტენზიო პარტნიორია".
- როცა შეყვარებული ვარ, ხანდახან საკუთარ თავს ვეღარ ვცნობ.
- რა გემართება?
- ძალიან მიყვარდება. შემიძლია, იმ ადამიანისთვის ბევრი რამ გავაკეთო.
- უპრეტენზიო ხარ?
- არა. უპრეტენზიო ნამდვილად არ ვარ. არ მინდა ვთქვა, მაგრამ სიყვარული თითქოს, ჩემი სუსტი წერტილია.
- "ის საყვარელი ადამიანისთვის ყველაფერზე წამსვლელია".
- მთლად ასეც არ არის. ჩემთვის უმნიშვნელოვანესია, რომ საყვარელი ადამიანი ჩემს საქმეს პატივს სცემდეს. მას უნდა უყვარდეს ხელოვნება. საყვარელმა ადამიანმა რომ მითხრას, სიმღერას თავი დაანებე და ერთად ვიქნებითო, მისგან წამოვალ, კარს გამოვიხურავ.
- ახლა შენს პირად ცხოვრებაში რა ეტაპია?
- სიმშვიდეა, მნიშვნელოვანი არაფერი ხდება. ახლა საქმეზე ვარ გადართული. შეიძლება, ამ ეტაპზე სიყვარულს საქმის კეთებაში ხელიც კი შეეშალა.
- შენ ამბობ, რომ პირად ცხოვრებასა და საქმეში ერთდროულად წარმატებული რომ გახდე, ეს გაგიჭირდება?
- არ ვიცი. გვერდით უნდა მყავდეს ისეთი ადამიანი, რომელიც ხელს შემიწყობს. ის ჩემთან ერთად უნდა იყოს. გამოცდილი მაქვს, ურთიერთობაში მანძილი რა როლსაც თამაშობს.
- "მას უანგარო სიყვარული შეუძლია, მაგრამ შესაძლოა, გარყვნილებასაც მიეცეს".
- უანგარო სიყვარული ნამდვილად შემიძლია. რაც შეეხება მეორე წინადადებას: მსგავსი შემთხვევა ჯერ არ მქონია.
- "ამბიციური, კარიერისტი, უკომპრომისო და ამაყია".
- ამბიციური ვარ, კარიერისტიც (პაუზის შემდეგ)... დავფიქრდი და ამაყიც ვარ. ეს ყველაფერი ჩემს ხასიათში სხვადასხვა დროს, სხვადასხვა ეტაპზე აღმომიჩენია.
- "ტრაბახა ადამიანია. არ შეუძლია არ იამაყოს საკუთარი მიღწევებით, თუნდაც, ეს მიღწევები უმნიშვნელო იყოს".
- ტრაბახა არ ვარ. ამავე დროს, არასდროს მაკმაყოფილებს ის, რაც მაქვს. საკუთარი თავისგან ყოველთვის მეტს ვითხოვ. ახლობლებთან ჩემი გაკეთებული საქმეებით თავის მოწონება ნამდვილად არ მჩვევია.
- "მას საკუთარ თავზე მითების შექმნის სიყვარული სჩვევია".
- მეოცნებე - არა, რეალისტი ვარ. წლებმა გამოცდილება შემძინა. დიდად მეოცნებე ბავშვობაშიც არ ვყოფილვარ. ჩემს შესაძლებლობებს ყოველთვის რეალურად ვაფასებდი.
- ბავშვური გულუბრყვილობა გახასიათებს?
- ადრე მქონდა ეს ხასიათში, დღეს - აღარ. წლების წინ ადამიანებს ისე ვენდობოდი, რომ ყველა კარგი და კეთილი მეგონა. მერე გავიზარდე და ვისწავლე, რომ ეს ასე არ არის.
- "მოსწონს ყურადღების ცენტრში ყოფნა. საამისოდ ჩაცმის უჩვეულო სტილსა და ორიგინალურ ვარცხნილობასაც კი მიმართავს. მიუხედავად ასეთი ეპატაჟურობისა, გულის სიღრმეში კონსერვატორია".
- კონსერვატორი არ ვარ. ჩაცმის უჩვეულო სტილი - არა, მაგრამ ვარცხნილობა მაქვს. ყურადღების ცენტრში ყოფნა მსიამოვნებს. მომწონს, როცა მაფასებენ, როგორც საქმიან და ხელოვან ადამიანს, მაგრამ არ მომწონს, როცა ხაზს უსვამენ ჩემს ჩაცმულობას; ლაპარაკობენ, გადავიღე თუ არა პიკანტური ფოტოები და ა.შ.
- პიკანტურ ფოტოებს სოციალურ ქსელში თავად აქვეყნებ.
- სოციალურ ქსელში ჩემი გვერდი ყველასთვის ხელმისაწვდომია. იმ ფოტოს, რომელიც არ მინდა, საზოგადოებამ ნახოს, არ ვდებ.
- "მას ღრმად სწამს, რომ ყოველთვის მართალია და მასზე უკეთ არავინ იცის, რა და როგორ უნდა გააკეთოს. ბოლომდე არავის ენდობა, საკუთარი თავის გარდა".
- საკუთარი თავის გარდა ბოლომდე რამდენიმე ადამიანს ვენდობი. ესენი არიან: მშობლები, მეგობრები და ჩემი პროდიუსერი კახაბერ ხოშტარია.
- მართლა გგონია, რომ ყოველთვის მართალი ხარ?
- არა. ეს ადამიანები, რომლებიც ჩამოვთვალე, მეუბნებიან, რომ ისე არ არის სწორი, როგორც მე ვფიქრობ. მათ ვენდობი და ამ დროს შავზე თეთრის მტკიცებას არ ვიწყებ.
- მნიშვნელოვანი გადაწყვეტილების მიღებისას, ამ ადამიანების აზრი შეიძლება, გადამწყვეტი აღმოჩნდეს?
- რა თქმა უნდა, მათ ყოველთვის ვუსმენ და ბევრი რჩევაც გამითვალისწინებია, მაგრამ საბოლოოდ, მნიშვნელოვან გადაწყვეტილებებს საკუთარი შეხედულებით ვიღებ.
- "ის ძალიან ხშირად ოცნებობს ბრწყინვალე მომავალზე, გრანდიოზულ პროექტებზე, ამ დროს კი საკუთარი სახლის ზღურბლიდან ფეხის გადადგმა ეზარება".
- აი! ზუსტად ასეა. არის ხოლმე მომენტები, როცა ვიცი, რომ კონკრეტულ ადგილას ჩემი ყოფნა ძალიან კარგი იქნება, მაგრამ წასვლა მეზარება.
- "ზარმაცია, მაგრამ არ არის მშიშარა ადამიანი..."
- ...(მაწყვეტინებს) მშიშარა ნამდვილად არ ვარ.
- ასტროლოგების თქმით, შენი სიმამაცე ყოველთვის აუცილებლობიდანაა გამოწვეული.
- შეიძლება, ასეც არის.
- "მუდმივად მერყეობს პესიმიზმსა და ოპტიმიზმს შორის".
- ძალიან ოპტიმისტი ვარ. იმდენად, რომ ყველა მეუბნება: არაფერი გაწუხებს? რაიმე სახის პრობლემა არ გაქვსო? ამ დროს პრობლემები, ისევე, როგორც ყველა ადამიანს, მეც მაქვს. უბრალოდ ვიცი, რომ ორ რამეზე არ უნდა ვინერვიულო - იმაზე, რასაც არაფერი ეშველება და იმაზე, რასაც ეშველება. ეს სიტყვები ცხოვრებაში დევიზივით მაქვს. ყველაფერს კარგი მხრიდან უნდა ვუყურო და ზედმეტად არაფერზე ვინერვიულო, რომ ნაოჭი არ გამიჩნდეს.
- "ისეთი ჯიუტია, ადამიანებს უჭირთ მასთან ურთიერთობა".
- ნამდვილად, ჯიუტი ვარ! როცა ჩემი სიჯიუტით ვიმარჯვებ, ძალიან ბედნიერი ვარ.
- "მისთვის იუმორი ერთ-ერთი ფარული საბრძოლო იარაღია. ის ხუმრობს, რათა დამალოს ცრემლი".
- როცა მეტირება, ვტირი. ძალიან ემოციური ვარ. თუ დამჭირდება, შემიძლია ვითამაშო, ცრემლი დავმალო, მაგრამ სიხარულს ვერ დავფარავ.
- "მას საოცარი წინათგრძნობა აქვს".
- მართალია, გული წინასწარ ძალიან ბევრ რამეს მიგრძნობს. მქონია წინათგრძნობა და კონცერტზე არ წავსულვარ იმის გამო, რომ ვიცოდი, ჩაიშლებოდა და მართლა ასე მომხდარა. ერთხელ ჩემი მეგობარი უნივერსიტეტში, გამოცდაზე მიდიოდა. ვუთხარი, - ნუ წახვალ, გამოცდა არ გექნება-მეთქი და ჩემი ნათქვამი გამართლდა, გამოცდა გადაუტანეს..
- "თევზი იმ პროფესიაში აღწევს წარმატებას, რომელსაც სითხესთან აქვს კავშირი. ის ნავზე ან ხომალდზე ყოფნით ძალებს აღიდგენს".
- წყალი უბრალოდ, არ მიყვარს, მასზე ვგიჟდები. დღის განმავლობაში 3-4 ლიტრ წყალს ვსვამ, ზღვაზეც ჭკუა მეკეტება. მთაში დასასვენებლად არასდროს მივდივარ. ახლაც ბათუმში, დაქალთან ერთად ვისვენებ და თან, ვმუშაობ.
- სექტემბრიდან რა გეგმები გაქვს?
- ახალი სეზონიდან შევუდგები ჩემს საქმეს: გადაღებები, ჭორები... საქართველოდან წასვლას ვფიქრობ. მინდა, გარკვეული პერიოდით წავიდე და საკუთარი ძალები საზღვარგარეთ მოვსინჯო. ძალიან მიზანდასახული ვარ და რასაც მოვინდომებ, აუცილებლად ვაღწევ.
- ახლა რა არის შენი მიზანი?
- საქართველოს ფარგლებს გარეთ გამიცნოს ხალხმა. უმთავრესი მიზანი "გრემის" აღებაა.
წყარო: gza.ambebi.ge