• ემოციებისგან დაღლილი ცირა კობიაშვილი - "ახლა სიმშვიდე ყველაზე მეტად მჭირდება"

    ნამზეურზე ვგიჟდები


    ზაფხულის ბოლო თვე დაიწყო და ცნობილი ადამიანებიც "თვალს მიეფარნენ" - თითქმის ყველა ცდილობს, აგვისტო დასვენებისთვის და გართობისთვის მაქსიმალურად გამოიყენოს. პირადი ამბითა და სექსუალური გარეგნობით გამორჩეული, "იქს-ფაქტორის" ბოლო სეზონის მონაწილე ცირა კობიაშვილი კი, ზაფხულის ცხელ დღეებს დედაქალაქში ატარებს.

    - ცირა, როგორ ხარ, ზაფხულს როგორ ატარებ?
    - რატომღაც, განწყობილება არ მაქვს, რომ ისე გავერთო, როგორც სხვები ერთობიან. უპირატესობას სიმშვიდეს ვანიჭებ. ზღვისპირა ქალაქებში არ ვყოფილვარ. მეგობრებთან ერთად ვსეირნობ, ოჯახთან ერთად აგარაკზე ავდივარ... ამ სიცხეს ვერ ვუძლებ, მაგრამ რაღაცნაირად ვცდილობ, თავი გავიტანო.
    - გართობის განწყობილება რატომ არ გაქვს?
    - ემოციებისგან დაღლილი ვარ. ჩემს ცხოვრებაში ბევრი ცუდი რამ მოხდა, რაღაც - კარგიც იყო... ამ ერთ წელიწადში ძალიან გადავიღალე და შევიცვალე... ისე, სადმე კუნძულზე დასვენებას ვისურვებდი, სადაც არავინ მიცნობს და არავის აინტერესებს, რას ვაკეთებ, როგორ ვერთობი...
    - თაყვანისმცემლები გაწუხებენ?
    - სხვათა შორის, არ მაწუხებენ. ჩემთან ურთიერთობისას დისტანციას იცავენ - ყოველთვის ყველაფერი ჩემი სურვილის მიხედვით ხდება...
    - გარუჯვა არ გიყვარს?
    - ნამზეურზე ვგიჟდები. ყველანაირად ვცდილობ, "ზაგარი" მივიღო. რუჯს ადვილად ვერ ვიღებ. ძალიან ვწვალობ, მაგრამ ყველაფერს ვაკეთებ, რომ კანმა სასურველი ფერი მიიღოს. სოლარიუმს ხშირად ვსტუმრობ.
    - როგორი სტილის საცურაო კოსტიუმები მოგწონს?
    - ფერადი საცურაო კოსტიუმები არ მიყვარს. უპირატესობას შავს ვანიჭებ. ბიკინი მომწონს. მთლიან საცურაო კოსტიუმს იმ შემთხვევაში ვირჩევ, როცა დახურულ აუზზე ვარ. სანაპიროზე ბიკინის ვამჯობინებ.
    - მოგზაურობა არ გიყვარს?
    - მიყვარს, მაგრამ ჯერჯერობით, იმის შესაძლებლობა არ მაქვს, რომ ისე ვიმოგზაურო, როგორც მინდა. დიდი სურვილი მაქვს, ხშირად ვმოგზაურობდე. უცხო გარემოში ყოფნა მიყვარს.
    - საქართველოს ბევრ კუთხეში ხარ ნამყოფი?
    - კი. მიყვარს სხვადასხვა ადგილის დათვალიერება. მიმაჩნია, რომ უპირველეს ყოვლისა, ადამიანმა საკუთარი ქვეყნის ღირსშესანიშნავი ადგილები უნდა დაათვალიეროს და უცხოეთში მოგზაურობაზე მერე იფიქროს. სურვილი მაქვს, საქართველოს ყველა კუთხე მოვინახულო, რადგან ზუსტად ვიცი, საოცრად ლამაზი ადგილები გვაქვს.
    - როცა დასასვენებლად მიდიხარ, თან ბევრი ბარგი მიგაქვს?
    - აბსოლუტურად ყველაფერი მიმაქვს, თითქოს საცხოვრებლად გადავდიოდე. ადამიანმა არ იცი, როდის რა დაგჭირდება...
    - დამოუკიდებლად პირველად როდის იყავი დასასვენებლად?
    - ოჯახის გარეშე, დასასვენებლად სადმე დღემდე არ წავსულვარ.
    - საქართველოს ფარგლებს გარეთ ყოფილხარ?
    - ბავშვობაში, ანსამბლში ვცეკვავდი და გერმანიაში ვარ ნამყოფი. საერთოდ, ფრენის შიში მაქვს. როგორც იცით, "იქს-ფაქტორში" ბარსელონას საგზური მოვიგე (ბიონსეს კონცერტზე დასასწრებად), მაგრამ ფრენის ისე მეშინია, შეიძლება, ამის გამო ბარსელონაში ვერც წავიდე (იცინის).
    - იქ გიორგი გაბუნიასთან ერთად აპირებდი გამგზავრებას...
    - კი, თუმცა გიორგის საქმეები და პრობლემები აქვს - ალბათ, იცით, "რუსთავი 2"-ში რა სიტუაციაა. სავარაუდოდ, ვერ შეძლებს წამოსვლას. ალბათ, მე, ავთო და გიორგი ნაკაშიძე გავემგზავრებით.
    - ცირა, საქართველოში ჩამოსული მსოფლიო ვარსკვლავების კონცერტებით არ ინტერესდები?
    - სხვათა შორის, კონცერტებზე ბევრმა მეგობარმა დამპატიჟა, მაგრამ არსად წავსულვარ. ახლა სიმშვიდე ყველაზე მეტად მჭირდება.
    - მომღერლის კარიერის ასაწყობად, პოპულარობის გამოყენებაზე არ ფიქრობ?
    - რა თქმა უნდა, მინდა, რომ ჩემი სიმღერები შევქმნა, მაქვს გეგმები... ერთი სიმღერის პატარა ნაწყვეტი "ინსტაგრამზე" მიდევს, რომელმაც ხალხის დიდი ინტერესი გამოიწვია. მეკითხებიან, - ამ სიმღერას რა ჰქვიაო? ვუხსნი, რომ ჩემი სიმღერაა და ჯერ დასრულებული არ არის. მინდა, რომ დავასრულო და გამოვუშვა.
    წყარო: gza.ambebi.ge
    1 576 ნახვა
    28-08-2016, 00:05
    GOGATV