• როდის ხდება დაუნდობელი ნუცა შანშიაშვილი?

    "მგზნებარე და იმპულსურია, მისი დევიზია: "უკეთესია, გააკეთო და ინანო, ვიდრე - არ გააკეთო და ინანო". არც ისე ცუდი ფსიქოლოგია, ადამიანთა აზრებისა და სურვილების ამოცნობა და წინასწარმეტყველებაც კი შეუძლია. მისი ცხოვრება ძალიან მდორედ წარიმართებოდა, რომ არა გადამეტებული სწრაფვა სასიყვარულო თავგადასავლებისადმი. გრძნობებს, რომელიც ტანჯვით არ არის შელამაზებული, იგი არ ცნობს", - ასე ახასიათებენ ასტროლოგები ქალწულის ზოდიაქოს ნიშნით დაბადებულ ადამიანებს. ეს კი მომღერალ ნუცა შანშიაშვილის ზოდიაქოს ნიშანია.

    - ასტროლოგია იმ დონეზე არ მაინტერესებს, რომ ასტროლოგთან ვიზიტზე მივსულიყავი. პირადი ჰოროსკოპი ჩემმა მეგობარმა, ანრი ჯოხაძემ შემიდგინა. ერთი რამ დანამდვილებით ვიცი: მთავარი შემქმნელის იქით, არანაირი ჭეშმარიტება არ არსებობს. უფალი არის დიდი სინათლის ენერგია, რომელიც მართავს ყველაფერს და მის ქვემოთ მზე, მთვარე, ვარსკვლავები, ყვავილები და ადამიანებიც ამ მთავარ ძალასთან თუ ვიქნებით კავშირში, ყველაფერი აგვისრულდება. აქედან გამომდინარე, ასტროლოგიას და მასთან ერთად ძალიან ბევრ რამეს აზრი ეკარგება. სამყაროს ერთიანი ძალა მართავს, ჩვენ ყველანი ვარსკვლავებზე კი არა, ერთმანეთზე ვართ დამოკიდებული.
    ანრი თავად მორიელია... მითხრა, რომ ქალწულები არ უყვარს. არადა, მსმენია, რომ მორიელები და ქალწულები ერთმანეთს კარგად უგებენ. ჩემს პირად ჰოროსკოპში ასცედენტი მყავს მერწყულში. მერწყული აბსოლუტურად დამოუკიდებელი, გიჟი პიროვნებაა. ანრი მეუბნება, შენი მერწყული არ "ჩართო", თორემ გავგიჟდებიო (იცინის).
    მე პირადად მორიელებზე ვგიჟდები. ჩემს წარმატებაში მათ უდიდესი წვლილი მიუძღვით. კარიერაში ძალიან დიდი და მნიშვნელოვანი ნაბიჯები მორიელებთან ერთად გადამიდგამს.
    - ასტროლოგები ამბობენ, რომ 3 სექტემბერს დაბადებული ადამიანები რთული ხასიათითა და მეწვრილმანეობით გამოირჩევიან. ზედმეტად დრამატულად აღიქვამენ მიმდინარე მოვლენებს. შენს შემთხვევაში ასეა?
    - რა სისულელეა. ციფრი სამი ყველაზე კარგი ციფრია. ჩემში ეს სირთულე არ არსებობს. ჩემთან ურთიერთობა საკმაოდ ადვილია. დრამატიზმი სცენაზე მაქვს, დრამატული მსახიობი ვარ. რეალურ ცხოვრებაში კი მისგან შორს ვდგავარ.
    - "მოწესრიგებულია, უზადო პასუხისმგებლობითა და წვრილმანების მიმართ დიდი ყურადღებით გამოირჩევა".
    - პასუხისმგებლობის გრძნობით ნამდვილად გამოვირჩევი, ძალიან მობილიზებული ვარ.
    - პედანტი ხარ?
    - არა.
    - "ყველაზე მეტად დროის უყაირათოდ ხარჯვა და ფეთხუმობა აღიზიანებს".
    - ეს ისაა, რაც ყველაზე მეტად მიყვარს. მაგაზე მშვენიერი არაფერი არსებობს. ჩვეულებრივი ფეთხუმი ვარ. საკონცერტო კაბები თავზე მაყრია, არ ვიცი, სად წავიღო.
    - "რასაც ქალწულის წყობიდან გამოყვანა შეუძლია, ეს ქაოსია. მისთვის აუცილებელია, გარშემო ყველაფერს თავისი ადგილი ჰქონდეს მიჩენილი. აქედან გამომდინარე, არათუ პირადი ნივთები და ტანსაცმელი, ცხოვრებაც კი დაგეგმილი და გადანაწილებული აქვს".
    - ნეტავ ეგრე იყოს. მე თავად ქაოსური და ცხოვრების დინებას მინდობილი ვარ. არაფერს ვალაგებ, რადგან ვიცი, რომ რაც დასალაგებელია, იმას ღმერთი თავად დაალაგებს. პირად ურთიერთობაშიც ყველაფერს ვურევ და ყველაფერს ხელოვნების "იარლიყს" ვანიჭებ. იქ, სადაც დალაგებულია, ხელოვნება არ არის. ხელოვნება თავისუფლებაა, სიგიჟეა, ბევრი ექსპრომტია. ყველაზე მეტად დასამახსოვრებელი ამბები ხშირ შემთხვევაში მოულოდნელობებითაა სავსე.
    - მომავლის დაგეგმვა გჩვევია?
    - ხანდახან მინდა დავგეგმო, მაგრამ ყოველთვის არ გამომდის. კონცერტი წინასწარ თუ არ დაგეგმე, ისე არაფერი გამოვა. რაც შეეხება ცხოვრებას, ეს ის შემთხვევაა, როცა კაცი ბჭობს და ღმერთი იცინის. ხვალ სად წავალ, მომავალ დღეს როგორ გავატარებ, აზრზე არა ვარ.
    - "ბუნებაში უსაქმურ ქალწულს პრაქტიკულად ვერ ნახავთ. თუ სამსახურებრივ მოვალეობას არ ასრულებს, სახლში იფუსფუსებს და ასე მაინც გამონახავს საქმეს".
    - კი, ჩემი საქმე ძალიან მიყვარს. რაც შეეხება ოჯახში ფუსფუსს, ყველაფერი ვიცი, მაგრამ ეს ჩემი საქმე არ არის. მე სახლის ადამიანი არა ვარ.
    - "უმცირეს დეტალსაც კი აკვირდება როგორც საკუთარ, ისე სხვის გარეგნობაში, ამიტომ მის მახვილ თვალს არასოდეს არაფერი გამოეპარება".
    - ადამიანი შემიძლია ქმედებაში დავიჭირო, ისეთი რამ შევამჩნიო, რაც სხვის თვალს ხშირად ეპარება. ასე ბევრი საინტერესო დეტალი დამიჭერია. გარეგნული ფაქტორი ნაკლებად მაინტერესებს. მოღუნული ცხვირი და აწეწილი თმა თვალში არ მხვდება.
    - "ჩვევას - გარშემო ყველა და ყველაფერი გააკრიტიკოს, მის მიმართ ბევრი ადამიანის არცთუ დადებითი განწყობა შეიძლება მოჰყვეს".
    - არასდროს არავის ვაკრიტიკებ, რადგან ვიცი, რომ ამის უფლება არა მაქვს. ღმერთმა ისეთი შექმნა, როგორიც არის, მე რა უფლება მაქვს, ვაკრიტიკო?
    - როცა თავად გაკრიტიკებენ?
    - უმეტეს შემთხვევაში ვერთობი, ბევრი სასაცილო რამ აღმომიჩენია და მომისმენია. არსებობენ ადამიანები, რომელთა კრიტიკასაც საერთოდ არ ვიღებ, მაგრამ არსებობენ ისეთებიც, რომელთა აზრიც ჩემთვის მნიშვნელოვანია. ჯანსაღი კრიტიკაც მომისმენია და ძალიან დამხმარებია. მგონია, რომ ისე ჯანსაღ პროდუქტს ვერც შექმნი.
    - "ის ბუნებით ლიდერი არ არის, პროჟექტორების შუქსა და მქუხარე აპლოდისმენტებს კულისებს მიღმა სამუშაო ურჩევნია".
    - ეს დიდი ტყუილია, მე ლიდერი ვარ. პირველი უნდა ვიდგე სცენაზე და ყველაზე დიდი აპლოდისმენტები მე უნდა მეკუთვნოდეს. ამის გულისთვის შემიძლია, დაუნდობელი გავხდე, გზიდან ყველა ჩამოვიშორო.
    - ამ დროს მიუღებელი ნაბიჯებიც შეგიძლია, გადადგა?
    - ალბათ შემიძლია. თუ მე
    ვთვლი, რომ იქ ჩემი ადგილია და არა - სხვისი, მეტოქეს აუცილებლად ჩამოვიშორებ.
    - "მგზნებარე და იმპულსურია, მისი დევიზია: "უკეთესია, გააკეთო და ინანო, ვიდრე - არ გააკეთო და ინანო".
    - რა თქმა უნდა, ზუსტად ასეა.
    - იმის გამო უფრო მეტი სინანული გაქვს, რაც გაგიკეთებია, თუ რაც არ გაგიკეთებია?
    - არც ერთი და არც მეორე, წარსულს ნაკლებად ვუღრმავდები.
    - "ქალწული გამჭრიახობით გამოირჩევა, სწორედ ამიტომ მისი რჩევები ხშირად ამართლებს".
    - მართალია, რჩევების მისაღებად ხშირად მომმართავენ. სულ მინდა, რომ ჩემნაირი მრჩეველი მეც მყავდეს. საკუთარ თავთან შტერი ხარ, სხვის ომში - ბრძენი.
    - ეგოისტი ხარ?
    - მთელი კაცობრიობა ეგოიზმითაა შეპყრობილი. მეც არ ვარ გამონაკლისი. ეს მსოფლიო პრობლემა ჩემში დიდი დოზითაა.
    - ჭირვეული?
    - არა. კარგად ვიცი ბუნების კანონები, რაც არ გამოდის, არ ვეჭიდავები, თავს ვანებებ.
    - კომპრომისზე წასვლა გიჭირს?
    - მიჭირს, მაგრამ ვცდილობ, ვისწავლო. როცა ხვდები, რომ მართალი არ ხარ, მაგრამ ეგო გაიძულებს, შენი გაიტანო, ამ დროს კომპრომისზე უნდა წახვიდე. როცა იცი, არასწორი ხარ, ამ დროს შენი სურვილები უნდა დათმო.
    - "ნებისმიერ სიტუაციაში თავის კარგად დაცვა შეუძლია, გრძნობებში უფრო რომანტიკულია, ვიდრე სენტიმენტალური. კარგი მსახიობია და ბრწყინვალე ინტუიციით გამოირჩევა.
    - კი, ასეა.
    - "არცთუ ისე ცუდი ფსიქოლოგია, მას სხვათა აზრებისა და სურვილების ამოცნობა და წინასწარმეტყველებაც კი შეუძლია".
    - 4-5 წლის ვიქნებოდი, დედასთან ერთად წყნეთში მივდიოდი. გზად დიდი ხარი იდგა. დედას გაუფიქრებია, ახლა რომ ჩვენკენ გამოიწიოს და დაგვეტაკოსო? დღესაც მახსოვს, დედას ავხედე და ვუთხარი, - ასე რატომ ფიქრობ, ნუ გეშინია, არ დაგვეტაკება-მეთქი. მსგავსი შემთხვევა არაერთხელ მქონია.
    - "მისი ცხოვრება ძალიან მდორედ წარიმართებოდა, რომ არა - გადამეტებული სწრაფვა სასიყვარულო თავგადასავლებისადმი.
    - უჰ!!! ასეთ თავგადასავლებზე ვგიჟდები, ეს ჩემი "ტაბლეტია", თავგადასავალი, ემოცია ის წინამორბედია, რომლის შემდეგაც არაჩვეულებრივი ხელოვნება იბადება. როგორ შეიძლება, ხელოვანმა განცდების გარეშე იცხოვროს?
    - "გრძნობებს, რომელიც ტანჯვით არ არის შელამაზებული, იგი არ ცნობს".
    - როგორ არ ვცნობ, რა სისულელეა.
    წყარო: ambebi.ge
    1 308 ნახვა
    GOGATV