• პირველი შეგრძნება ყოველთვის დასამახსოვრებელია - სოფო გორელაშვილის არდადეგები

    მსახიობ სოფო გორელაშვილს ბათუმში გამგზავრებამდე შევეხმიანე და მისი ორ ეტაპად გაყოფილი ზაფხულის შესახებ გამოვკითხე:

    - ზაფხულის პირველი ნაწილი შემოქმედებითად დატვირთული მქონდა. კარგად ვარ, დიდი ხანია არ დამისვენია და ახლა ძალიან სასიამოვნოდ ვისვენებ. დროს საკუთარ თავსა და შვილს ვუთმობ.
    - ზაფხულის შემოქმედებითად დატვირთული ნაწილის შესახებ მოგვიყევი.
    - 10 დღით აზერბაიჯანში ვიყავი, სადაც მხატვრულ ფილმს იღებდნენ. საქართველოდან რამდენიმე მსახიობი წაგვიყვანეს. გადაღება განჯაში გვქონდა. საკმაოდ საინტერესო გამოცდილება მივიღე. აზერბაიჯანელებთან პირველად ვიმუშავე. ფილმს "ჯიხური" (ყვავილების ჯიხური იგულისხმება) ჰქვია. შესაძლოა, საქართველოს კინოთეატრებშიც გავიდეს.
    - ფილმში ვისი როლი შეასრულე?
    - ფაქტობრივად, მაჭანკალი ვიყავი, რადგან ფილმის შინაარსი ასეთია: აზერბაიჯანელ ბიჭს ქართველი გოგო ერთი ნახვით შეუყვარდება, მაგრამ დაკარგავს. შემდეგ გოგონა ჩემში აერევა და მის ნაცვლად, ჩემს პერსონაჟს დასდევს. თან, მე საქმრო - ქართველი "ძველი ბიჭი" მყავს. ბოლოს აზერბაიჯანელ ბიჭს გოგონას პოვნაში ვეხმარებით. ასეთი უცნაური, საინტერესო და სასაცილო როლი მქონდა. ფილმში მელოდრამა და რომანტიკული კომედიაა გაერთიანებული. გადაღებები ისეთი კომიკური იყო, რომ მსახიობები სიცილისგან ცუდად ვიყავით...
    - სოფო, ამჟამად ისვენებ?
    - ახლა თბილისში ვარ. ჯერ მთელი თვე ჩემს შვილთან - საბასთან ერთად ზღვაზე ვიყავი, შემდეგ მეგობართან ერთად თურქეთში გავემგზავრე, მერე საგურამოში (დეიდაჩემის აგარაკზე), ნათესავებთან ერთად დავისვენე. ახლა ბათუმში მივდივარ...
    - თურქეთში მეგობარ ბიჭთან ერთად იყავი?
    - არა, გოგონასთან ერთად (იცინის). ამჟამად თავისუფალი ვარ.
    - აქტიური დასვენება უფრო გიყვარს თუ პასიური?
    - ზღვა, მზე ძალიან მიყვარს. სხვაგვარ დასვენებას არ ვცნობ, ოღონდ ესეც 2 ეტაპად მაქვს დაყოფილი: ჯერ ზღვაზე წყნარად, მშვიდად შეზლონგზე წოლა და წიგნის კითხვა, ადრე დაძინება და ადრე გაღვიძება ანუ ჯანსაღი დასვენება აუცილებლად მჭირდება, შემდეგ 5-6 დღე მინდა, რომ აქტიურად დავისვენო, გავერთო...
    - ზღვა რატომ გიზიდავს - კარგად ცურავ, ნამზეური მოგწონს თუ?..
    - ცურვა კარგად კი ვიცი, მაგრამ წყალში ჩავდივარ, ვსველდები და გამოვდივარ - ცურვა ძალიან მეზარება. ნამზეური და ზღვის სიმშვიდე მომწონს. მირჩევნია, მზეზე ვიწვე. პლაჟზე წოლა მზის ჩასვლის შემდეგაც მომწონს. ზღვის ხმა, სუნი, გარემო ჩემთვის ძალიან კომფორტულია და მიყვარს.
    - საზღვაო სეზონისთვის განსაკუთრებულად ემზადები?
    - ფორმაში ჩადგომისთვის დრო არ მრჩება. ისეთი გრაფიკი მაქვს, რომ დიეტა ჩემს ნერვებზე უნდა გადავიდეს. ამიტომ წელს "ამ ამბავს" თავი გავანებე. საზღვაო სეზონისთვის გარდერობის განახლებას რაც შეეხება, ეს ჩემი საყვარელი საქმიანობა გახლავთ.
    - ყურადღებას აქცევ, როგორი საცურაო კოსტიუმია მოდური?
    - ფერს ყურადღებას ნაკლებად ვაქცევ, საცურაო კოსტიუმის ფორმით კი ვინტერესდები. ჩემი ფერები მაქვს, რაც მიხდება. სტაფილოსფერს, მჭახე ფირუზისფერს, "მალინისფერს" არ ვიცვამ. პასტელური ფერები მირჩევნია. ბიკინის ზედა და ქვედა ნაწილებს ცალ-ცალკე ვყიდულობ, ერთნაირი არ მიყვარს.
    - მთლიანი საცურაო კოსტიუმი არ მოგწონს?
    - ძალიან მომწონს! თურქეთის გარდა, საქართველოს ფარგლებს გარეთ წელს ვერსად გავემგზავრე და ისეთი მთლიანი საცურაო კოსტიუმი ვერ ვიყიდე, როგორიც მინდა.
    - როცა დასასვენებლად მიემგზავრები, თან ბევრი ბარგი მიგაქვს?
    - ძალიან (იცინის)! ყველაფერი მიმაქვს, რაც მჭირდება. რაღაც ყოველთვის შინ მრჩება. რასაც არ წავიღებ, ის დამჭირდება ხოლმე. ამიტომ დასასვენებლად 5 დღითაც რომ მივდივარ, შეიძლება, 2 ჩემოდანი წავიღო. როგორი ცხელი ამინდიც უნდა იყოს, "თბილი" სამოსიც აუცილებლად მიმაქვს. დისკომფორტი არ მიყვარს. მოკლედ, ყველაფერი მიმაქვს, რაც მჭირდება, თუმცა ბოლო დროს, ვცდილობ, გადავეჩვიო, რადგან საზღვარგარეთ რამდენჯერაც გავემგზავრე, ჩემოდნის ზედმეტი კილოგრამების გამო, დიდი თანხის გადახდა მომიხდა.
    - პირველად დასასვენებლად დამოუკიდებლად როდის წახვედი?
    - 16 წლისა ვიყავი, როცა დედამ ქვეყნის გარეთ, თურქეთში დასასვენებლად ჩემზე 2 წლით უფროს მეგობართან ერთად გამიშვა. მანამდე, 15 წლისა, მეგობრებთან ერთად, ზღვაზე დასასვენებლად ვიყავი. ყველაზე უკეთ სწორედ ჩემი პირველი დამოუკიდებელი გასვლები, შეგრძნებები მახსოვს, როცა გვერდით არავინ მყავდა, ვინც გამაკონტროლებდა, ვისაც დავეყრდნობოდი... პირველი შეგრძნება ყოველთვის დასამახსოვრებელია.
    - განსხვავდება შენი მაშინდელი და ახლანდელი გართობის სტილი?
    - არ ვიცი, რისი ბრალია, მაგრამ ადრე ზღვაზე 2 კვირით რომ მივდიოდი, ყოველ საღამოს ვერთობოდი. შეიძლება, ასაკის, სხვანაირი რეჟიმის, გადაღლის ბრალია, რომ ვეღარ ვქაჩავ.
    - სოფო, საბასთან ერთად სად დაისვენე?
    - შეკვეთილში ვიყავი. ძალიან კარგი იყო, ნორმალური სიტუაცია სუფევს. თან, ტურისტებს შორის ძალიან "გაბაზრებული" ადგილი არ არის. იქ სულ ოჯახები ისვენებენ. ბავშვებისთვის ზედგამოჭრილია! თან, მაგნიტური ქვიშაა, რომელიც სახსრებისთვის ძალიან სასარგებლოა. წელს მივხვდი, რომ ჩემი შვილი ძალიან გაიზარდა: მარტოც რჩებოდა, ზღვაშიც შედიოდა, ცურავდა და ა.შ. ძალიან კმაყოფილი ვარ. ალბათ, მალე საბა ლაყუჩებს გამოიბამს, რადგან ზღვაზე დედაჩემთან ერთადაც იყო წასული, მერე - მამამისთან ტბაზე, კახეთში. ბოლოს გამიპროტესტა, - აუ, კიდევ ზღვაო? ძალიან შეწუხდა (იცინის).
    - როგორი გეგმები გაქვს?
    - სიმართლე გითხრა, გამოკვეთილი გეგმები არ მაქვს. როგორც კი რაიმე საინტერესო პროექტი გამოჩნდება, მზად ვარ, შრომისა და თავდადებისთვის (იცინის), რადგან მიმაჩნია, რომ საკმარისად დავისვენე. ახლა კარგ რეჟისორთან სამუშაოდ მზად ვარ.
    - სერიალ "მზარეულებში" აღარ მონაწილეობ?
    - არა.
    - რატომ?
    - პირობები შეიცვალა, ბევრ რაღაცაზე ვეღარ შევთანხმდით და თანამშრომლობა დროებით შევწყვიტეთ. ყველანი ჩემი მეგობრები და ახლობლები არიან. დღემდე ვმეგობრობ მათთან.

    წყარო: ambebi.ge
    1 291 ნახვა
    GOGATV