"ჩამოვიდა თუ არა ქართული გამარჯობა თქვა... თუ რამე ღირებული გვაქვს, ყველაფერი მოუძიებია" - ნიგერიელი არტისტი Nneka თბილისშია

ქართველ მსმენელს დღეს ფილარმონიაში "ჯადოსნური საღამო" ელის - თბილისში Nneka იმღერებს.

პოპულარული ნიგერიელი არტისტი თბილისში წუხელ გვიან ღამით ჯგუფის წევრებთან ერთად ჩამოვიდა. მუსიკოსს აეროპორტში კონცერტის ორგანიზატორები დახვდნენ. პროექტის ორგანიზატორია Funday Entertainment, რომლის ერთ-ერთი დამფუძნებელი აფრიკელ არტისტზე სოციალურ ქსელში წერს:

"იფიქრებთ რა დროს პოსტის წერაა ამ შუაღამითო, მაგრამ არ შემიძლია არ აღვნიშნო შემდეგი ფაქტი: ჩამოვიდა თუ არა ქართული გამარჯობა მითხრა, ზეზვა და მზია, აღმაშენებელი, თამარ მეფე, ხინკალი, ჩურჩხელა, ქართული ცეკვა, ღვინო და რა ვიცი, თუკი რამე ღირებული
გვაქვს ყველაფერი მოუძიებია, სულ 20 წუთი მოვდიოდით გზაში და მილიონი რამ მკითხა ჩვენ ქვეყანაზე და კულტურაზე. Nneka გელოდებათ ყველას ძალიან მაგარ ლაივზე!"

ბოლო წლების საუკეთესო აფრიკელი შემსრულებელი ქართველი მსმენელისთვის კარგად არის ცნობილი. მისი ერთ-ერთი ყველაზე ცნობილი კომპოზიცია, 2008 წელს გამოსული "Walking" თითქმის ყველა ასაკის და გემოვნების მსმენელში სარგებლობს პოპულარობით.

როგორც Nneka თავად ამბობს, ის ძალიან ბევრს მოგზაურობს და ინსპირაციის საკმაოდ დიდ ნაწილს სწორედ მოგზაურობის, სხვადასხვა კულტურების გაცნობის, ადამიანებთან შეხვედრისა და მათთან ურთიერთობისგან იღებს. ნნეკა თვლის, რომ მუსიკა ყველას და ყველაფერს აერთიანებს. აქტიურ მონაწილეობას იღებს სოციალურ პროექტებში, რომლებიც ტრეფიკინგის, ჩაგვრის, ქალთა მიმართ ძალადობისა თუ ტერორიზმის წინააღმდეგ არის მიმართული.

კონცერტი ფილარმონიაში დღეს, 12 სექტემბერს 20:00 საათზე დაიწყება. პროექტის მხარდამჭერები საქართველოს კულტურის სამინისტრო, "ჯეოვოისი", სასტუმრო "რუმსი" და რესტორანი "დაუნთაუნი" არიან.
წყარო: ambebi.ge