Nneka-ს ზღაპრული "გასეირნება თბილისში"

12 სექტემბერს ფილარმონიის დიდ საკონცერტო დარბაზში ქართველი მსმენელისთვის ნიგერიელმა მომღერალმა Nneka-მ იმღერა.

"სალამი, მე ნნეკა ვარ, 12 სექტემბერს საქართველოში, ჩემს კონცერტზე გეპატიჟებით. აუცილებლად მოდით და გახდით ამ ჯადოსნური საღამოს მონაწილეები. მალე შევხვდებით!" - ასე მიმართა თბილისში ჩამოსვლამდე მომღერალმა ქართველ მსმენელს.

Nneka-სთან შეხვედრის პირველივე წუთებიდან ყველანი მივხვდით, რომ ის სხვა ცნობილ შემსრულებლებთან შედარებით, გამორჩეულად უბრალო ადამიანია. მომღერლის თბილისური ვიზიტის Walking to Tbilisi-ს ორგანიზატორების Funday Entertainment-ის ინფორმაციით, ნიგერიელ არტისტს არც განსაკუთრებული, "ვარსკვლავური" მოთხოვნები ჰქონია: ის ინსპირაციას მოგზაურობისას, სხვადასხვა კულტურების გაცნობისას იღებს და მისთვის მთავარი სიამოვნება, სწორედ ადამიანებთან შეხვედრა და მათთან ურთიერთობაა.

კონცერტის დაწყებისას, მაშინ როცა ბენდმა პირველი სიმღერის Pray For You- ს დაკვრა დაიწყო, მისი ხმა კულისებიდან გაისმა და ცოტა ხანში მსმენელის წინაშე წარსდგა შავებში ჩაცმული მომღერალი, რა თქმა უნდა, ცნობილი თავსაბურავით, რომელსაც ის მუდამ ატარებს. მისი შესრულების სტილი იმდენად გამოირჩეოდა, რომ ყოველი სიმღერა, ყოველი ნოტი მსმენელში განსაკუთრებულ ემოციას იწვევდა.

Nneka ქართულად არ მოგვესალმა, თუმცა, ინგლისურად გააბა დიალოგი მსმენელთან, მოგვიყვა საქართველოში ყველაზე პოპულარული სიმღერის Walking-ის შესახებაც და გვითხრა, რომ ეს არ არის მხოლოდ ქუჩაში გასეირნება, ეს არ არის ფიზიკური სვლა, სიმღერა აღწერს ცხოვრებისეულ პრობლემებთან გამკლავებას და სირთულეების გადალახვას.

მომღერალმა გაგვიმხილა, რომ სიმღერაში ის სრულიად თავისუფალია და ეს რომ ბოლომდე ვიგრძნოთ, ჩვენც თავისუფლები უნდა ვიყოთ, თავისუფლებას კი არავინ მოგვცემს თუ თავად არ გავთავისუფლდით პრობლემებისგან.

სიმღერა Walking-მა მთელი დარბაზი აამღერა. საინტერესოა, რომ ბევრი მუსიკალური კრიტიკოსი არტისტს ლორენ ჰილს ადარებს, რაზეც მედიასთან შეხვედრისას Nneka-მ თქვა, რომ ჰილი მისთვის კერპია და რომ სწორედ ისაა მისი შემოქმედების ერთ-ერთი მნიშვნელოვანი ინსპირატორი. თუმცა, ისიც გვითხრა, რომ ის არ ცდილობს ვინმეს დაემსგავსოს, ისე მღერის როგორც ამას მუსიკა უკარნახებს. Nneka თვლის,
რომ მუსიკა ყველას და ყველაფერს აერთიანებს...

Nneka-მ კონცერტზე 2015 წლის ალბომიდან "My Fairy Tales" შეასრულა სიმღერები და რამდენიმე სიმღერა ექსკლუზიურად ქართველი მაყურებლისთვისაც იმღერა. განსაკუთრებით შთამბეჭდავი კი My Love-ის შესრულება იყო.
წყარო: ambebi.ge

ნიგერიელი არტისტის "გასეირნება თბილისში" დრამერის შეუდარებელმა სოლომ დაასრულა. როგორც სცენიდან გაგვიმხილეს, ისინი მოიხიბლნენ თბილისით და ქართველი მსმენელით, და მალე ისევ გვესტუმრებიან.