რატომ იზიდავს იდუმალება ანი ბებიას -"მე და ჩემი მეუღლე დღემდე, სულ ვფლირტაობთ"

დარწმუნებული ვიყავი, კარგ პროდუქტს შექმნიდნენ და ჩემი მოლოდინი გამართლდა

"მოსწონს პარტნიორი, რომელიც მისთვის გამოცანად რჩება. ის უყვარს, რაც ცხრაკლიტულშია. რაც მეტად წვალობს საიდუმლოების ამოხსნაზე და მეტია იდუმალება, მისთვის უკეთესია. საზოგადოებრივი აზრის წინააღმდეგ გალაშქრება უყვარს. მასთან ურთიერთობისას, ყოველგვარი მოულოდნელობისთვის მზად უნდა იყოთ. ის პირველივე შემხვედრს არასდროს ენდობა, ჯერ ადამიანი კარგად უნდა შეისწავლოს. სასიყვარულო ურთიერთობაში ერთგულია, ყველა დეტალს პასუხისმგებლობით ეკიდება. მოსწონს ფლირტი", - ასე ახასიათებენ ასტროლოგები მაიმუნის წელში დაბადებულ მერწყულს, ეს კი მსახიობ ანი ბებიას ზოდიაქოს ნიშანია.

- ასტროლოგიის ძალიან მჯერა. სამწუხაროდ, პირადი ჰოროსკოპი დღემდე არ შემიდგენია. ჩემს ზოდიაქოს ნიშანზე რაც კი წამიკითხავს, ჩემს ხასიათს თითქმის ყველაფერი ემთხვევა. 2016 ჩემი წელია, ყველა მაიმუნს გვიმართლებს.
- "მასთან ურთიერთობისას, ყოველგვარი მოულოდნელობისთვის მზად უნდა იყოთ".
- კი, ასეა. ხასიათი ელვის სისწრაფით მეცვლება. ადრე ეს თვისება ჩემში მეტად იყო გამოკვეთილი და ნაბიჯებს დაუფიქრებლად ვდგამდი, დღეს კი მეტს ვფიქრობ.
- საზოგადოებრივი აზრის წინააღმდეგ გალაშქრება გიყვარს?
- უმეტესწილად თავს ვიკავებ. ვერიდები, რადგან მგონია, რომ საპირისპირო აზრის დაფიქსირებას აზრი არა აქვს.
- გაინტერესებს, რას ფიქრობს შენზე საზოგადოება?
- პროფესიული კუთხით, რა თქმა უნდა, მაინტერესებს.
- ასტროლოგები ამბობენ, რომ ცნობისმოყვარე ხარ.
- (იცინის) მართლა ასეა, ყველაფერი მაინტერესებს. ზოგჯერ კითხვებს ისეთ დეტალებზე ვსვამ, მეგობრები გიჟდებიან, - ეს რაში გაინტერესებსო?
- "მისი აზრით, მთელი ცხოვრება საიდუმლოა, რომელსაც ამოხსნა სჭირდება".
- რა, ასე არ არის? იმასაც ვაცნობიერებ, რომ ვერასდროს ამოვხსნი.
- როგორ ფიქრობ, სიღრმეებში ძიებით ადამიანები ცხოვრებას ირთულებენ?
- კი. ზოგჯერ მეც მაქვს სურვილი, დეტალებს აღარ ჩავუღრმავდე, ფიქრი მღლის. ბევრ რამეს სხვაგვარად ვუყურებ და ამიტომ ვცდილობ, აღარ ვიფიქრო.
- "ყველაფერი ძველი დრომოჭმულად და გამოუსადეგრად მიაჩნია, ყველაფერ ახალსა და გამოუცნობს კი პირველი აღიარებს".
- ეს თვისება არ მაქვს. ძველი ნივთები უფრო მეტად მიყვარს, ვიდრე - ახლები.
- სიახლეებს უფრთხი თუ თამამად იღებ?
- თამამად იმ შემთხვევაში ვიღებ, თუ ჩემს თავში დარწმუნებული ვარ. იმ შემთხვევაში, თუ 1 პროცენტით მაინც ვყოყმანობ, ასეთ დროს გარისკვა არ მჩვევია.
- "მიუხედავად იმისა, რომ მას გარს უამრავი ნაცნობი ახვევია, მეგობარი თითქმის არ ჰყავს".
- ასეც ვერ ვიტყოდი. არის ისეთი საკითხები, რაზეც ადამიანი მეგობართან ვერ დაილაპარაკებს. ცხოვრებაში ჩნდება კითხვები, რომელიც მხოლოდ შენ უნდა ამოხსნა და სხვას ვერავის ჩაახედებ.
- ვერც მეუღლეს?
- მე და ჩემი მეუღლე იმდენად ვგავართ ერთმანეთს, რომ რიგ საკითხებზე ზუსტად ერთნაირი კითხვები და პასუხები გვაქვს. მასში, პირველ რიგში, ძალიან დიდ მეგობარსა და თანამოაზრეს ვხედავ. ერთი წელია, რაც დავოჯახდით.
- "მასთან რაიმეზე მოლაპარაკება ძნელია. არ უყვარს, როცა ვალდებულებებით ავიწროებენ. ძნელია აზრი შეაცვლევინო".
- ზუსტად ასეა. მოლაპარაკება იმიტომაა რთული, რომ რისი გაკეთებაც თავად არ მინდა, შანსი არ არის, ის ვინმემ გამაკეთებინოს. ამას პირველ რიგში ვამბობ, როგორც მსახიობი.
- ყველა როლს არ ითამაშებ?
- არ ვიცი, არსებობს თუ არა ისეთი როლი, რომელსაც არ ვითამაშებ. ჩემთვის მთავარია, ვინ იღებს, ვინ ქმნის პროდუქტს. გემოვნებას ძალიან დიდი მნიშვნელობა აქვს.
- აზრს მყარი არგუმენტების მოსმენის შემთხვევაშიც არ იცვლი?
- არა, ეს უკვე ჩემი მინუსი შეიძლება იყოს.
- შესაძლოა, "დამარცხება" სახალხოდ არ გამოხატო, მაგრამ საკუთარ თავთანაც არ აღიარებ?
- (იცინის) აი, საკუთარ თავთანაც არ მინდა ხოლმე ამის აღიარება.
- "ის პირველსავე შემხვედრს არასდროს ენდობა, ადამიანი ჯერ კარგად უნდა შეისწავლოს".
- რა თქმა უნდა, ასეა. ჩემთვის ადამიანის შესწავლა რთული არ არის.
- "მერწყული იშვიათად ტყუის".
- ხშირად ამბობენ - "კეთილი ტყუილი". ადამიანის მოტყუება ასეთ შემთხვევაშიც კი არ შემიძლია.
- როცა გატყუებენ, როგორი რეაქცია გაქვს?
- მატყუარებთან ურთიერთობა არ შემიძლია, ამაზე მხოლოდ მეცინება. რა უნდა მოვიმოქმედო? ვეუბნები: "კარგად იყავი".
- "მოსწონს პარტნიორი, რომელიც მისთვის გამოცანად რჩება".
- ურთიერთობა ასე უფრო საინტერესოა. როცა რაღაცებს ვერ ხსნი, ვერ ამოიცნობ, მეტი ინტერესი გაქვს.
- შენ და შენი მეუღლე ერთმანეთის გაოცებას ხშირად ახერხებთ?
- კი. მგონი, მე უფრო ხშირად ვახერხებ. ვგიჟდები, ასეთი რაღაცები ისე მომწონს. საჩუქარს რომ არ ელოდება და გავახარებ, იმ წუთებში, ყველაზე ბედნიერი მე ვარ.
- "ის უყვარს, რაც ცხრაკლიტულშია. რაც უფრო მეტად წვალობს საიდუმლოების ამოხსნაზე, რაც მეტია იდუმალება, მით უკეთესია".
- ნამდვილად ასეა!
- ცხრაკლიტულები რატომ გიზიდავს, როცა შეგიძლია, მარტივად იცხოვრო?
- ძნელად ამოსახსნელი ამბები და სიტუაციები ბევრად საინტერესოა. ორჯერ ორი რომ ოთხია, ეს ხომ ყველამ ვიცით.
- "ეჭვიანი არ არის".
- ძალიან ეჭვიანი ვარ, მაგრამ არ ვამჟღავნებ. ჩუმი ეჭვიანობა სულაც არ მიჭირს. ოღონდ, მეუღლის მიმართ ეჭვიანობას არ ვგულისხმობ. სხვა ეჭვებიც ხომ არსებობს!
- უფრო კონკრეტულად?
- მაგალითად, რეჟისორი როლზე რომ მამტკიცებს, ვფიქრობ: სჯერა ჩემი? მენდობა? ხომ არ ფიქრობს, რომ სხვა უკეთესი იქნებოდა? მომწონს, როცა ერთ მშვენიერ დღეს, ამ შენს ეჭვნარევ კითხვებს პასუხი თავისთავად გაეცემა.
- "ცვალებადი, ურთიერთსაწინააღმდეგო ხასიათით გამოირჩევა".
- თავად ვერ ვიგებ, ხასიათს რა მიცვლის.
- "ჭკვიანი, მოხერხებული და გამომგონებელია".
- არ ვიცი, რამდენად მოხერხებული ვარ. პრობლემები არ მთრგუნავს, დეპრესიაში არ მაგდებს. ამ დროს ვცდილობ, მეუღლესთან სულ ახლოს ვიყო, ჩემი განცდები გავუზიარო. მასთან ურთიერთობა კარგად მხდის.
- პროფესიულ ამბებში უფრო მეტად გიჭირს გადაწყვეტილების მიღება თუ პირადში?
- პროფესიულში, მაგრამ "ხელოვნური სუნთქვიდან" შემოთავაზება რომ მივიღე, ბევრი არ მიფიქრია, დავთანხმდი. დარწმუნებული ვიყავი, კარგ პროდუქტს შექმნიდნენ და ჩემი მოლოდინი გამართლდა.
- "არ იცის წყენის გულში ჩადება".
- მართალია. მიუხედავად იმისა, რომ იმ წუთში ძალიან ვითრგუნები, მალევე მავიწყდება.
- "ტემპერამენტიანი, თავნება და "ფეთქებადია".
- ასეა. კონფლიქტური არ ვარ, მაგრამ თუ "ავფეთქდი", ძალიან "მწარე" ვხდები. ერთხელაც, შესაძლოა, დაგროვილმა ამბებმა ჩემი "აფეთქება" გამოიწვიოს.
- თავნება ხარ?
- ადრე უფრო თავნება ვიყავი. საკუთარ თავზე ლაპარაკი რთულია.
- "ზოგი თვლის, რომ ყველაფერში ცხვირის ჩაყოფა უყვარს".
- ჩემი მეგობრების ცხოვრება თუ სხვის ცხოვრებად ითვლება, არ ვიცი. რაც მაინტერესებს, მათ ვეკითხები და არა მგონია, ეს "ცხვირის ჩაყოფა" იყოს.
- რის ხარჯზე ხარ წარმატებული?
- ძალიან შრომისმოყვარე ვარ. ჩემი პედაგოგები სოსო ნემსაძე და სლავა ნათენაძე იყვნენ. ძალიან ბევრი რამ ვისწავლე გოგა პიპინაშვილისგან, როდესაც სპექტაკლში მათამაშა. ახლა სანდრო მრევლიშვილთან ვარ თეატრში "გლობუსი". ალბათ, იღბალიც მაქვს. გარშემო ბევრი შრომისმოყვარე ადამიანია, რომლებსაც არ უმართლებთ. ვფიქრობ, ჩემი თაობის წარმომადგენლები ძალიან კარგი და ნიჭიერი ახალგაზრდები არიან. გული მწყდება, როცა უფროსები ამბობენ: ადრე რომ მსახიობები იყვნენ, დღეს ისეთები სად არიანო? როგორ არ არიან! უნიჭიერესი თაობა მოდის.
- "იმავე წარმატებით ხარჯავს ფულს, როგორც გამოიმუშავებს".
- ნამდვილად. შემგროვებელი არ ვარ. თუ მაქვს, ვხარჯავ. არ მაქვს? - არც ესაა პრობლემა, ამის გამო დეპრესია არ მემართება.
- "არც ერთ სხვა ნიშანს არ შეუძლია ხალხთან ისე მარტივად კომუნიკაცია, როგორც მაიმუნს. მას შეუძლია გაგაცინოს, როცა ტირილის განწყობაზე ხარ".
- სხვები ჩემზე ამას ხშირად ამბობენ, მე კი პირიქით ვფიქრობ: მგონია, რომ ადამიანებთან ურთიერთობა მიჭირს. ბევრი ლაპარაკი არ მიყვარს, აქტიური ნაკლებად ვარ.
- "სასიყვარულო ურთიერთობაში ერთგულია და ყველა დეტალს პასუხისმგებლობით ეკიდება".
- თამამად შემიძლია ვთქვა, რომ ასეა.
- "მოსწონს ფლირტი და მარტივად იქცევს სხვის ყურადღებას".
- მე და ჩემი მეუღლე დღემდე, სულ ვფლირტაობთ.
- "ის კარგად ახერხებს გრძნობებით მანიპულირებას".
- ტყუილია, მე სცენაზე, კამერის წინ ვთამაშობ, ცხოვრებაში კი - არასდროს.

წყარო: gza.ambebi.ge