"ადამიანები ვართ და გვაქვს შეცდომის დაშვების უფლება" - რომელ დღეს ამოშლიდა საკუთარი ცხოვრებიდან ჯანეტ ქერდიყოშვილი

"ყველანაირ ცხოვრებისეულ კანონს დავარღვევდი საყვარელი ადამიანის გადასარჩენად", - მითხრა მოდელმა ჯანეტ ქერდიყოშვილმა. ფიქრობს, რომ ასე თუ ისე, საკუთარ ცხოვრებას აკონტროლებს. თუმცა, ცხადია, ზოგჯერ მისი სურვილის საწინააღმდეგოდაც ხდება რაღაცები.

სოფო ჭონიშვილი
- დააკვირდი საკუთარ თავს სარკეში და გვითხარი, რას გეუბნება შენი გარეგნობა, რამდენი წლის ხარ?
- ზუსტად იმდენი წლის ვარ, როგორც გამოვიყურები... ადამიანი ყოველთვის ადეკვატურად უნდა აღიქვამდეს ყველაფერს. ჩემი აზრით, სხვამ უნდა შეაფასოს, ასაკთან შედარებით მობერებულად, გაცილებით ახალგაზრდულად თუ რეალური ასაკის შესაბამისად გამოიყურები.
- რა გირჩევნია, მოითმინო წარუმატებლობა თUუ არასოდეს გამოსცადო ეს?
- ვფიქრობ, წარუმატებლობა უნდა მოითმინო და იფიქრო იმაზე, რომ კონკრეტული რაღაც ალბათ, შენი არ იყო. ყველაფერი ღმერთის ნებაა, ადამიანი კი მარცხმა არ უნდა შეაშინოს და დააღონოს, ყოველთვის წინსვლაზე უნდა ფიქრობდეს.
- თუ ცხოვრება ასეთი ხანმოკლეა, საჭიროების შემთხვევაში რატომ ვაიძულებთ თავს, ვაკეთოთ ის, რაც არ მოგვწონს?
- ეს ყველაფერი ადამიანის ბუნებიდან გამომდინარე ხდება. ალბათ იმიტომ, რომ გვინდა, კომფორტულად ვგრძნობდეთ თავს, ხშირად გვიწევს ისეთი საქმის კეთება, რაც არ მოგვწონს. თან, ადამიანებს გვიყვარს მიბაძვა და ხანდახან, სხვისი გავლენით ვაკეთებთ იმას, რაც სულაც არ გვიზიდავს.
- თუ მოგეცემა შანსი, შენს ცხოვრებაში შეცვალო მხოლოდ ერთი დეტალი, რას შეცვლი?
- ჩემი ცხოვრებიდან 2011 წლის 7 ოქტომბერს ამოვიღებდი. დღეს, როდესაც დაიკო გარდამეცვალა.
- წარმოიდგინე, რომ ბედნიერება გახდა მსოფლიოს ვალუტა. რა ტიპის სამსახური გაგხდიდა მდიდარს?
- მივხედავდი ჩემს ოჯახს და გავზრდიდი შვილებს. ვფიქრობ, შვილებზე მზრუნველობა ყველაზე კარგი სამსახურია.
- შენ აკეთებ იმას, რისიც გჯერა, თუ ცდილობ, დაიჯერო იმის, რასაც აკეთებ?
- საერთოდ, ხელს ვკიდებ ისეთ საქმეს, რომელსაც ვიცი, რომ ასე თუ ისე, კარგად გავართმევ თავს. ძალიან მეოცნებეც არ ვარ.
- დავუშვათ, დაადგინეს, რომ ადამიანი საშუალოდ 40 წელს ცოცხლობს - ამის გათვალისწინებით, რას შეცვლიდი შენს ცხოვრებაში?
- ალბათ, უფრო მეტ ყურადღებას დაუთმობდი ახლობლებს, საყვარელ ადამიანებს, სპორტს, სწორ კვებას, მოგზაურობას, სხვადასხვა ქვეყნის კულტურისა და ენების შესწავლას...
- რამდენად აკონტროლებ ყველა იმ მოვლენას, რაც შენს ცხოვრებაში ხდება?
- ჩემს ირგვლივ ყველაფერს შეძლებისდაგვარად ვაკონტროლებ. თუმცა, თავადაც იცით, რომ ყველაფერი ჩვენს ნება-სურვილზე არ არის დამოკიდებული.
- ნაცნობებთან ერთად, სასადილოდ წახვედი. ისინი შენი მეგობრის უსამართლოდ გაკრიტიკებას იწყებენ და არ იციან, რომ ის ადამიანი შენი მეგობარია. როგორ მოიქცევი?
- რა თქმა უნდა, მათ საუბარს შევაწყვეტინებ და ვეტყვი, რომ ამ ადამიანის შეფასებისას ცდებიან. მეგობარს აუცილებლად დავიცავ!
- თუ გთხოვეს, დედმამიშვილისთვის ან მომავალი შვილისთვის რჩევის სახალხოდ მიცემა, რას ეტყვი?
- ვურჩევ, უფალთან იყოს ყველაზე ახლოს, არა მარტო მაშინ, როდესაც გაუჭირდება, არამედ მაშინაც, როდესაც კარგად და ბედნიერად გრძნობს თავს.
- დაარღვევდი თუ არა კანონს საყვარელი ადამიანის გადასარჩენად?
- რთულია ამ კითხვაზე პასუხის გაცემა... ალბათ, კი, საყვარელი ადამიანის გადასარჩენად ყველანაირ კანონს დავარღვევდი.
- რით განსხვავდები სხვა ადამიანებისაგან?
- არც არაფრით. უბრალოდ, თითქმის ყველაფერი, რასაც მე ვაკეთებ, საჯარო ხდება. შეიძლება, საქმე სხვამ ჩემზე ბევრად კარგად გააკეთოს და ეს არ გამოჩნდეს, მე კი ყურადღების ცენტრში ვარ... აქვე გეტყვით: მეც მაქვს დადებითი და უარყოფითი ჩვევები, მეც ვიცი ტირილი და გლოვა...
- გაიხსენე ის, რაზეც ოდესღაც ოცნებობდი და ვერ აისრულე.
- არც არსებობს ისეთი რამ, რაზეც ვოცნებობდი და ვერ ავისრულე. ალბათ იმიტომ, რომ რაღაც გრანდიოზულზე არასდროს მიოცნებია.
- გარანტირებული კეთილდღეობის სანაცვლოდ, საცხოვრებლად სამუდამოდ სხვა ქვეყანაში წასვლა რომ შემოგთავაზონ, როგორ მოიქცევი?
- შემოთავაზებები დღესაც მაქვს. შესაძლებელია, სულ მალე საზღვარგარეთ წავიდე სასწავლებლად. თუმცა, ყველაზე ბედნიერად თავს ჩემს ქვეყანაში ვგრძნობ და საბოლოოდ, არჩევანს სამშობლოზე გავაკეთებ. აქაურობის გარეშე დიდხანს ვერ გავძლებ.
- როცა ლიფტის ღილაკს ნერვიულად, რამდენჯერმე აჭერ, მართლა გჯერა, რომ ლიფტი ასე უფრო მალე მოვა იმ სართულამდე, სადაც დგახარ?
- კი, ამის მჯერა (იცინის). ალბათ, ეს ფსიქოლოგიური მომენტია....
- რომელს ისურვებდი: იყო უბედური გენიოსი, თუ ბედნიერი სულელი?
- ალბათ, უფრო ბედნიერი სულელი ვიქნებოდი. ზოგადად, სულელებს გაცილებით უმართლებთ ან შეიძლება, არც უმართლებთ, მაგრამ უბრალოდ, არ არიან ჩაციკლულები ამა თუ იმ ცხოვრებისეულ მომენტზე და იოლად გადააქვთ სირთულეები.
- ისურვებდი ისეთივე მეგობარს, როგორიც თავად ხარ?
- დიახ, ორივე ხელს ვწევ: ვისურვებდი ზუსტად ისეთი მეგობრის ყოლას, როგორიც მე ვარ სხვებისთვის და მყავს კიდეც ასეთი მეგობარი, რაც ძალიან მახარებს.
- რა უფრო ცუდი იქნება: მეგობარი სამუდამოდ სხვა ქვეყანაში წავიდეს საცხოვრებლად თუ ახლოს გყავდეს, მაგრამ შეწყვიტოთ ურთიერთობა?
- მირჩევნია, სხვა ქვეყანაში იცხოვროს. სხვათა შორის, ზუსტად ახლა ვარ მსგავს სიტუაციაში: უახლოესი მეგობარი საზღვარგარეთ მიდის. ვიცი, კარგა ხანი ერთმანეთს ვეღარ ვნახავთ. თუმცა, XXI საუკუნეში კომუნიკაციის პრობლემა არ არის და ეს შეგვიმსუბუქებს მდგომარეობას.
- ყველაზე მეტად, რის გამო ხარ სამყაროსადმი მადლიერი?
- მყავს მყარი და ლამაზი ოჯახი. ვარ ჯანმრთელი და კარგად მაქვს გააზრებული ჩემი სამომავლო გეგმები - ეს არის ის, რაც მაძლევს უფლებას, რომ ვთქვა: მე ბედნიერი ვარ!
- რომელს აირჩევ: ძველი მოგონების წაშლას თუ ახლის მოპოვებას?
- ალბათ, ახლის მოპოვებას.
- შესაძლებელია სიმართლის გაგება ბრძოლის გარეშე?
- კი, ეს შესაძლებელია და მას სწორი დიპლომატიური სვლა ჰქვია. ადამიანი დიპლომატი უნდა გახდე ამა თუ იმ სიტუაციაში, სწორად დაალაგო ყველაფერი და კარგად გააანალიზო, რა ხდება შენს ირგვლივ. თუ ასე მოიქცევი, შესაძლებელია, ბრძოლის გარეშეც მიაღწიო მიზანს.
- შენი ყველაზე დიდი შიში...
- (მაწყვეტინებს) მეშინია საყვარელი ადამიანის დაკარგვის.
- გახსოვს, დაახლოებით 5 წლის წინ რაზე იყავი გაბრაზებული?
- ალბათ, 5 წლის წინ უფრო ადვილად ვკარგავდი ადამიანებს, მეგობრებს. დღესდღეობით კი ასე აღარ ხდება... ამ კითხვაზე სხვა პასუხს ვერ გაგცემ.
- რა არის შენი ბავშვობის დრო­ინდელი, ყველაზე ბედნიერი მოგონება?
- მამას ჰყავდა დიდი, ე.წ. საოჯახო მანქანა "შევროლეტი", რომელშიც დაახლოებით 8 ადამიანი ეტეოდა და ამ მანქანით ვმოგზაურობდით სხვადასხვა ქვეყანაში. ეს არის ჩემი ბავშვობის დროინდელი ყველაზე ლამაზი მოგონება.
- წარსულში ჩადენილმა რა ქმედებამ გაგრძნობინა თუნდაც, წამით, რომ ადამიანი ხარ?
- რთული კითხვაა... შეიძლება, ტყუილმა და შემდეგ თავი გავიმართლე იმით, რომ მეც ადამიანი ვარ, შეცდომებს ამიტომაც ვუშვებ. თუმცა, ისეთი ტყუილი, რის გამოც შეიძლება დღეს შემრცხვეს, არასდროს მითქვამს.
- თუ არა ახლა, მაშინ როდის?
- მაშინ, როცა ამის დრო მოვა და ამას იგრძნობ. ცხოვრება მიგვანიშნებს ხოლმე, რა დროს რა უნდა გავაკეთოთ.
- თუ ჯერ კიდევ არაფრისთვის მიგიღწევია, დასაკარგი არაფერი არ გაქვს. ასეა?
- თუ ჯერ არაფრისთვის მიგიღწევია, ე.ი. უკვე დაკარგე ყველაზე ძვირფასი რამ - დრო, რომელმაც ჩაიარა და უკან ვეღარ დააბრუნებ!
- შეგიძლია დაუფიქრებლად უპასუხო თუ არა კითხვას: რა არის კარგი და რა ცუდი?
- არა, დაუფიქრებლად ვერაფერზე ვიტყვი, რომ კარგია ან ცუდია. სხვებს არასდროს განვსჯი. ეს უფლება მხოლოდ უფალს აქვს.
- ახლა მაგიდაზე მილიონი დოლარი რომ დაგიწყონ და გითხრან, ამას მოგცემთ, ოღონდ სამსახური ახლავე მიატოვეო, როგორ მოიქცევი?
- ხომ იცით, ამ ცხოვრებაში ყველაფერი ბუმერანგივით, უკან გვიბრუნდება. ჰოდა, გააჩნია, ადამიანს როგორი სამსახური გაქვს: თუ შენი წამოსვლით მილიონობით ადამიანი დაზარალდება, მაშინ ეს არ უნდა გააკეთო, მაგრამ თუ ამ ნაბიჯით ზიანს არავის მიაყენებ, უნდა აიღო მილიონი დოლარი და შეირგო.
- გაყიდდი შენი ცხოვრების
10 წელს მსოფლიო აღიარებაზე?
- არა, არ გავყიდდი. ცხოვრება ისეთი ხანამოკლეა, რომ ყოველი წამით უნდა ისიამოვნო. ან სად არის იმის გარანტია, რომ მსოფლიო აღიარებით იქნები ბედნიერი?
- თუ ჩვენ შეცდომებზე ვსწავლობთ, რატომ გვეშინია მათი დაშვება?
- ადამიანები ვართ და გვაქვს შეცდომის დაშვების უფლება. უბრალოდ, ერთი და იგივე შეცდომა არ უნდა დაუშვა. გამოცდილებამ, ცხოვრებამ რაღაცები უნდა გვასწავლოს.
- ბოლოს როდის მოისმინე საკუთარი გულისცემა?
- დღეს... მომენტი, როცა შენთვის საყვარელი ადამიანი გირეკავს, ყოველთვის ამაღელვებელია. ამ დროს უნებურად შეძლებ, კარგად მოუსმინო საკუთარი გულის ფეთქვას.
წყარო: ambebi.ge