• როგორ მოირგო მილიონერ კაკაჩიას შემდეგ ექს-პრეზიდენტ შევარდნაძის როლი დავით კვირცხალიამ

    რუსთაველის თეატრის მსახიობი დავით კვირცხალია ფართო მაყურებელმა ბოლო დროს პოპულარული სერიალით - "ჩემი ცოლის დაქალები" გაიცნო და შეიყვარა. გრიშა კაკაჩია ამ პროექტის ერთ-ერთი გამოკვეთილი სახეა, მისთვის დამახასიათებელი მანერებითა და მეტყველებით...

    მსახიობი დავით კვირცხალია ცოტა ხნის წინ მრავალსერიან ფილმში "ჰეროკრატიაშიც" გამოჩნდა, სადაც ექსპრეზიდენტ ედუარდ შევარდნაძის როლი მოირგო...



    AMBEBI.GE-მ მსახიობთან ინტერვიუ სწორედ ამ როლზე საუბრით დაიწყო:

    - ექსპრეზიდენტ შევარდნაძის როლზე შემოთავაზება ვისგან მიიღეთ?
    - არასდროს, არავის უთქვამს და არც გამხუმრებია, რომ ამ პიროვნებას ვგავდი, ან რამე მსგავსი იყო. რატომღაც ეს ჩემში გოგა ხაინდრავამ აღმოაჩინა. მე და გოგა დიდი ხნის მეგობრები ვართ, თითქმის ერთდროულად ვსწავლობდით, სარეჟისოროც მაქვს დამთავრებული. ერთ უბანში, ხილიანზე ვცხოვრობდით. მოკლედ, ახალგაზრდობიდან ვიცნობთ ერთმანეთს. თუმცა, სანამ გოგა მეტყოდა, სინჯები შევარდნაძის როლზე უნდა გაიაროო, მანამდე მიშა აფხაზავამ შემომითვალა, - რაღაც კასტინგებია და მობრძანდითო. ვიცოდი, რომ დიდი პროექტი უნდა განხორციელებულიყო, ხოლო თუ რა, არ ვიცოდი. რატომაც არა, ჩემს საქმეზე მიბარებდნენ და შემართებით წავედი. იქ მისულს გოგა დამხვდა და მითხრა, - შევარდნაძის როლზე უნდა გაესინჯო და გრიმიორებს უთხრა, - გრიმი გაუკეთეთო.

    - ეს რომ გაიგეთ, რა რეაქცია გქონდათ?
    - გამეცინა, - რას ამბობ, გოგა-მეთქი? მე ვიცნობდი კარგად შევარდნაძეს და აი, ნახე, როგორ გამოგივაო. სიტყვა სიტყვით არ მახსოვს, მაგრამ დაახლოებით ასეთი ლაპარაკი გვქონდა. მაგრამ მეორე მხრივ შინაგანად ჩემში რაღაც მოხდა, - მესიამოვნა ისტორიული პიროვნების როლის შემოთავაზება... მოკლედ, გრიმიორებმა ქოჩორი დამაწებეს და მეც მომეჩვენა, რომ ჩვენ შორის რაღაც მსგავსება იყო. თუმცა გაორება დამემართა: როგორ ვითამაშო ამხელა კაცი, რომელსაც არა მარტო საქართველოში, მსოფლიოში იცნობდნენ...

    გოგამ მითხრა, რომ არ იყო დიდი როლი, მაგრამ უნდოდა, რომ მე მეთამაშა, მით უფრო, რომ 100% მსგავსება საჭირო არ იყო. მას მერე, რაც უკვე გადაწყდა, რომ ეს როლი უნდა მეთამაშა, უკვე ჩემს გმირზე დავფიქრდი, - ეს იყო კაცი, რომელიც ლამის მთელი ჩემი ცხოვრების მანძილზე მართავდა ჩემს ქვეყანას, გარდა ამისა, მიმაჩნია, რომ მსოფლიო დონის პოლიტიკოსი იყო, რაც საქმით დაამტკიცა კიდეც. ეს ძლიერი მუხტიც ვიგრძენი და ავიღე ყველა ის დოკუმენტური ვიდეომასალა, რომელსაც სანახავად ჩავუჯექი და ვაკვირდებოდი...

    - გადაღებები ექსპრეზიდენტ შევარდნაძის რეზიდენციაში ხომ არ გქონდათ?
    - კი, ყველაფერი მის რეზიდენციაში, კრწანისში ხდებოდა. მისი კაბინეტი გარდაცვალების შემდეგ მხოლოდ იმ დღეს გააღეს...

    - რა იგრძენით, როდესაც იქ შეხვედით?
    - საოცარი პრესი... ოჯახის წევრებიც დაგვხვდნენ, მიუხედავად ჩემი პატივისცემისა, პირადად არავის ვიცნობდი. წარმოიდგინეთ როგორია, როცა ამდენი თვალი გიყურებს და გაკვირდება, - აბა, ვინ გაბედა, ამ როლის თამაში? რაც მათგან აბსოლუტურად ბუნებრივი რეაქცია იყო, ამხელა მამა ჰყავდა ქალბატონ მანანას... ალბათ მანამდე უთხრეს, "კაკაჩიას" რომ თამაშობს, ის მსახიობი შეასრულებს ამ ფილმში მამათქვენის როლსო, არ ვიცი. მოკლედ, გაოცებულები მიყურებდნენ, თან, მიღიმოდნენ, უკვე გრიმით ვიყავი მისული. იქ იყო შევარდნაძის მძღოლი, პოლკოვნიკი გივი ელიზბარაშვილი, დაცვის ბიჭები, ვინც მის სიცოცხლეში

    ექსპრეზიდენტთან მუშაობდნენ, იქვე იყო დაჯავშნული მანქანა, რომლითაც პრეზიდენტი დაჰყავდათ, - ჩემზე ამ ყველაფერმა იმოქმედა. ჰო, გავიცანი ედუარდ შევარდნაძის შვილიშვილი, ლაშა შევარდნაძე, პაატა შევარდნაძის ვაჟი და ყველაზე დიდი კომპლიმენტი ჩემთვის ის იყო, როდესაც ლაშამ სოციალურ ქსელში შემაქო და თქვა, - ეს ადამიანი ბაბუაჩემს ასახიერებსო. ალბათ შვილიშვილი რომ იტყვის ასეთ თბილ სიტყვებს, სულ სხვა შეფასებაა.

    - კიდევ რას გაიხსენებთ გადაღებებიდან?
    - ქალბატონი მანანას და იქვე ქალბატონ მარინას (გვარი არ მახსოვს, ადამიანი, ვინც პრეზიდენტის არქივს განაგებს) ვუთხარი, რა თქმა უნდა, ხუმრობით, - ვიცი, რომ ჩემზე მაგარი კაცი იყო და ჩემზე მეტ საქმეებს აკეთებდა-მეთქი, მაგრამ ღვთის წყალობით, მე დამეკისრა მისი როლი და მძიმე მდგომარეობაში ვარ. ამიტომ, გთხოვთ, არ დამინდოთ და თუ შენიშვნას მომცემთ, დიდად დამეხმარებით-მეთქი. როგორ გეკადრებათო. მერე გავშინაურდით კიდეც, ვსაუბრობდით. მანანა შევარდნაძე დამეხმარა იმაში, რომ მითხრა, - მაგალითად, მამა ასე დაჯდებოდაო, ქალბატონმა მარინამ მითხრა, ამ კონკრეტულ სცენაში ეს ხელი კი არა, მეორე ხელის ასე გამოყენება ჯობია, უფრო სახასიათო იქნებაო.

    საბოლოოდ, დიდი პასუხისმგებლობა იყო, რომელიც მთრგუნავდა...სერია სანამ ეთერში არ გავიდა, ვღელავდი. არ ვიცოდი, როგორ მიიღებდა მაყურებელი, ან თუნდაც ჩემი ახლობლები, ნაცნობები რას მეტყოდნენ...

    - როგორც რიგითი მაყურებელი, მივხვდი, რომ ეს როლი შედგა.
    - როდესაც ამას მეუბნებიან, მიხარია, თუ ამის ჩვენება მაყურებლისთვის შევძელი, ამას რა სჯობია? გადაღება 3-4 დღე გაგრძელდა და დიდი სითბო ვიგრძენი შევარდნაძეების ოჯახისგან. ქალბატონმა მანანამ მაჩუქა წიგნი, რომელიც პრეზიდენტ შევარდნაძეზე მისი გარდაცვალების შემდეგ გამოვიდა, წიგნში შესულია მსოფლიო პოლიტიკოსების შეფასებები ექს-პრეზიდენტზე. ეს წიგნი ჩემთვის რელიკვიაა.

    ბოლოს იმასაც ვიტყვი, რომ ალბათ უკეთესადაც შეიძლებოდა თამაში, თუმცა ფაქტია, რომ ჩემი სამსახიობო კარიერის მანძილზე მნიშვნელოვანი მომენტი იყო - ეპიზოდური ტევადობის, მაგრამ საპასუხისმგებლო როლი.

    - ანუ როგორია გზა - კაკაჩიადან შევარდნაძემდე?

    - არა, ასე არასდროს მიფიქრია და ასე არც ვაზროვნებ, ერთი როლიდან მეორემდე არასდროს არაფერი შემიფასებია. ალბათ მთელი ცხოვრების მანძილზე დავაგროვე იმდენი გამოცდილება, ოსტატობის დოზა, რომელმაც მოიცვა ერთიც და მეორეც. ასე რომ, აქედან იქამდე ასეთი ეტაპები ცხოვრებაში არ მქონია. თუ ასეა, მაშინ უნდა დავიწყო სალამურადან რომეომდე, რომეოდან ერეკლემდე და ა.შ. კინოშიც მითამაშია უცხოურ ფილმებშიც და ეტყობა, ეს ყველაფერი ასაკში თავს გახსენებს და გეხმარება. თუმცა არ ვთვლი, რომ ეს ყველაფერი რაღაც საოცრებაა.

    - "ჩემი ცოლის დაქალების" გადამღები ჯგუფის წევრებს რაიმე საყვედური ხომ არ უთქვამთ, რომ "ჰეროკრატიას" გადაღებაში მიიღეთ მონაწილეობა?
    - ჩემთვის არავის არაფერი უგრძნობინებია, გუშინწინ გვქონდა გადაღება და აბსოლუტურად ჩვეულებრივ რეჟიმში გაგრძელდა მთელი პროცესი. ყველა ამბობს, რომ აპოლიტიკური ადამიანი ვარ, მიუხედავად იმისა, რომ ამა თუ იმ მოვლენის პოლიტიკური შეფასება შემიძლია... უპირველესად მსახიობი ვარ და როლი უნდა ვითამაშო.



    წყარო: ambebi.ge
    1 460 ნახვა
    GOGATV