• "სხვა სამყაროდან მოსულების მომაჯადოვებელი წარმოდგენა" - რას წერს ამერიკული პრესა ანსამბლ "ბასიანზე"

    საქართველოს ხალხური სიმღერის სახელმწიფო ანსამბლი "ბასიანი" ამერიკის შეერთებულ შტატებში საკონცერტო ტურნეს მართავს.

    ანამბლმა ტურნე 2016 წლის 16 ოქტომბრიდან კალიფორნიიდან დაიწყო, სადაც 10 დღე დაჰყო და კონცერტები 4 ქალაქში გამართა: სტენფორდი, ბერკლი, სანტა მონიკა და სანტა ბარბარა. კონცერტებზე არნახული მოთხოვნის გამო, ერთ დღეს "ბასიანს" ზედიზედ ორი კონცერტის გამართვაც კი მოუხდა.

    ტურნეს პირველ კონცერტს, რომელიც "ბასიანმა" კალიფორნიის შტატში, სტანფორდის დიდ საკონცერტო დარბაზში "Stanford Live’s Bing Concert Hall" გამართა, აღფრთოვანებულ მსმენელთა დიდი ოვაციები და გაზეთ "Los Angeles Times"-ის გამოხმაურება მოყვა.

    ბასიანის მიერ ნიუ იორკში გამართული კონცერტის შემდეგ საიტი newyorkmusicdaily წერს:

    "თაუნ ჰოლში გასულ ღამეს ატმოსფერო სეზონის შეუფერებლად ბნელი და სუსხიანი არ ყოფილა. წვიმაში ენთუზიასტები, ძირითადად რუსულენოვანი ხალხი ნიუ იორკის სცენაზე წლის ერთ-ერთი ყველაზე არაამქვეყნიური მელოდიების მომსწრენი გახდნენ. ქართული მუსიკის ცნობა მარტივია, ასეთი ჟღერადობა მსოფლიოში არაფერს აქვს. თორმეტი მამაკაცი რომელიც წარმოადგენს ანსამბლს "ბასიანი" ეკლექტურ და ენერგიულ, ვნებიან პოლიფონიებს და შთამბეჭდავ ხმოვანებას ქმნიდა.

    ურთულესი მუსიკალური გადასვლები მათ დამახსოვრებული ქონდათ და სუფლიორის გარეშე მღეროდნენ. მათი რეპერტუარი ასობით წელს ითვლის, თუმცა იმდენად რთული ჟღერადობისაა, რომ ავანგარდულად ჟღერს. მუსიკა, რომელიც ძველია, მოულოდნელად ახალი ხდება. სტრავინსკიმ მსგავსი მელოდიები რუსეთის ჩრდილოეთში წაიღო და "გაზაფხულის რიტუალად" აქცია. მაშინ ალბათ არავინ იცოდა თუ რამდენი ისესხა მან ძველი სოფლების სიმღერებიდან" - წერს გამოცემა.

    ამასთან, ტურნეს ფარგლებში 28-29 ოქტომბერს ფონდ "ქართული გალობის" მხარდაჭერით ნიუ-იორკის ერთ-ერთ პრესტიჟულ საკონცერტო სივრცეში - ShapeShifter Lab - პირველად განხორციელდა ნოვატორული პროექტი აშშ-ში მოღვაწე წარმატებული პიანისტისა და კომპოზიტორის გიორგი მიქაძისა და ანსამბლ "ბასიანი"-ს მონაწილეობით, სახელწოდებით "Giorgi Mikadze with the State Ensemble Basiani - Video & Recording Session".

    აღნიშნული პროექტის მიზანია ტრადიციული და თანამედროვე მუსიკის სინთეზირების შედეგად ახალი, უპრეცენდენტო მუსიკალური პროდუქტის შექმნა, რომელშიც წარმოდგენილია ქართული კულტურის მრავალსაუკუნოვანი მონაპოვარისა და თანამედროვე მუსიკალური მიღწევების კოლაბორაცია, უმაღლესი სტანდარტის ვიდეო და აუდიო ჩანაწერების შექმნა, ახალი თანამედროვე მუსიკალური პროდუქციის პოპულარიზაცია და მსოფლიო მუსიკალურ ბაზარზე გატანა.

    ანსამბლი "ბასიანი" ამერიკული ტურნეს შემდეგ სამშობლოში 5 ნოემბერს დაბრუნდება.
    წყარო: ambebi.ge
    1 150 ნახვა
    GOGATV