• "ერთადერთი იმას ვიტყვი რომ ბედნიერი ვარ" - თათა ჯაში პირად ცხოვრებაზე

    როგორი მამაკაცები მოსწონს თათა ჯაშს

    უცხოეთში წარმატებული ქართველი ბალერინა - თათა ჯაში პროექტში - "შენ შეგიძლია ცეკვა" გამოჩნდა და ჯიურის წევრების აღფრთოვანებაც დაიმსახურა. რა ეტაპები გაიარა ბალერინამ დღემდე და რატომ გახდა იძულებული, საბალეტო კარიერის ზენიტში ყოფნისას შეეწყვიტა პროფესიული საქმიანობა? - ამაზე თათამ გულახდილად ისაუბრა.


    ბავშვობა
    - აქტიური ვიყავი. რუსულად კითხვა და საუბარი 4 წლიდან დავიწყე. მთელი ბავშვობა მოსკოვში მაქვს გატარებული. ცნობისმოყვარე გახლდით, ყველაფერი მაინტერესებდა და რასაც ვერ ვკითხულობდი, იმას დედა მიკითხავდა დაუღალავად. ვერ ვიტყვი, რომ მშობლები ხშირად მიბრაზდებოდნენ.

    - მშობლებისგან ყველაზე ხშირად, რის გამო იღებდი შენიშვნებს?
    - ალბათ, ჩემი მავნე ექსპერიმენტების გამო... სულ რაღაც სასაცილო ცდებს ვატარებდი. მაგალითად, მაინტერესებდა ქაღალდის ფული როგორ იწვის, მამიკოს მართვის მოწმობა მაკრატლით ადვილად იჭრება თუ არა (იცინის) და ა.შ. ერთხელ, აგარაკზე კიბესთან მავთულები გავაბი და იქვე მივიმალე, შედეგის სანახავად. შედეგმაც არ დააყოვნა: ჩემი საყვარელი ბებო წაიქცა... რომ მკითხეს, ეს რატომ გააკეთეო? ვუპასუხე: მაინტერესებდა, პირველი ვინ შეამჩნევდა-მეთქი. საბედნიეროდ, ბებიას წაქცევა მუხლის დაჟეჟილობით შემოიფარგლა.

    - როგორი მოსწავლე იყავი? მასწავლებლებს აბრაზებდი?
    - ნორმალური მოსწავლე ვიყავი, ზარმაცი არასდროს ვყოფილვარ. უნდა ვაღიარო, რომ მასწავლებლებისთვის სხვადასხვა ოინის მომზადების ინიციატორი ხშირად ვყოფილვარ. თუმცა, ზღვარგადასული არასდროს არაფერი მომწონდა და ჩემი ხუმრობებიც ყოველთვის უწყინარი იყო. "შატალოზე" ხშირად წავსულვარ, მაგრამ არ მახსენდება, ოდესმე ამის ორგანიზატორი ვყოფილიყავი.

    - ბავშვობაში რომელ პროფესიაზე ოცნებობდი?
    - დაახლოებით 2 წლისას მითქვამს, - ბალერინა უნდა გამოვიდე-მეთქი. არა მგონია, მაშინ ეს გააზრებულად მეთქვა, მაგრამ ფაქტია, საბოლოოდ ეგ პროფესია გახდა ჩემი ცხოვრების ნაწილი.

    პირველი სიყვარული
    - საბავშვო ბაღში ან სკოლის პერიოდში გიყვარდა?
    - საბავშვო ბაღში არ მივლია, სკოლის პერიოდშიც მსგავსი არაფერი მახსენდება. ეზოში ჩასვლის და თამაშის დროც კი არ მქონდა მომენტი, რომ ვინმეს გავპრანჭვოდი.

    - სკოლის დამთავრების შემდეგ სწავლა სად გააგრძელე?
    - ბერლინში ჩავაბარე, "ერნესტ-­ბუშის" სახელობის თეატრალურ უნივერსიტეტში, ხელოვნებათმცოდნეობის ფაკულტეტზე, რომელიც წარმატებით დავასრულე კიდეც.

    - როგორც ვიცი, მსახიობიც ხარ. ასეა?
    - დიახ, ბერლინში სამსახიობო კურსები გავიარე და რამდენიმე ფილ­მშიც მივიღე მონაწილეობა. თუმცა, თავს წარმატებულ მსახიობს ნამდვილად არ ვუწოდებ. რაც შეეხება ბალეტს: ამ სფეროში ჩემი მიზანდასახულობითა და დაუღალავი შრომით მოვიპოვე წარმატებები.

    - სიზარმაცის გამო საქმე გაგიფუჭებია?
    - ძალიან შრომისმოყვარე ვარ და ალბათ, სწორედ ეს იყო ხშირად ჩემი ტრავმების მიზეზი - მუშაობისას დაღლას ვერ ვგრძნობ. დღესდღეობით ვცდილობ, დავიცვა ზღვარი მუშაობასა და დასვენებას შორის.

    პირველი წარმატება
    - პირველი წარმატება 9 წლის ასაკში ვიგემე. საერთაშორისო საბალეტო ფესტივალზე "ჭაბუკიანი-ბალანჩინის" პრიზი გადმომცეს საუკეთესო დებიუტისთვის. ამ ასაკში შევასრულე ტექნიკურად საკმაოდ რთული "პადედე" პუანტებზე. ჩემმა გამოსვლამ კრიტიკოსების გაოცება და აღფრთოვანება გამოიწვია.

    ჯანსაღი ცხოვრების წესი
    - ძილი მიყვარს და 8 საათზე ნაკლები თუ მძინავს, თავს არაკომფორტულად ვგრძნობ. ჩემი დილა უმეტესწილად, 10-ის ნახევარზე იწყება, 1 ჭიქა თაფლიანი ან ლიმონიანი წყლით და მსუბუქი საუზმით. 11-ზე უკვე თეატრში, დარბაზში ვდგავარ საბალეტო ძელთან და იწყება ბალეტის კლასი.

    - რას ნიშნავს შენთვის ჯანსაღი ცხოვრების წესი?
    - ჯანსაღი ცხოვრების წესი ჩემი პროფესიის შემადგენელი ნაწილია, ძალიან ბევრს ვვარჯიშობ და აუცილებელია, მთელი დღის განმავლობაში დაკარგული ენერგია სწორი კვებით ანუ ვიტამინებითა და ცილებით გაჯერებული პროდუქტებით შევივსო.

    - ალკოჰოლს თუ ეტანები? სიგარეტს ეწევი?
    - სიგარეტი არასდროს გამისინჯავს, ალკოჰოლს კი ხანდახან, მეგობრებთან ერთად, განტვირთვის დროს მივირთმევ.
    - ვინ იქონია გავლენა შენი გემოვნების ჩამოყალიბებაში?
    - ძირითადად, დედამ და დაიკომ. ასევე, გერმანიაში ცხოვრების წლებმა.

    იმიჯი
    - ხშირად იცვლი გარეგნულ იმიჯს?
    - თმაზე რაღაც ექსპერიმენტები ჩამიტარებია, მაგრამ იმიჯი რადიკალურად არასდროს შემიცვლია. ისედაც მრავალფეროვანი გემოვნება მაქვს და ერთი კონკრეტული სტილით თავს არ ვიზღუდავ.
    - რა ხდება შენს პირად ცხოვრებაში?
    - პირად ცხოვრებაზე საჯაროდ საუბარს ვერიდები. ერთადერთი, იმას ვიტყვი, რომ ბედნიერი ვარ.
    - როცა მამაკაცების ყურადღების ცენტრში ხვდები, ეს ყველაფერი გაღიზიანებს?
    - ჩემი სფერო მოითხოვს, რომ ვისწრაფოდე ყურადღების ცენტრში ყოფნისკენ.

    - როგორი მამაკაცები მოგწონს?
    - პიროვნულად ძლიერი, მანდი­ლოს­ნისადმი სათუთი დამოკიდებულებით.

    - როგორ გამოხატავენ მამაკაცები შენდამი სიმპათიას? რით ხარ მათგან განებივრებული?
    - ყურადღების გამოხატვის ბევრი, ალბათ, ყველასთვის ნაცნობი ხერხი არსებობს: ყვავილები, საჩუქრები და ა.შ. მე ძალიან მახარებს, როცა ჩემს შესრულებულ როლს აფასებენ.

    წარმატების ფორმულა
    - ბოლო დროს საკმაოდ პოპულარული ხარ. გაქვს შენი წარმატების ფორმულა?
    - წარმატების ფორმულა ნამდვილად არ მაქვს, ვაკეთებ საქმეს, რომელიც მიყვარს.

    - რას მიიჩნევ შენი ცხოვრების მარცხად? ეგუები დამარცხებას თუ ყოველთვის იბრძვი იმისთვის, რაც გულით გინდა?
    - ცხოვრება ათასი საინტერესო გამოცდილების მიღების საშუალებას გვაძლევს, ამიტომ არ მიმაჩნია მართებულად, რაიმე ჩემს მარცხად ვაღიარო. ზოგადად, პატივს ვცემ ადამიანებს, რომელთაც წაქცევის შემდეგ ადვილად შეუძლიათ წამოდგომა. ჩემს შემთხვევაში, საბალეტო კარიერაში ზენიტთან ასე ახლოს ყოფნის პერიოდში, მოულოდნელი ტრავმით, ჩემი კარი­ერა დასრულდა. 4 წლის შემდეგ კი ისევ ახალი შემართებით დავიწყე საკუთარ თავზე მუშაობა. ამხელა პაუზის შემდეგ არავის ეგონა, კიდევ თუ ვიცეკვებდი. მიუხედავად ყველაფერისა, არ შევჩერდი. ვიცი, წინ ძალიან ბევრი სირთულე და ახლიდან ასავლელ-გადასალახი საფეხურები მელოდება.

    - პროფესიული არჩევანი ოდესმე გინანია?
    - არა, არასდროს მინანია... მაშინაც კი, როცა ვერ ვცეკვავდი და სხვა სფეროში საკმაოდ წარმატებით ვმუშაობდი, ყოველღამე ცეკვაზე ოცნებით ვიძინებდი.

    - გაძლევს პროფესია იმის საშუალებას, რომ მატერიალურად დამოუკიდებელი იყო?
    - ჩემი პროფესია მაძლევს ამის საშუალებას. 15 წლიდან მატერიალურად დამოუკიდებელი ვარ.
    - ვინ არის ადამიანი, ვისი რჩევაც შენთვის ყველაზე მნიშვნელოვანია?
    - ჩემთვის ძვირფასი ადამიანებისგან რჩევებს ყოველთვის ვისმენ და შეძლებისდაგვარად ვითვალისწინებ კიდეც.

    სილამაზის რეცეპტი
    - როგორ უვლი თავს? რა არის შენი მომხიბვლელობის რეცეპტი?
    - მომხიბვლელად მთვლით? - ეს ალბათ, მეტწილად გენეტიკის დამსახურებაა. სასცენო მაკიაჟი მოგეხსენებათ, ძალიან მძიმეა, ასევე - თმის ხშირი ვარცხნაც თმის ღერებს ასუსტებს, ამიტომ ვცდილობ, სხვადასხვა ნიღბით კანისა და თმის რეგენერაციას შევუწყო ხელი.

    - რა დროს უთმობ თავის მოვლას? სილამაზის სალონებს ხშირად სტუმრობ?
    - სალონებში სიარული მიყვარს, რადგან ეს ჩემთვის განტვირთვის ერთ-ერთი საუკეთესო საშუალებაა.

    - ვინ შემოგთავაზა პროექტში - "შენ შეგიძლია ცეკვა" მონაწილეობა?
    - ყოველთვის მქონდა სურვილი, ამ პროექტში მონაწილეობა მიმეღო და ახლა ამის შანსი მომეცა. ძალიან ბევრი საინტერესო და კარგი მონაწილეა. მაქსიმალურად მოვინდომებ, რომ მაყურებელი კმაყოფილი დარჩეს ჩემი ცეკვით.
    წყარო: ambebi.ge
    1 302 ნახვა
    30-11-2016, 01:32
    GOGATV