"არ მინდა, ჩემს შვილს ასეთი მამა ჰყავდეს" - ემოციური ელენე ენუქიძის პირადი ცხოვრება

პროექტში მონაწილეობა ძალიან მინდოდა. ამისთვის საზღვარგარეთ წასვლას ვაპირებდი
19 წლის გოგონასთვის საკმაოდ დიდი ცხოვრებისეული გამოცდილების მქონე ელენე ენუქიძემ პროექტში - "შენ შეგიძლია ცეკვა" შესრულებული ნომრით ყველა მოხიბლა - გოგონამ ცეკვაში "ჩადებული" ემოცია მაყურებელსაც გაუნაწილა. სცენაზე აცრემლებული ელენე კონკურსის შემდეგ ტურში გადავიდა და წარმატების მისაღწევად, რეპეტიციებს მონდომებით გადიოდა. თუმცა, პროექტის შემდეგი ეტაპი მისთვის წარუმატებელი აღმოჩნდა... საქმესა და რთულ პირად ცხოვრებაზე სასაუბროდ, მოცეკვავე რედაქციაში გვესტუმრა...

- პროექტში მონაწილეობა ძალიან მინდოდა. ამისთვის საზღვარგარეთ წასვლას ვაპირებდი, მაგრამ შემთხვევით გავიგე, რომ ეს პროექტი საქართველოშიც დაიწყო. რა თქმა უნდა, პრეკასტინგი გავიარე და პროექტისთვის შემარჩიეს.

- რამდენი ხანია, რაც ცეკვავ?
- 4 წლიდან. ჯერ ტანვარჯიშით დაინტერესებული გახლდით, ცოტა ხანს სამეჯლისო ცეკვებს ვასრულებდი, შემდეგ საბალეტო სკოლაში შევედი... ამჟამად, პანტომიმის თეატრის მსახიობი ვარ და თეატრალურ უნივერსიტეტში, მეორე კურსზე ვსწავლობ.

- როგორც ვიცი, გარკვეული პერი­ოდის განმავლობაში ცეკვა შეწყვიტე...
- 16 წლის გავთხოვდი, 17 წლისამ ბავშვი გავაჩინე. "ვორკშოპებზე" მაინც დავდიოდი, სტილს არ ვკარგავდი, მაგრამ რეჟიმი დავკარგე, ძველებურად ფორმაში ვეღარ ვიყავი. 8 თვე ისეთ დონეზე არ მივარჯიშია, როგორიც საჭირო იყო.

- პროექტის კასტინგამდე უკვე აქტიურად ვარჯიშობდი?
- კი, ბავშვის გაჩენიდან 1 კვირაში ვარჯიში დავიწყე. "სეუში" მივედი და ისევ "არტპროჯექტელი" გავხდი - სასცენო გამოსვლებში ვმონაწილეობდი. მერე, იქიდან წამოსვლა გადავწყვიტე და გიორგი ღონღაძესთან დავიწყე სიარული, რომელმაც თავისი დასი ჩამოაყალიბა. ამჟამად, მისი დასის წევრი ვარ...

- პროექტში რა მიზნით მონაწილეობდი?
- მინდოდა, საკუთარი თავისთვის დამემტკიცებინა, რომ არა მხოლოდ კონტემპის, არამედ ყველა ჟანრის ცეკვის შესრულება შემეძლო. ვფიქრობდი, დიდ გამოცდილებას მივიღებდი. მხოლოდ სცენაზე არ ვსაუბრობ - დიდი ხანია, სცენას მიჩვეული ვარ... დიდი სტიმულია, როცა პროექტში მეგობრებთან ერთად მონაწილეობ და წარმატების მიღწევას ცდილობ.

- კასტინგზე სასცენო ნომერი დამოუკიდებლად მოამზადე?
- ეს იმპროვიზაცია იყო, არ დამიდგამს. შემიძლია, ცეკვა სხვას დავუდგა, ვასწავლო, მაგრამ საკუთარ თავს - ვერა: ზუსტად ვიცი, რომ სცენაზე გასული, გარკვეულ დონეზე დავიბნევი და ისევ "ჩემებურს გავუშვებ". ამიტომ ვიფიქრე, რომ ჩემი ქორეოგრაფიული ნომრის დასაწყისი და დასასრული უნდა მცოდნოდა, დანარჩენი - იქ რა მოხდებოდა, თავში რა მომივიდოდა, არ ვიცოდი. იმპროვიზაციას ამიტომაც მივმართე.

- სხვისი დადგმული ქორეოგრა­ფიული ნომრის შესრულება შეგიძლია?
- რა თქმა უნდა, ამ მხრივ პრობლემა არ მაქვს.

- შენ მიერ შესრულებული ნომ­რით კმაყოფილი ხარ?
- არა, რადგან ეს ჩემი შესაძლებლობის მხოლოდ 10% იყო. უბრალოდ, რა გრძნობაც სასცენო ნომერში "ჩავდე", მინდოდა, ხალხამ­დე მისულიყო. ასეც მოხდა და ეს მომეწონა.

- ყოფილა შემთხვევა, როცა მაყურებელს ცეკვით გადმოცემული შენი ემოცია ვერ უგრძნია?
- არა. ჩემთვის ცეკვა ის არის, რაც გულში მაქვს. სცენაზე თოჯინასავით გასვლა, ფეხის აწევა და გადაყირავება არ მახასიათებს. შინაარსიანი ცეკვა მიყვარს.

- ჟიურის წევრებიდან შენთვის ყველაზე მნიშვნელოვანი ვისი შეფასება იყო? იქნებ, რომელიმე მათგანის შეფასების გეშინოდა?
- დუტასი არ მეშინოდა (იცინის). სალომეს სტილის ცეკვას არ ვასრულებდი და შეცდომას ვერ მიპოვიდა, მაგრამ ნათიასი ძალიან მეშინოდა, რადგან ისიც ზუსტად კონტემპს ცეკვავდა, მეც საბალეტო სკოლა მაქვს დამთავრებული...

- ზაკზე რას გვეტყვი?
- ზაკი ძალიან საყვარელი კაცია. თუკი ადამიანს შენიშვნას აძლევს, უტაქტოდ არაფერს იტყვის. ყოველთვის იმას ამბობს, რაც არის. მომწონს, როცა შენიშვნას მეუბნებიან. უფრო მეტად შექების მეშინია, რადგან შეიძლება, მოვდუნდე...

- ჯერ კიდევ მეორე ტურში შენს გადასვლასთან დაკავშირებით, ჟი­უ­რი ორჭოფობდა. ამ დროს რას გრძნობდი?
- ვერ წარმოიდგენთ, ისე ვნერვიულობდი - ხელები მიკანკალებდა... ვფიქრობდი, - ოღონდ ახლა გადამიყვანონ და ყველაფერს გავაკეთებ-მეთქი. სალომემ ბილეთი რომ ასწია, ჩემზე ბედნიერი არავინ იყო!..

- კასტინგზე ნებისმიერი შედეგისთვის მზად იყავი?
- რა თქმა უნდა, "კიც" და "არაც" ყოველთვის გააზრებული მაქვს. წინ ვიყურები, ფარ-ხმალს არასოდეს ვყრი, დეპრესია არ მჩვევია.

- პირად ცხოვრებაზე რას გვეტყვი?
- ცოტა რთული თემაა, რადგან დუტას თქმისა არ იყოს, ძალიან პატარა ვარ საიმისოდ, რომ უკვე ოჯახი შევქმენი და პლუს, დავანგრიე კიდეც. ჩემი ოჯახი იმიტომ დაინგრა, რომ სახლში თითქმის არ ვიყავი, სულ რეპეტიციებზე დავდიოდი... მეუღლე ბრაზდებოდა, - ფეხმძიმე სად დადიხარო?! ჩვენი დაშორების ერთ-ერთი მიზეზი ესეც იყო: ერთმანეთს ვერ გავუგეთ, ვერ შევეწყვეთ.

- თავად რა სფეროში მუშაობს?
- როგორც ვიცი, "ჯავახიშვილში" სწავლობს. არც მე და არც ბავშვს მასთან ურთიერთობა აღარ გვაქვს - ასე მე გადავწყვიტე, რადგან არ მინდა, ჩემს შვილს ისეთი მამა ჰყავდეს, რომელიც 3 თვით გამოჩნდება, 6 თვე დაიკარგება და ა.შ.

- რაც ეკრანზე გამოჩნდი, ყოფილი მეუღლე არ შეგხმიანებია?
- უბრალოდ, მომწერა: შენი გამოსვლა ვნახე, წარმატებას გისურვებო, სხვა არაფერი.

- ყველაზე მეტად ვინ გგულშემატკივრობდა?
- ოჯახის წევრები, ჩემი შვილის ნათლია - ლევან გელბახიანი. სხვათა შორის, ჩემს შვილს 6 ნათლია ჰყავს (იცინის) და ექვსივე მგულშემატკივრობდა ისევე, როგორც ჩემი რეჟისორი - გიორგი ღონღაძე.

- შენი შვილის შესახებ გვიამბე. როგორი გოგონაა?
- ძალიან ცანცარაა. მისი სახით, სახლში პატარა წიწილიკო მყავს. ცეკვა მასაც უყვარს. მუცელშიც კი "ცეკვავდა" - წრეზე დადიოდა და შიგნიდან მირტყამდა (იცინის). საბავშვო ბაღი უყვარს. იქაურობას შეეჩვია - დედასავით კომუნიკაბელურია. საერთოდ, ხასიათითაც და გარეგნობითაც ძალიან მგავს. ყველა და ყველაფერი უყვარს, მათ შორის - ძაღლი და ზღვის გოჭიც (იცინის)...

- ბავშვზე ზრუნვას როგორ ახერხებ?
- ყველაფერში დედ-მამა დამეხმარა, თუმცა უპირველეს ყოვლისა, თავად ნატალიმ შემიწყო ხელი, რადგან ბაღში სიარული დაიწყო. მანამდე ძიძა მყავდა და ბავშვის მოვლაში ის მეხმარებოდა. ახლა ნატალი დილის 9 საათზე ბაღში მიმყავს, შემდეგ სახლში მოვდივარ, ვჭამ და უნივერსიტეტში გავრბივარ. 6 საათზე ნატალი ბაღიდან გამომყავს, ვაჭმევ და თავადაც ვვახშმობ. პროექტის დატოვებამდე, საღამოს 8-ზე რეპეტიციაზე მივდიოდი, შინ კი 12 საათზე ვბრუნდებოდი.

- პროექტში ძლიერ კონკურენტებად ვის მიიჩნევდი?
- პატარა, მაგრამ ძალიან ძლიერ ნიტას, ჩემს მეგობარსა და პარტნიორს - დათა ლევინიცს, ნატალის ნათლიას - გიორგი ბარნაძეს, ხოსროს, ლუკას, პატარა ნატას... თათა ჯაშს კონკურენტად არ ვთვლიდი: ის სხვა დონეზეა, მე - სხვაზე. თუმცა, ძალა ყველა სტილის ცეკვაში უნდა მოგვესინჯა და ერთმანეთს შევეჯიბრებოდით.
წყარო: ambebi.ge