• "ასე ცხოვრება ძალიან კარგია" -რა სურვილი აუხდა შრომისმოყვარე ნიტა ლომიძეს

    "პოპულარობა მომწონს, ეს უმაგრესი შეგრძნებაა!"

    პროექტში - "შენ შეგიძლია ცეკვა" გამოჩენისთანავე, 13 წლის ნიტა ლომიძემ თავისი ცეკვით მაყურებელი და ჟიურის წევრები აღაფრთოვანა და დიდი მოწონებაც დაიმსახურა. პროექტი უკვე აქტიურ ფაზაში გადავიდა. გასულ სამშაბათს, ყველაზე უმცროსმა მონაწილეებმა - ნიტა ლომიძემ და ლუკა ყარმაზანაშვილმა "კონტემპორარი" შეასრულეს...

    ნიტა:
    - ძალიან ვღელავდი, მაგრამ ვცდილობდი, ყველაფერი კარგად ყოფილიყო. ბევრს ვვარჯიშობდი, ძალზე მონდომებული ვარ...
    - აუტსაიდერების გამოცხადებისას რას გრძნობ ხოლმე?
    - ჩემთვის ეს ყველაზე ცუდი დროა - ძალიან ვნერვიულობ. არა მხოლოდ მე, სცენაზე მდგომი ყველა კონკურსანტი ნერვიულობს. მხოლოდ ხალხის იმედად ვართ...
    - როცა თეა დარბაზშია, ეს სტიმულს გაძლევს თუ უფრო მეტად ნერვიულობ, რომ შეცდომა არ დაუშვა და დედამ არ შენიშნოს?
    - დარბაზში მისი ყოფნა უფრო მეტ სტიმულს მაძლევს, ყველაფერი კარგად რომ გავაკეთო. მგონია, მეხმარება, როცა ის დარბაზშია.
    - ჟიურის რომელი წევრის შეფასებაა შენთვის განსაკუთრებულად მნიშვნელოვანი?
    - ჟიურის თითოეული წევრის შეფასება ჩემთვის უმნიშვნელოვანესია და დიდ ყურადღებას ვაქცევ.
    - დედა ჟიურიზე მეტ შენიშვნას ხომ არ გაძლევს?
    - ახლა - არა, მაგრამ ისე, ბევრ შენიშვნას მაძლევს... რომ შევკრიბოთ, ჟიურის წევრებიც და დედაც შენიშვნებს თანაბარი რაოდენობით მაძლევენ (იცინის).
    - რომელ ცეკვაში გინდა ძალა მოსინჯო?
    - ალბათ - უფრო ლათინურში.
    - შეგისრულებია სამეჯლისო სპორტული ცეკვა?
    - "ჩა-ჩა-ჩას" ვცეკვავ. სოლო მოცეკვავე ვარ - "ლათინში" მეწყვილესთან ერთად არ მიცეკვია.
    - პროექტში ე.წ. სიცოცხლის ცეკვა ყოველთვის მზად გქონდა?
    - დიახ, სულ მზად მქონდა. საბედნიეროდ, მისი შესრულება არ დამჭირდა. ახლა "სიცოცხლის ცეკვას" მნიშვნელობა აღარ აქვს - მხოლოდ მაყურებლების იმედად ვართ...
    - და მაინც, შენი "სიცოცხლის ცეკვა" რომელი იყო?
    - 2 ცეკვა მქონდა მომზადებული - კონტემპორარი და ჯაზი.
    - მიუხედავად იმისა, რომ ყველაზე უმცროსი მონაწილე ხარ, ფაქტია - ძლიერი მეტოქე ბრძანდები. კონკურენტებისგან როგორ დამოკიდებულებას გრძნობ?
    - ვინც ნახევარფინალში გადავიდა, ყველა ძლიერია. სხვათა შორის, ასეთ პროექტებში დაძაბულობა არის ხოლმე, მაგრამ ჩვენ შორის ეს საერთოდ არ იგრძნობა - ერთმანეთის მიმართ მეგობრულად ვართ განწყობილი.
    - პროექტში მონაწილეობის შემდეგ, უფრო პოპულარული გახდი?
    - რა თქმა უნდა. "ფეისბუკზეც" ძალიან ბევრი ადამიანი მწერს, "მეგობრებში" მამატებს, ჩემი გაცნობა ბევრს სურს...
    - ეფექტური ნომრის შესასრულებლად, შენ და ლუკას ალბათ დიდი ძალისხმევა გჭირდებათ?
    - თავდაპირველად, ცოტათი გვიჭირდა, ახლა კი ყველაფერი კარგადაა - ერთმანეთს კარგად შევეწყვეთ. საერთოდ, ცეკვას ქორეოგრაფი გვიდგამს. რა თქმა უნდა, ჩვენ ვამუშავებთ, ბევრს ვვარჯიშობთ...
    - არის შემთხვევა, როცა რეპეტიციის ხასიათზე არ ხარ?
    - კი, ასეთი შემთხვევები ყოფილა, მაგრამ - პროექტამდე. პირველი "ლაივიდან" მოყოლებული, არ ყოფილა შემთხვევა, რომ ვარჯიში დამზარებოდა.
    - შენი დღის რეჟიმი როგორია?
    - დილით ვდგები, სავარჯიშოდ მივდივარ - ჩემი რეჟიმი ეს არის... შინ ღამის 11-12 საათზე ვბრუნდები.
    - გაკვეთილების მომზადებას როგორ ახერხებ?
    - ახლა ცოტა ხნით სკოლიდან დამითხოვეს - არდადეგები გვაქვს. მანამდე, სკოლაში ყველანაირად ხელს მიწყობდნენ, მეხმარებოდნენ. ამ მხრივ, პრობლემა არ მაქვს.
    - პროექტში მონაწილეობის შემდეგ, შენს ცხოვრებაში რა შეიცვალა?
    - მივხვდი, რომ ასე ცხოვრება ძალიან კარგია - პოპულარობა მომწონს, ეს უმაგრესი შეგრძნებაა! ასეთ პროექტებში მონაწილეობა სასურველია, რადგან ყველანაირ ცეკვას ვსწავლობ, პროფესიულად უფრო ვვითარდები, "ვიზრდები"... ჩემს ცხოვრებაში ცეკვის არსებობა კარგია და მივხვდი, რა უნდა გავაკეთო, რომ უფრო მეტი შევისწავლო...
    - დაახლოებით 10 წლის მერე, შენი ცხოვრება როგორი წარმოგიდგენია?
    - არ ვიცი. ასე კონკრეტულად არ ვფიქრობ ხოლმე, მაგრამ ალბათ, საზღვარგარეთ გავემგზავრები და სწავლას იქ გავაგრძელებ...
    - ნიტა, ახალი წლის და შობის დღესასწაულზე რეპეტიცია არ გაგიპროტესტებია?
    - საერთოდ, დღესასწაულებზე ბევრს ვვარჯიშობდი, მაგრამ არ გამიპროტესტებია, რადგან ვფიქრობ, ახლა ჩემთვის დღესასწაულზე მნიშვნელოვანი ეს პროექტია. მირჩევნია, მეტი ვიმუშაო, ვიდრე გავერთო.
    - საერთოდ, შობა-ახალი წლის დღესასწაულებს როგორ ატარებ?
    - დედასა და მამასთან ერთად...
    - გჯერა ახალი წლის ღამის ჯადოსნური ძალის?
    - როგორ არა (იცინის)! ყველას უნდა სჯეროდეს. ერთ-ერთი სურვილი - ამ პროექტში მოხვედრა ახლახან ამიხდა...
    - ახალი წლის დღესასწაულზე რა საჩუქრები მიიღე?
    - "მეიქაფის" "ქეისი", საკერავი მანქანა (კერვა ძალიან მიყვარს) და კედი - წელს ასეთი ძალიან კარგი საჩუქრები მივიღე.
    - ვინ გაჩუქა, იცი?
    - სანტას საჩუქრები იყო... ისე, კედი მამამ მაჩუქა.
    - მაკიაჟის გაკეთებას მშობლები არ გიშლიან?
    - არა, ყოველდღიურად არ ვიკეთებ.
    - კერვას რაც შეეხება, სასცენო სამოსს იკერავ, თუ?..
    - ჩემთვის ჩანთას ვკერავ. ახლა კაბის შეკერვა უნდა ვცადო. პატარ-პატარა რაღაცებს ვკერავ ხოლმე...
    - შენს ცხოვრებაში ყველაზე განსაკუთრებული რომელი ახალი წელი იყო?
    - ალბათ, როცა თოვლის ბაბუამ ტელეფონი მაჩუქა (იცინის)... ჩემთვის ყველა ახალი წელი განსაკუთრებულია!
    - გასული 2016 წლით კმაყოფილი ხარ?
    - ასე თუ ისე, კმაყოფილი ვარ, მაგრამ ცეკვის მხრივ, უფრო მეტის გაკეთება, უფრო მეტად განვითარება შემეძლო... საბოლოოდ, კარგი წელი იყო.
    - 2017 წლისგან რას ელი?
    - პიროვნულ და პროფესიულ განვითარებას და ყველაფერ კარგს!..
    - წარმატებას გისურვებ!
    წყარო: gza.ambebi.ge
    1 231 ნახვა
    16-01-2017, 23:25
    GOGATV