X
  • "საქართველოში რომ ჩამოვიდა, მითხრეს, გიკითხაო..." - რას იხსენებს დონალდ ტრამპთან ურთიერთობაზე ნანუკა გოგიჩაიშვილი

    რამდენიმე საათში ამერიკის შეერთებული შტატების რიგით 45-ე პრეზიდენტი ოფიციალურად გახდება დონალდ ტრამპი.

    თბილისის დროით 21:00 საათზე ტრამპი ფიცს დადებს აშშ-ის უზენაესი სასამართლოს თავმჯდომარის გლოვერ რობერტსის თანდასწრებით. ფიცის დადებისას ორ ბიბლიას გამოიყენებენ: აბრაამ ლინკოლნის პირადი ბიბლია, რომელიც ინაუგურაციის ცერემონიის განუყოფელ ნაწილად იქცა და ტრამპის პირად ბიბლიას, რომელიც მას დედამისმა 1955 წელს აჩუქა.

    ნოემბერში, ამერიკის საპრეზიდენტო არჩევნებმა ქართულ საზოგადოებაშიც დიდი მითქმა-ოთქმა გამოიწვია. ტრამპის გაპრეზიდენტებას ბევრი ცნობილი სახე გამოეხმაურა. ამერიკის 45-ე პრეზიდენტთან მოგონებები გაიხსენეს ქართველმა სელებრითებმაც. მაგალითად, საქართველოში  მომღერლები ნინი ბადურაშვილი, ქრისტინე იმედაძე და სოფო ნიჟარაძე, ასევე მოდელები: ჯანეტ ქერდიყოშვილი და ნანუკა გოგიჩაიშვილი წაიყვანეს.

    ტრამპის გაპრეზიდენტების შესახებ, მოდელმა ნანუკა გოგიჩაიშვილმა ფეისბუქის პირად გვერდზე დაწერა: "ამ ხუმრობა ხუმრობაში, პირველი თვითმფრინავი, რაც ვმართე, ტრამპის ბოინგი იყო"... ცხადია, ამ ამბით დავინტერესდით და ნანუკას ტრამპთან შეხვედრის გახსენება ვთხოვეთ.

    "ტრამპთან შეხვედრის საშუალება ჩემი "მისობის" პერიოდში მქონდა, ანუ მას მერე, რაც "მის სამყაროზე" აღმოვჩნდი. ეს ხომ ტრამპის კონკურსია. ჰოდა, პირველად ასე გავიცანი... რასაც შემდეგ ასეთი რამ დაემთხვა, - ჩვენი მაშინდელი პრეზიდენტი სააკაშვილი ამერიკაში ტრამპს ხვდებოდა, მასპინძელმა რატომღაც, ერთ-ერთ შეხვედრაზე, ყურადღება ჩემზე შეაჩერა, რაც კამერების თანდასწრებით მოხდა, აიღო კონკურსის ჟურნალი და პრეზიდენტ სააკაშვილს აჩვენა, - ნახე, "მის საქართველო" ჩემს კონკურსზე ლას-ვეგასში მონაწილეობდა, რომელსაც ახლოს ვიცნობო (მაგ პერიოდში დედაჩემი პრეზიდენტის პრესსამსახურში აპარატის უფროსი იყო). სააკაშვილმა ჩემ შესახებ არ იცოდა, რომ გაიგო, ძალიან გაუკვირდა და უთხრა, რომ ნათია, ნანუკას დედა ჩემთან აპარატში მუშაობსო. სხვათა შორის, ამის გაგონება დედაჩემისთვისც მოულოდნელობა იყო...

    - "მის სამყაროს" მსვლელობისას ტრამპი კონკურსანტებს გხვდებოდათ?
    - კი, ყველა გოგონასთან უშუალო კონტაქტი ჰქონდა, რადგანაც, ვიმეორებ, მისი კონკურსია, რომელიც შვილივით უყვარს. მოკლედ, ვინც ასე თუ ისე ვაქტიურობდით, ყველას გვიცნობდა... ლას-ვეგასში კონკურსის მსვლელობისას ვხვდებოდით. სხვადასხვა ღონისძიებაში ვიყავით ჩართული. ერთხელ, გამიმართლა და 5 დიდი ქვეყნის წარმომადგენელთან ერთად მეც ვიყავი საქველმოქმედო ღონისძიებაზე, პატარა ბავშვების მხარდამჭერ აქციაზე, ფულიც გადაირიცხა, ტრამპის ბოინგით გადაგვაფრინეს, - ეს ყველაფერი კონკურსის ფარგლებში მოხდა. ბოინგშიც მახსოვს, ძალიან ჩართული იყო პროცესში... ამ ამბის შესახებ მაშინ მხოლოდ გარშემომყოფებმა იცოდნენ, მე და დედაჩემი დიდად არ ვახმაურებდით. არც ფოტოებს ვაზიარებდით სოციალური ქსელის საშუალებით. თან, "მის სამყაროს" კონკურსის შემდეგ ამერიკაში დიდხანს დავრჩი...

    გავიდა რაღაც პერიოდი და ტრამპი საქართველოში ჩამოვიდა, მეც უკვე აქ ვიყავი. ჰოდა, დამირეკეს და ამის შესახებ მაცნობეს, ასევე მითხრეს, - გიკითხაო. ესეც რომ არ ყოფილიყო, მე, როგორც წინა წლის "მისი" და "მის სამყაროზე" ნამყოფი, ასევე იმ მიმდინარე წლის "მის საქართველო" - ჯანეტ ქერდიყოშვილი იმ შეხვედრაზე უნდა მივსულიყავით, თან, ჯანეტი "მის სამყაროზე" მიემგზავრებოდა...

    როცა შეგვხვდა, ისევ უშუალობითა და სითბოთი დაგვამახსოვრა თავი... შემდეგ ბათუმში ჩავედით, "ტრამპ თაუერი" რომ შენდებოდა და იქაც მისი ბოინგით ვიმგზავრეთ. ისე შემხვდა, თითქოს დიდი ხნის


    მეგობრები ვიყავით. ამბობდა, ნანუკას ვიცნობ, ის ჩემს კონკურსზე ნამყოფიაო... მერე პილოტებთანაც შევედით და შტურვალთანაც მომიწია დაჯდომამ, მაგრამ მაშინ ამისთვის დიდი მნიშვნელობა არ მიმინიჭებია...

    ზოგადად კი ამ ადამიანზე ცუდის თქმა არ შემიძლია, თვე-ნახევარი მის კონკურსზე ვიყავი და მხოლოდ კარგად მახსოვს კონკურსიც და თვითონაც. გასხნილი იყო ურთიერთობისთვის. ამასთან, თავისი"მის სამყარო" ძალიან უყვარდა და ასევე ყველა მისი მონაწილე. თითოეულთან თბილი ურთიერთობა ჰქონდა...

    - ახლაც რომ მოგიკითხოს?
    - (იცინის) იმდენად უშუალოა, რომ მისგან ყველაფერი მოსალოდნელია. ობამაზეც ამბობენ, ასეთი ადამიანიაო, შეიძლება მაგალითად, ვიღაცასთან ერთად, გავიდეს და ეზოში კალათბურთი ითამაშოს... ასე რომ, ტრამპის პრეზიდენტობის პერიოდში მსოფლიო ჯერ ვერ მიხვდება, მისგან რას უნდა ელოდოს, არაპროგნოზირებადი ადამიანია...

    - მიესალმები მის გამარჯვებას?
    - ხომ ვამბობ, ვერ ვხვდები, რას უნდა ველოდოთ მისგან, მაგრამ, მის მიმართ ნეგატიური დამოკიდებულებაც არ მაქვს... ამიტომ, ახლა რა პოლიტიკა წავა, არავინ იცის. ის შეიძლება საქართველოს ძალიან გამოადგეს, ან პირიქით, ვნახოთ, გადაჭრით ვერ ვიტყვით, რომ მისი პრეზიდენტობა ჩვენთვის ცუდი იქნება...


    წყარო: ambebi.ge
    2 608 ნახვა
    22-01-2017, 23:05
    GOGATV