"რეალობის შიში ყველაზე საშინელი რამ არის" - როდის ესმის საკუთარი გულისცემა ქეთი ხუციშვილს

"წარმატება და წარუმატებლობაც - ორივე მიგემია"

"ადამიანები შეცდომებს რომ არ ვუშვებდეთ და შემდეგ ამ შეცდომებზე არ ვსწავლობდეთ, მაშინ ცხოვრება უინტერესო და მოსაბეზრებელი იქნებოდა. რატომ ხდის შეცდომები ცხოვრებას საინტერესოს? - იმიტომ, რომ შეცდომები ცხოვრებისეულ გამოცდილებას გვმატებს, მიუხედავად იმისა, რომ ხშირად, შეცდომებზე სწავლა ძალიან მტკივნეულია", - ამბობს ქეთი ხუციშვილი, რომელიც ბოლო დროს ძალზე პოპულარული გახდა.


- წლების მატების გეშინია?
- ვფიქრობ, წლების მატების არასოდეს არ უნდა გეშინოდეს. საკუთარ ასაკს ყოველთვის ამაყად ვუსწორებ თვალს და იმ ასაკში ყველაზე მეტად მომწონს თავი, რომელშიც ვარ...
- წარუმატებლობა გიგემია?
- წარმატება და წარუმატებლობაც - ორივე მიგემია. ყველაზე ცუდია, როცა წარუმატებლობის გამო ფარ-ხმალს ყრი. შინაგანად მებრძოლი ვარ და წარუმატებლობას არასოდეს ვემორჩილები.
- თუ ცხოვრება ასეთი ხანმოკლეა, რატომ ვაიძულებთ თავს ვაკეთოთ ის, რაც არ მოგვწონს?
- ხშირად გარემო და სიტუაცია გვკარნახობს, რომ უნდა ვაკეთოთ ის, რაც არ მოგვწონს, მაგრამ მთავარია, წინააღმდეგობის გაწევის სურვილი შევინარჩუნოთ.
- გადაწყვეტილებების სპონტანურად მიღება თუ გჩვევია?
- დიახ, ხშირად გადაწყვეტილებებს სპონტანურად ვიღებ, თუმცა ეს არ ნიშნავს, რომ ფიქრი არ მიყვარს.
- რომ გქონდეს შანსი, რას შეცვლიდი შენს ცხოვრებაში?
- ესპანეთში დავიბადებოდი. მომწონს ეს ქვეყანა და სიამოვნებით ვიცხოვრებდი იქ. მაგრამ მთელი ცხოვრების იქ გატარება, გამიჭირდებოდა. ვგრძნობ, შინაგანად აქაურობას ვეკუთვნი.
- წარმოიდგინე, რომ ბედნიერება გახდა მსოფლიოს ვალუტა. რომელი სამსახური გაგამდიდრებდა?
- ის, რასაც ახლა ვაკეთებ და რა საქმესაც ვემსახურები, ანუ ჩემი პროფესია გამამდიდრებდა.
- შენ აკეთებ იმას, რისიც გჯერა, თუ ცდილობ დაიჯერო იმის, რასაც აკეთებ?
- ვაკეთებ იმას, რაც მიყვარს და ვიცი, რომ გამომივა.
- ადამიანებს ადვილად ენდობი?
- ადამიანებს არ ვენდობი. თუმცა, ჩემს ამ თვისებას ვერავინ ამჩნევს. ვცდილობ, არ შევიმჩნიო.
- დავუშვათ, ადამიანი საშუალოდ 40 წელს ცოცხლობს. ამის გათვალისწინებით, უკეთესად რომ გეცხოვრა, რას შეცვლიდი?
- ერთ წელში გავხდები 40 წლის და ძნელია, ამ გადასახედიდან გიპასუხო... ადამიანს ყოველთვის ჰგონია, რომ ცხოვრებას "ახლა" იწყებს და შესაბამისად, გასული წლები მხოლოდ ერთი გუშინდელი დღეა.
- რამდენად აკონტროლებ ყველა იმ მოვლენას, რაც შენს ცხოვრებაში ხდება?
- რაც ჩემზეა დამოკიდებული, ყველაფერს ვაკონტროლებ, ხოლო დანარჩენ მოვლენებზე, როგორც წესი, არ ვდარდობ. რაც იქნება, იქნება!
- სასადილოდ ნაცნობებთან ერთად წახვედი. მოულოდნელად, ისინი იწყებენ შენი ახლო მეგობრის უსამართლოდ გაკრიტიკებას. როგორ მოიქცევი?
- მოვიქცევი ისე, როგორც ნებისმიერი კარგი მეგობარი მოიქცეოდა. იმ ადამიანს ჭორიკანებისგან სათანადოდ დავიცავდი.
- თუ დაარღვევდი კანონს საყვარელი ადამიანის გადასარჩენად?
- რისი გამოცდილებაც აქამდე არ მქონია, იმაზე დარწმუნებით ვერაფერს გეტყვი.
- რით განსხვავდები სხვა ადამიანებისგან?
- ალბათ, უფრო ხშირად ვიცინი.
- შეგიძლია გაიხსენო ის, რაზეც ოდესღაც ოცნებობდი და არ აგისრულდა?
- ასეთი რამ არ მახსენდება.
- როცა ლიფტის ღილაკს ნერვიულად რამდენჯერმე აჭერ თითს, მართლა გჯერა, რომ ლიფტი ასე უფრო სწრაფად მოვა?
- არ ვაჭერ რამდენჯერმე, მშვიდად ველოდები ხოლმე (იღიმის).
- ანუ ბუნებით მშვიდი ხარ?
- დიახ, წონასწორობას არასდროს ვკარგავ და ვცდილობ, ელემენტარულ რაღაცებზე არ ავღელდე.
- რომელს ისურვებდი, რომ იყო: უბედური გენიოსი თუ ბედნიერი სულელი?
- უბრალოდ, ბედნიერი ადამიანი.
- ისურვებდი ისეთივე მეგობარს, როგორიც თავად ხარ?
- თამამად შემიძლია ვთქვა, რომ დიახ, ვისურვებდი ჩემნაირ მეგობარს, ერთგულსა და ყურადღებიანს (იღიმის).
- რა უფრო ცუდი იქნება: შენი მეგობარი სამუდამოდ სხვა ქვეყანაში წავიდეს საცხოვრებლად, თუ ახლოს გყავდეს, მაგრამ ურთიერთობა აღარ გქონდეს?
- თუ აქ გავწყვიტე ურთიერთობა, ე.ი. მიზეზიც მაქვს... სხვა ქვეყანაში ცხოვრება ურთიერთობას არ ცვლის.
- ყველაზე მეტად, რის გამო ხარ სამყაროსადმი მადლიერი?
- სამყაროსადმი ყოველთვის მადლიერი ვარ იმის გამო, რაც მაქვს. ზოგადად, უმადური ადამიანი არ გახლავართ.
- რომელს აირჩევ: ძველი მოგონების წაშლას თუ ახლის მოპოვებას?
- ვფიქრობ, მოგონებების წაშლა არ შეიძლება. ცუდია თუ კარგი, ეს ხომ ჩვენი ცხოვრების ნაწილია.
- სიმართლის გაგება ბრძოლის გარეშე შესაძლებელია?
- რატომაც არა!
- შენი ყველაზე დიდი შიში რეალობა გამხდარა?
- კი. რეალობის შიში ყველაზე საშინელი რამ არის. ამიტომ ვცდილობ, კონკრეტულ მომენტებში თავი ხელში ავიყვანო და აღარაფრის მეშინოდეს.
- გახსოვს დაახლოებით 5 წლის წინ რაზე იყავი გაბრაზებული? ახლა თუ აქვს ამას რამე მნიშვნელობა?
- გუშინ რაზე ვიყავი გაბრაზებული, ის არ მახსოვს, 5 წლის წინ, - მით უმეტეს. საერთოდ, წყენის გულში ჩადება არ მჩვევია. თუმცა, მინდა თუ არა, მსგავსი რაღაცები ცხოვრებისეულ გამოცდილებას მძენს.
- რა არის შენი ბავშვობის დრო­ინდელი ყველაზე ბედნიერი მოგონება?
- მთლიანად ბავშვობა. ვთვლი, რომ ბავშვობა ადამიანის ცხოვრებაში ყველაზე კარგი ეტაპია.
- თუ ჯერ კიდევ არაფრისთვის მიგიღწევია, დასაკარგი არაფერი გაქვს. ასეა?
- დასაკარგი ყოველთვის გაქვს, ვიდრე ცოცხალი ხარ.
- გქონია თუ არა ასეთი შემთხვევა, როცა ვინმესთან ერთად, დრო სრულიად უხმოდ გაატარე და შემდეგ მიხვდი, რომ ეს საუკეთესო საუბარი იყო შენს ცხოვრებაში?
- არა. მე ემოციები ხმამაღლა თუ არ გამოვხატე, არ შემიძლია. ჩუმად გატარებული დრო ჩემთვის საინტერესო არაა. ემოციური ადამიანი ვარ.
- ახლა წინ მილიონი დოლარი რომ დაგიდონ და გითხრან, - თანხა აიღე, ოღონდ სამუშაოზე სა­ბოლოოდ უნდა თქვა უარიაო, რას იზამ?
- ამ წინადადებას არავითარ შემთხვევაში არ დავთანხმდები! ჩე­მი პროფესია ჩემი ცხოვრებაა და არანაირ თანხაზე არ გავცვლი. ასეთი რამ ჩემთვის წარმოუდგენელია.
- გაყიდდი შენი ცხოვრების 10 წელს მსოფლიო აღიარებაზე?
- არა, აღიარება თუ უნდა მოვიდეს ჩემამდე, მსხვერპლის გარეშეც მოვა.
- თუ ჩვენ შეცდომებზე ვსწავლობთ, რატომ გვეშინია მათი დაშვების?
- შეცდომებზე სწავლა ყოველთვის უმტკივნეულო არ არის და სწორედ ამიტომ გვეშინია შეცდომების დაშვების.
- ბოლოს როდის მოისმინე საკუთარი გულისცემა?
- საკუთარი გულისცემა სულ მესმის.
- რა ან ვინ გიყვარს უფრო მეტად? ის, რაც ბოლოს გააკეთე, გამოხატავდა ამ სიყვარულს?
- ჩემი შვილი, ჩემი საქმე მიყვარს. რასაც გულით ვაკეთებ, ყველაფერი სიყვარულის გამომხატველია.
წყარო: ambebi.ge