ქალი, რომელსაც საშვილოსნო არ აქვს, დედა გახდა

დიდი ბრიტანეთის ქალაქ ჰადერსფილდში 24 წლის კირსტი ბრაუნს, რომელიც მძიმე გენეტიკური დაავადების გამო, საშვილოსნოს გარეშე დაიბადა, შვილი შეეძინა.

"15 წლამდე არ ვიცოდი, რომ ასეთი სერიოზული გადახრა მქონდა. ექიმებმა მითხრეს, რომ კუნთოვანი ორგანოს არარსებობის გამო, რომელშიც ემბრიონი ვითარდება, დაორსულებას ვერასდროს შევძლებდი", - აცხადებს ბრაუნი.

კირსტის თქმით, მას დიდი ხნის განმავლობაში ამ აზრთან შეგუება უჭირდა, მაგრამ იმედს არ კარგავდა და ჯანსაღი ცხოვრების წესს მისდევდა.

2008 წელს მან მომავალი მეუღლე, 27 წლის რაგბისტი კევინ ბრაუნი გაიცნო. დაქორწინების შემდეგ რამდენიმე წლის განმავლობაში წყვილი შვილის ყოლას ცდილობდა, თუმცა მათი ყველა მცდელობა წარუმატებლად სრულდებოდა.
ბრაუნებს დახმარების ხელი კევინის 25 წლის დეიდაშვილმა, კიმ როსტონმა გაუწოდა. 

ცნობილია, რომ ორსულობა საშვილოსნოს ღრუში ვითარდება. ვიდრე განაყოფიერებული კვერცხუჯრედი მასში მოხვდება, გრძელ გზას გადის. ექიმების აზრით, ამ ორგანოს გარეშე ბავშვის გაჩენა შეუძლებელია. თუმცა ბრიტანელმა გინეკოლოგებმა კირსტის ორგანიზმიდან კვერცხუჯრედის ამოღება შეძლეს, განაყოფიერების ჩატარების შემდეგ კი ემბრიონი კიმის ორგანიზმში შეიყვანეს.

ქირურგიული ჩარევის შედეგად ჯანმრთელი ბიჭუნა, ჰარი დაიბადა. ბავშვი 3.1 კგ-ს იწონის.

მომზადებულია thesun.co.uk-ის მიხედვით.