მოკრძალებული საცურაო კოსტუმები ინდოელი ქალებისთვის

ინდოელ ქალებს სანაპიროზე ჩვეულებრივი საცურაო კოსტუმებით გამოჩენა რცხვენიათ. ამის გამო ინდოელმა დიზაინერებმა - შივან ბატიამ და ნარეშ კუკრეჯამ ახალი საცურაო კოსტუმები შექმნეს, რომლებშიც ყველა ინდოელი ქალბატონი თავს კომფორტულად იგრძნობს. საცურაო კოსტუმები ტრადიციული ინდური სამოსის - სარის სტილშია შეკერილი. ქალბატონებს საცურაო კოსტუმის შეძენა 450 გირვანქა სტერლინგად შეუძლიათ.

"მიგვაჩნია, რომ ინდოელ ქალებს მსოფლიოში ყველაზე ლამაზი ტანი აქვთ, მაგრამ ძალიან მორიდებულები არიან და საჯაროდ სხეულის გამოჩენა არ სურთ. ჩვენი საცურაო კოსტუმები ქალბატონებს საშუალებას მისცემს, თავი კომფორტულად იგრძნონ", - განაცხადეს დიზაინერებმა გაზეთ The Sunday Times-თან საუბარში.

ბოლივუდის მსახიობი ბიპაშა ბასუ ბიკინი-სარით ერთ-ერთი ფილმის დაჯილდოვების ცერემონიალზე გამოცხადდა, რასაც მთელ ინდოეთში დიდი გამოხმაურება მოყვა. საზოგადოება მსჯელობდა, უნდა ეცვას თუ არა ქალს მსგავსი სამოსი. გასულ თვეს ინდოელ ქალბატონებს მთავრობის სექსუალური თანასწორობის კომისიის ხელმძღვანელმა, მამტა შარმამ მოუწოდა, რომ გონივრულად შეარჩიონ სამოსი და საზოგადოების თავშეყრის ადგილებში ისე გავიდნენ, რომ თავიდან აიცილონ ფიზიკური შეურაცხყოფა.







მომზადებულია The Sunday Times-ის მიხედვით.