X
  • საქართველოს ეროვნულ მუზეუმში ვანის არქეოლოგიური მუზეუმის რეაბილიტაციის პროექტის პრეზენტაცია გაიმართა

    ეროვნულ მუზეუმში, საქართველოს რეგიონული პოლიტიკისა და თვითმმართველობის კომიტეტის თავმჯდომარის, გრიგოლ ლილუაშვილის ინიციატივით, ვანის არქეოლოგიური მუზეუმისა და ნაქალაქარის ტერიტორიის რეაბილიტაციის პროექტი გააცნეს საზოგადოებას.


     


    პროექტის ფარგლებში დაგეგმილია ვანის არქეოლოგიური მუზეუმის, ნაქალაქარის ტერიტორიის და მუზეუმამდე მისასვლელი გზის რეაბილიტაცია, მუზეუმის აღჭურვა სპეციალური ინვენტარით.


     


    ვანის არქეოლოგიური და ნაქალაქარის ტერიტორიის რეაბილიტაციის თანხა მსოფლიო ბანკმა და საქართველოს მთავრობამ გამოყო. პროექტი 2018 წელს დასრულდება.


     


    საქართველოს რეგიონული პოლიტიკისა და თვითმმართველობის კომიტეტის თავმჯდომარე გრიგოლ ლილუაშვილი:


     


    "ეს არის ერთობლივი პროექტი. ეროვნული მუზეუმის ხელმძღვანელი, ბატონი დავით ლორთქიფანიძე და მე თანაავტორები გახლავართ.


     


    ერთი მიზანი გვამოძრავებდა, რომ მეტ ხალხს გაეგო ვანის ისტორიის შესახებ. პროექტის პრეზენტაცია ითვალისწინებს ვანის არქეოლოგიის მუზეუმის აღდგენას, რეაბილიტაციას. ამაში იხარჯება მსოფლიო ბანკის მიერ გამოყოფილი 9 მილიონი ლარი.


     


    საზოგადოებას საშუალება ჰქონდა, გამოეთქვა თავისი მოსაზრებები, იდეები, დაეთვალიერებინა ამ არაჩვეულებრივ მუზეუმში გამოფენილი ექსპონატები, ვანის არქეოლოგია. ყველანი კმაყოფილები ვართ. დიდი მადლობა ბატონ დავით ლორთქიფანიძეს და ყველას, ვინც დაინტერესდა".


     


    საქართველოს ეროვნული მუზეუმის გენერალური დირექტორი დავით ლორთქიფანიძე:


     


    "მიხარია, რომ რეგიონული განვითარების პროექტებში, რომლებიც ასე აქტიურად მიმდინარეობს, ჩვენც ვთანამშრომლობთ. რატომ ვანი? რატომ გადავწყვიტეთ ასეთი მასშტაბი? ვანის, როგორც ნაქალაქარის მნიშვნელობაზე, ჯერ კიდევ მე-19 საუკუნეში "გაზეთ" დროებაში წერდნენ, თუ რა დიდ საიდუმლოებას ინახავს ვანი და რა დიდი აღმოჩენებია მოსალოდნელი.


     


    ეროვნული მუზეუმის ფუნქცია არის ჩვენი ეროვნული საგანძურის შენახვა, მოვლა, საზოგადოებისთვის წარდგენა და ახალი პროცესების დაწყება. ვანის მუზეუმი იქნება აბსოლუტურად თანამედროვე, როგორც საექსპოზიციო, ისე საზოგადოებრივი წერტილებით. საზოგადოებრივ წერტილებს ემატება დროებითი საგამოფენო სივრცეები, რომლებიც ასევე მნიშვნელოვანი კომპონენტია.


     


    გარკვეულწილად იქმნება სამი ელემენტის ქსელი. პირველი ელემენტია ეროვნული ცენტრი, რომელიც არის თბილისში, იქმნება რეგიონული განვითარების ცენტრები, როგორც მესტიაში, მზადდება ბოლნისი და მესამე - ეს არის კონკრეტული ძეგლები.


     


    სწორედ ამ ძეგლი-მუზეუმის ფორმატში ვანი იკავებს ძალიან მნიშვნელოვან საპილოტე ადგილს, რომელსაც, იმედი მაქვს, რომ მოჰყვება ნოქალაქევი, დმანისი და ა.შ."


     


    კულტურისა და ძეგლთა დაცვის მინისტრი მიხეილ გიორგაძე:


     


    "ძალიან მნიშვნელოვან ინიციატივას ჩაეყარა საფუძველი, ვგულისხმობ, პროექტების ასეთ ფორმატში წარდგინებას ფართო საზოგადოების წინაშე. ყველა იმ პროექტთან მიმართებაში, რომლებიც ბოლო ორი-სამი წლის განმავლობაში კულტურის სამინისტრომ და ეროვნულმა მუზეუმმა განავითარა, მიდგომა იყო სწორედ ასეთი, რომ მუზეუმის დანიშნულება დიდი ხანია, გასცდა სტანდარტულ ფუნქციებს - სამუზეუმო ექსპონანტების შენახვის, დაცვისა და ექსპონირების.


     


    მუზეუმი უნდა იყოს და არის ძალიან მძლავრი კულტურულ-საგანმანათლებლო, სამეცნიერო ცენტრი.


     


    დღეს არ შეიძლება, არ გავიხსენოთ აკადემიკოსი ოთარ ლორთქიფანიძე, რომელსაც უდიდესი წვლილი მიუძღვის ვანის მუზეუმის დაფუძნებაში. ყველა იმ ადამიანს მინდა მადლობა გადავუხადო, ვინც ამ ტრადიაცას აგრძელებს.


     


    მინდა ხაზი გავუსვა კიდევ ერთ მომენტს – ყველა მუზეუმის განვითარებაში, როგორც კონცეფციაში, ისე შექმნაში, ქართველი სპეციალისტები მონაწილეობენ, არა მხოლოდ მონაწილეობენ, არამედ წამყვან როლს ასრულებენ. ეს ძალიან მნიშვნელოვანია, რადგან ასეთი მაღალკვალიფიციური, მსოფლიო დონის რესურსი გვყავს და მხოლოდ უცხოეთიდან არ ვიწვევთ შესაბამისი დარგის სპეციალისტებს.


     


    დიდი მადლობა მინდა გადავუხადო ყველა იმ ადამიანს, ვინც ჩართულია ვანის მუზეუმის პროექტის განვითარებაში.


     


    დარწმუნებულო ვარ, რომ ვანის მუზეუმი იქნება რეგიონში (და როდესაც რეგიონს ვამბობს, არა მხოლოდ ქვეყნის მასშტაბს ვგულისხმობ) ერთ-ერთი გამორჩეული კულტურულ-საგანმანათლებლო, სამეცნიერო და ტურისტული მიზიდულობის ძალიან მძლავრი ცენტრი".


     


    ვანის არქეოლოგიური მუზეუმი 1985 წელს დაფუძნდა ვანის არქეოლოგიური ექსპედიციის ხელმძღვანელის, აკადემიკოს ოთარ ლორთქიფანიძის ინიციატივით.


     


    მასში განთავსებულია ვანის ნაქალაქარზე 1985 წლიდან ჩატარებული არქეოლოგიური გათხრების შედეგად მოპოვებული მასალის უმეტესობა.


     


    2006 წლიდან ვანის მუზეუმი საქართველოს ეროვნული მუზეუმის შემადგენლობაში შევიდა.


    ETANEWS


    წყარო: etanews.ge
    970 ნახვა
    GOGATV