13 მარტს ნინო მაჩაიძის მოსმენა ქართველ მსმენელს თბილისის ოპერის თეატრში შეეძლება
ნინო მაჩაიძემ მასნეს ოპერაში "ტაისი" ბარსელონას დიდ თეატრ ლისცეუში The Gran Teatre del Liceu პლასიდო დომინგოს მიწვევით იმღერა. ის პლასიდო დომინგოს უკვე წლებია უწევს პარტნიორობას, ამჯერად, ქართველი სოპრანო მაესტრომ ბარსელონას დიდ თეატრ ლისეუში მიიწვია.
ესპანელი მსმენელისთვის გუშინ მათ მთავარი პარტიები შეასრულეს მასნეს ოპერაში "ტაისი". ეს ოპერა იშვიათად იდგმება, რადგან "ტაისი" ერთ-ერთ ურთულეს პარტიად მიიჩნევა და ვირტუოზულ შესრულებას მოითხოვს.
წარმოდგენის დასასრულს მაყურებელთა ოვაციები ბარსელონას დიდ თეატრში დიდი ხნის მანძილზე არ წყდებოდა. პლასიდო დომინგომ ქართველი სოპრანო ყვავილების თაიგულით დააჯილდოვა. ქართველ მსმენელს დომინგოს რჩეულის, მსოფლიოს პირველი კლასის თეატრების სოლისტის ნინო მაჩაიძის მოსმენა 13 მარტს თბილისის ოპერის თეატრში შეეძლება. საღამო მიეძღვნება გაეროს ბავშვთა ფონდის (იუნისეფის) ინიციატივით მიმდინარე კამპანიას „დაინახე ყველა ფერი“. კამპანია მიზნად ისახავს საზოგადოების დამოკიდებულების, ქცევის ნორმების შეცვლას და სტიგმის დაძლევას შეზღუდული შესაძლებლობის მქონე ბავშვებისა და ახალგაზრდების მიმართ. ნინო მაჩაიძე, ნიკოლოზ რაჭველი, საქართველოს ეროვნული მუსიკალური ცენტრი და ხელოვანთა კავშირი Conceptart უერთდებიან ზემოაღნიშნულ კამპანიას და 13 მარტს თბილისელ მსმენელს ოპერის თეატრში იწვევენ. 
წყარო: ambebi.ge
